Navat pa prodažy rokierskija albomy ŭ hetym hodzie bjuć 75% «farmatnaj muzyki». Adnak u nastupnym hodzie «Rok‑karonu» davać budzie niama kamu.
Jeŭraradyjo zazirnuła ŭ śpis naminantaŭ «Albom hoda» «Rok‑karanacyi» i zaŭvažyła, što za hod rokiery vydali šmat muzyki. A voś pop‑muzyki, jakija zajmajuć 75% efiru, amal ničoha nie zdoleli. Amal usie mastadonty ajčynnaha roku majuć pa albomie: «Lapis Trubieckoj», «Niejra Dziubiel», NRM, «Krama», J:MOPS, «Krambambula», «Biez bileta». … Źmicier Vajciuškievič, jakoha pryniata nazyvać pieršym biełaruskim šansańje, taksama vydaŭ rokavy reliz «Liryka». Navat «Pieśniary» paśla šaścihadovaha maŭčańnia zapisali dysk.
U 75% muzyki uradžaj mienšy. Z sapraŭdnych zorak albomy tolki ŭ Alaksieja Chlastova, «Tiani‑Tołkaj», Atlantica, Pietra Jałfimava dy ŭ Iskui Abalan.
Viktar Paźniakoŭ, menedžer katałoha West records, paćviardžaje: rok‑relizaŭ łejbł vydaŭ bolš! Bolš za toje, na dumku ekśpierta, mienavita 75% farmat narabiŭ pop‑muzykam škodu — jany pierastali być zapatrabavanymi na dyskach.
«Rok‑albomy bolš zapatrabavanyja i bolš jakasnyja. Prychilnikam pop‑muzyki, vidać, dastatkova bačyć svaich kumiraŭ pa telebačańni i słuchać pa radyjo».
Amal u adzin hołas žurnalist Źmicier Padbiarezski i redaktar «Muzykalnoj haziety» Aleh Klimaŭ kažuć: takaja muzyčnaja pładavitaść rokieraŭ — nie bolš jak źbieh akaličnaściaŭ. Maŭlaŭ, pryjšoŭ čas i nazapasiŭsia materyjał.
Kinakrytyk Maksim Žbankoŭ, jaki sioleta patrapiŭ u žury «Rok‑karanacyi», plonnaść naohuł nazyvaje iluzijaj.
«Heta iluzija, što 2006 hod byŭ taki nijaki, a 2007 vydaŭsia ŭradžajnym. Ja nijakaha praryvu nie baču. Bo časy ŭ nas, jak kažuć, stabilnyja, i čakać ad ich niejkaha dadatkovaha impulsu dla muzykaŭ — daremna».
Bolš za toje, ekśpierty kažuć, što ŭ nastupnym hodzie słuchać budzie niama čaho. Bo ŭsio ŭžo vyjšła, tamu muzyki buduć adpačyvać.
Cikava, što pa słovach menedžera katałoha West records, nivodzin z samych pradavalnych muzykaŭ nie maje stałaha kantraktu z łejbłam chacia b na dva albomy.
Pa słovach Źmitra Padbiarezskaha, niekatoryja hurty byli vymušanyja vydać dysk u 2007‑m. Naprykład, NRM. I heta, na dumku krytyka, «im na karyść nie pajšło». Zrešty NRM ‑aŭski «06» Žbankoŭ nazvaŭ sprečnym. A Klimaŭ — absalutna prymalnym dla hurta. Bo niekalki chitoŭ z dyska abaviazkova ŭvojduć u «załaty fond» NRM:
«Inšaja sprava, što paśla maŭčańnia ad ich šmat chto čakaŭ bolšaha. A paradavali mianie «Žyhimont Vaza» i «Źmiaja». Heta albomy ŭ sučasnaj stylistycy — bolš ciažkija i rokavyja. Jość, kaniešnie, pytańnie jakaści — u jakich umovach pišucca našyja muzyki. Ale što tyčycca tekstaŭ, muzyki — tam u ich usio vydatna».
Źmicier Padbiarezski da maładych muzykaŭ pastaviŭsia bolš krytyčna. Zatoje niečakana uchvaliŭ pop‑zorak:
«Albomy Jałfimava, Siarhieja Kavalova, Volhi Płotnikavaj užo možna słuchać i adekvatna ŭsprymać. Našaja papsa za hety hod uzrasła ŭ płanie jakaści».
Adnahałosna Klimaŭ i Padbiarezski raskrytykavali ekśpierymientalnuju pracu samaha pładavitaha na albomy (jon vydaje ich štohod) muzyku Źmitra Vajciuškieviča. Nibyta, rok nie jahonaja niša. Adnak usio adno nazvali pracu jakasnaj i prapanavali čakajuć jaho reliza ŭ biahučym hodzie.
Darečy, Vajciuškievič zaraz pracuje nad albomam na vieršy polskaha paeta Rafała Vajačka. Jeŭraradyjo pacikaviłasia, ci nie ciažka vykanaŭcu tak časta vydavać albomy:
Vajciuškievič: «Ja akramia muzyki ničym nie zajmajusia. Heta dla mianie i duša, i prafiesija. Z kožnym hodam zadača ŭskładniajecca, i mnie vielmi cikava».
«Krambambula» ŭ minułym hodzie vydała i albom «Śviatočnaje», i Internet‑sinhł. Adnak Lavon Volski aburyŭsia, što relizy nie atrymali adpaviednaha vodhuku. Na što Maksim Žbankoŭ kaža, što naohuł nivodzin albom aproč «Morsaŭskich» nie mieŭ miedyjnaj raskrutki:
«Muzyčnaj presy my nie majem. Muzyčnaj razhornutaj supołki analitykaŭ taksama niama. Praduktaŭ šmat, ale pra toje, što jany jość, možna daviedacca, tolki pahladzieŭšy ŭ śpisy «Rok‑karaloŭ.»
Kali Jeŭraradyjo vyrašyła zazirnuć u śpis prodažaŭ biełaruskich dyskaŭ, apynułasia, što tolki «Tiani‑Tołkaj» mohuć ciahacca z rokierami. Liderami prodažaŭ stali rokiery J:MORS, «Biez bileta», jakich imkliva dahaniaje «Niejra Dziubiel».
Ciapier čytajuć
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka5
Kamientary