Pradstaŭnik Minabarony raskrytykavaŭ «libieroidnuju tusoŭku» i «vulharnych materyjalistaŭ» za staŭleńnie da parada

Vybar času trenirovak vajennaha parada ŭ centry Minska ŭ 22.00 aptymalny i abumoŭleny mnohimi faktarami, zajaviŭ načalnik upraŭleńnia infarmacyi Ministerstva abarony Biełarusi pałkoŭnik Uładzimir Makaraŭ u artykule «Jašče raz pra simvały i canu parada vojskaŭ», što raźmiaščajecca na sajcie vajennaha viedamstva.

Pavialičyć

Hetaj publikacyjaj pradstaŭnik Minabarony pasprabavaŭ adkazać na abvinavačańni «libieroidaŭ usich maściej» u nieabhruntavanym marnatraŭstvie i krytykam načnych trenirovak, jakija prapanoŭvajuć abo naohuł nie pravodzić parad, abo pačynać treniroŭki paźniej.

«Kali treniroŭka parada pačynajecca ŭ 22.00, to pry pieršym prachodžańni vojskaŭ z poŭnym rytuałam praviadzieńnia parada pryblizna ŭ 22.10 hučyć dziaržaŭny himn i adnačasova dajecca artyleryjski salut. Adpaviedna, kali pačać treniroŭku a druhoj hadzinie nočy, to nie paźniej jak u 2.10 uvieś rajon pračniecca ad artyleryjskich załpaŭ. Cikava, jak adreahuje hramadskaść, kali pavodle patrabavańnia aŭtaraŭ «niezaležnych» ŚMI a treciaj hadzinie nočy žychary Minska buduć razbudžanyja hromam artyleryjskaha salutu?» — zadaŭsia pytańniem Makaraŭ.

Tym, chto prapanuje nie pravodzić parad, a razdać hrošy piensijanieram, jon adkazaŭ, što jany «byli i zastajucca vulharnymi materyjalistami, jakija sprabujuć vymierać tolki ŭ dołaravym ekvivalencie absalutna ŭsie — navat toje, što pavodle aznačeńnia nie vyličajecca». U jakaści prykładu Makaraŭ prapanavaŭ uspomnić parad 7 listapada 1941 hoda ŭ Maskvie «va ŭmovach amal dvuchrazovaj pieravahi praciŭnika». «Kolki kaštuje parad, kali ŭ Hienieralnym štabie Čyrvonaj armii ŭžo byli raspracavanyja płany abarony Sibiry i Irana? Kali pa ŭsich paramietrach nie toje što pieramahčy, a vyžyć niemahčyma», — zaznačyŭ jon i kanstatavaŭ, što «hety parad kaštavaŭ stolki, kolki kaštuje Pieramoha nad voraham čałaviectva». 

Sučasny vajenny parad, upeŭnieny Makaraŭ, «taki ž nieacenny, bo heta tytaničnaja padźvižnickaja praca tysiač ludziej, heta najvyšejšy maralny duch i adkaznaść sučasnaha pakaleńnia abaroncaŭ Radzimy, heta śviataja pamiać pra najvialikšy podźvih, heta demanstracyja hatoŭnaści nadziejna zabiaśpiečyć mir na našaj ziamli». «Zrazumieła, što tłumačyć libieroidnaj tusoŭcy, što aznačaje tezis «niemateryjalnaje kiruje śvietam», — sprava marnaja», — miarkuje jon.

• 0
• 0
• 0
• 0
• 0
• 0
• 0
• 0