Ekśpiert: udzieł rasijskich vojskaŭ u minskim paradzie moža kaštavać miljony dalaraŭ
Sioleta ŭ minskim paradzie 9 maja, aproč biełaruskich vajskoŭcaŭ, voźmuć udzieł delehacyi z Rasii i ZŠA.
Amierykancy dasyłajuć tolki arkiestr vajenna-pavietranych siłaŭ u Jeŭropie, 40 čałaviek. Rasijski paradny «desant» bolš salidny.
«U stalicu Respubliki Biełaruś Ministerstva abarony Rasii nakiruje 636 vajskoŭcaŭ i 30 adzinak techniki. U składzie kałony braniatankavaj, aŭtamabilnaj i śpiecyjalnaj techniki prajeduć tanki T-90, bronietransparciory BTR-82A, bajavyja mašyny piachoty i desantu BMP-3 i BMD-2K-AU, bronieaŭtamabili «Tyhr», samachodnyja artyleryjskija ŭstanoŭki SAU 2S19 «Msta», a taksama zienitnyja rakietna-harmatnyja kompleksy «Pancyr», — paviedamili ŭ Ministerstvie abarony Rasijskaj Fiederacyi. Ad rasijskich VPS u paradzie voźmuć udzieł 15 samalotaŭ, u tym liku bambaviki-rakietanoscy Tu-22M3, Tu-95MS, źniščalniki Su-34 i vučebna-bajavyja Jak-130.
Uličvajučy, što ŭsiaho ŭ minskim paradzie voźmuć udzieł 5 tysiač vajskoŭcaŭ i 260 adzinak techniki, rasijski składnik vyhladaje vielmi značnym.
Čym abumoŭlenaja takaja aktyŭnaść Rasii ŭ vykarystańni svajoj techniki na zamiežnych paradach u hetym hodzie?
Adkazvaje vajskovy analityk, kiraŭnik prajekta Belarus Security Blog Andrej Paratnikaŭ.
Andrej Paratnikaŭ: Pa-pieršaje, usio ž jubilejnaja data. Druhaja suśvietnaja, jak i ŭ nas, u Rasii stanovicca chrybtom dziaržaŭnaj ideałohii. Z tym adroźnieńniem, što ŭ nas Hitlera pieramoh saviecki narod, a tam — ruski narod-pieramožca. Pa-druhoje, treba prademanstravać, što Rasija nie trapiła ŭ mižnarodnuju izalacyju. Na parady zaprašajuć jak minimum siabroŭ, a jak praviła — chaŭruśnikaŭ.
«Naša Niva»: Čamu mienavita taki nabor techniki dasyłaje Rasija ŭ Biełaruś dla ŭdziełu ŭ paradzie?
AP: Toje, što pieravaha addadzienaja nastupalnym uzbrajeńniam, pavinna demanstravać hatoŭnaść Kramla da aktyŭnych dziejańniaŭ.
Heta taki mesedž «ruskija nie zdajucca». I jaskravaja prajava nastrojaŭ, jakija panujuć u rasiejskich viarchach.
Na žal, nastroi hetyja susiedziaŭ Rasiei radavać nie mohuć: hradus impierska-šavinistyčnaj isteryi zaškalvaje.
«NN»: Kolki kaštuje takaja bujnamaštabnaja adpraŭka techniki ŭ Biełaruś? I chto niasie vydatki?
AP: Ja nie viedaju dakładnych ličbaŭ. Mahu tolki ŭpeŭniena kazać, što pieralot kožnaha bambavika Tu-95 — heta sotni tysiač dalaraŭ. Da takoj vysnovy možna pryjści, kali paraŭnać košt frachtu transpartnaha samalota paraŭnalnaj masy. Tamu ahułam udzieł rasiejskaha kantynhientu ŭ paradzie ŭ Minsku moža kaštavać miljony dalaraŭ. Biez uliku amartyzacyi techniki, zrazumieła.
I adbyvajecca heta, viadoma, za košt rasijskich piensijanieraŭ i chvorych na ankałohiju, dla jakich nie znajšłosia srodkaŭ u fiederalnym biudžecie na bolesucišalnyja srodki. Za košt Biełarusi — tolki raźmiaščeńnie i charčavańnie rasijskich vajskoŭcaŭ.
«NN»: Ci jość imaviernaść, što niejkija z ekzemplaraŭ hetaj techniki ŭ bližejšaj budučyni mohuć być atrymanyja Biełaruśsiu?
AP: My ŭžo atrymali Jak-130 i branieviki «Tyhr» pad nazvaj «Lis». Astatniaja technika, jakuju buduć demanstravać rasijanie, dla nas albo darahaja, albo staraja, albo niepatrebnaja. Na chaleru nam stratehičnyja bambaviki?
«NN»: Navošta Rasii ŭdzielničać u biełaruskim paradzie?
AP: Heta demanstracyja zony ŭpłyvu: «Tut russkij duch, tut Ruśju pachniet».
Ale heta demanstracyja nie dla Zachadu. Heta demanstracyja dla aficyjnaha Minska: kab nie zabyvalisia. I nie zahulalisia ŭ šmatviektarnaść.
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary