Adna z najstarejšych abutkovych fabryk Biełarusi — «Nioman» z Hrodna — apynułasia na miažy bankructva. Ekanamičny sud Hrodzienskaj vobłaści ŭžo raspačaŭ spravu ab finansavaj niepłaciežazdolnaści pradpryjemstva.
Fabryka pracuje z 1939 hoda i viadomaja najpierš vytvorčaściu dziciačaha abutku. Dla mnohich biełarusaŭ «Nioman» asacyjujecca z kłasičnymi dziciačymi sandalami, jakija vypuskalisia jašče z savieckich časoŭ.
Zajavu ŭ sud pradpryjemstva padało samastojna. Ciapier dla fabryki ŭviedzieny tak zvany achoŭny pieryjad — čas, kali śpiecyjalny kiraŭnik aceńvaje, ci možna adnavić płaciežazdolnaść i paźbiehnuć bankructva. Pakul hety pieryjad dziejničaje da 1 červienia.
Pavodle sudovych danych, praterminavanaja zapazyčanaść fabryki składaje bolš za 4,2 miljona rubloŭ. Ź ich kala 3,17 miljona — zapazyčanaści pierad kredytorami, jašče bolš za miljon — pazyki i kredyty.
Akramia hetaha, suprać pradpryjemstva adkryli 54 vykanaŭčyja vytvorčaści. Ahulnaja suma patrabavańniaŭ pa ich pieravyšaje 1,4 miljona rubloŭ, a taksama ŭklučaje daŭhi ŭ jeŭra i ŭkrainskich hryŭniach.
Pry hetym majomaść fabryki aceńvajecca prykładna ŭ 14,1 miljona rubloŭ. Značnuju častku składaje ŭžo hatovaja pradukcyja na składach. Adnak svabodnych hrošaj u pradpryjemstva zastałosia ŭsiaho kala 22 tysiač rubloŭ.
Dla «Niomana» ŭžo padrychtavali papiaredni płan sanacyi — finansavaha azdaraŭleńnia. Jašče raniej fabryka sprabavała samastojna stabilizavać situacyju: raspracoŭvała antykryzisnyja miery i chacieła źmienšyć daŭhavuju nahruzku za košt śpisańnia štrafaŭ i pieniaŭ, ale heta nie dapamahło.
Jašče ŭ 2022 hodzie fabryku pieradali pad kiravańnie kampanii «Biełviest». Tady płanavałasia madernizacyja i pavieličeńnie vytvorčaści. Adnak paźniej finansavyja ciažkaści ŭźnikli i ŭ samoha «Biełviesta», dzie ŭ 2026 hodzie taksama pačałasia pracedura sanacyi.
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary