Hienieralny dyrektar nacyjanalnaj kinastudyi «Biełaruśfilm» Aleh Silvanovič napisaŭ zajavu ab zvalnieńni. Pra heta hiendyrektar «Biełaruśfilma» paviedamiŭ BiełaPAN.
Pavodle jaho słoŭ, zajavu jon padaŭ u paniadziełak, 9 lutaha, i jana pavinna była być zarehistravana. «Na hetaj pasadzie ja adpracavaŭ čatyry hady, — adznačyŭ jon. — Čas i ŭmovy źmianiajucca. Sumna ŭśviedamlać, što nie ŭsio atrymałasia zrabić. Chacieŭ by, kab na majo miesca pryjšoŭ čałaviek, jakomu buduć daviarać».
«Viadoma, zvalnieńnie — heta zaŭsiody balučaja pracedura, — havoryć kiraŭnik kinastudyi. — Mienavita tamu ja vyrašyŭ papiaredzić pra svajo zvalnieńnie zahadzia, jak taho patrabuje zakon. Jakija płany? Pakul mnie realna chočacca adpačyć. Što budzie dalej — nie viedaju. U lubym vypadku finał — hety zaŭsiody novy pačatak».
Infarmacyju pra atrymanuju zajavu ŭ Ministerstvie kultury Biełarusi pakul nie paćviardžajuć.
Načalnik upraŭleńnia kinavideamastactva Minkulta Uładzimir Lisoŭski ŭ hutarcy z žurnalistam BiełaPAN skazaŭ, što ni pra jakuju zajavu pakul nie čuŭ, ale zaŭvažyŭ, što dumka pra zvalnieńnie ŭ kiraŭnika «Biełaruśfilma» sapraŭdy była.
«Moža być, jon prosta stamiŭsia, — vykazaŭ mierkavańnie pradstaŭnik Minkulta. — Kiravać «Biełaruśfilmam» — heta ciažkaja noša. Tam ciapier skłałasia nie vielmi prostaja situacyja. Idzie rekanstrukcyja, da taho ž treba vykonvać płan pa vytvorčaści karcin. Usio heta, viadoma, ciažka, u kiraŭnika moh adbycca časovy praryŭ prajavy słabaści. Treba pieražyć. Tym bolš čałaviek zajmaje surjoznuju pasadu. Tak prosta jaho naŭrad ci adpuściać. Ministerstva kultury Biełarusi pakul nie bačyć kandydatury na jaho miesca. Kantrakt ź Silvanovičam zaklučany da vosieni. Być moža, da hetaha času jaho nastroj palepšycca. Nielha apuskać ruki».
Siarod mahčymych pryčyn takoha nastroju dyrektara kinastudyi Lisoŭski nazvaŭ nieadnarazovyja vymovy ŭ adras Silvanoviča.
«Nakolki ja pamiataju, raniej da jaho vykazvalisia pretenzii, źviazanyja z vypłataj zarpłaty, a taksama niejkimi niedapracoŭkami. Adnym z apošnich była vymova, zroblenaja ŭ suviazi sa słabym kantrolem za chodam rekanstrukcyi kinastudyi. Jak jaje dyrektar, jon abaviazany zajmacca nie tolki vytvorčaściu, ale i sačyć za ŭsimi biahučymi spravami. Naprykład, kali rabočyja drenna pracujuć — padhaniać ich, rabić zaŭvahi. U nas ličycca tak: kali kiraŭnik nie patrabuje, niezdavalniajučy vynik — heta prablema nie tolki budaŭnika, ale najpierš i jaho ŭłasnaja, choć asabista ja liču, što jość akaličnaści, jakija pieraadolvać vielmi ciažka. Na hetaj rekanstrukcyi zaviazana šmat vykanaŭcaŭ, i jany taksama pavinny pracavać. Viadoma, usie my marym, kab da kanca 2015 hoda jana była zavieršanaja, jak płanavałasia, adnak pakul pra heta havaryć vielmi rana», — adznačyŭ pradstaŭnik Minkulta.
Jak rastłumačyli na kinastudyi, zamoŭcam rabot źjaŭlajecca AAT «Abjadnanaja dyrekcyja budaŭničych abjektaŭ» Ministerstva kultury. Pry hetym ciapier jana znachodzicca ŭ stadyi bankructva i rekanstrukcyja faktyčna nie viadziecca. Hienieralnym padradčykam vystupaje AAT «Budtrest №1».
Nahadajem, što z 26 śniežnia 2010 hoda, kali minuŭ termin kantrakta z Uładzimiram Zamiatalinym, kinastudyja pracavała biez hienieralnaha dyrektara. Novy kantrakt Ministerstva kultury Zamiatalinu nie prapanoŭvała.
Aleh Silvanovič byŭ pryznačany hienieralnym dyrektaram «Biełaruśfilma» prezidentam Alaksandram Łukašenkam 30 červienia 2011 hoda.
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu4
Kamientary