Sa stvałavych kletak vyraścili mikraskapičnaje žyvoje serca
Kletki sami skłalisia ŭ žyvy miechanizm.
Daśledčyki Kalifarnijskaha ŭniviersiteta ŭ Bierkli (ZŠA) skłali sa stvałavych kletak miechanizm, što imituje skaračeńni sardečnaj ciahlicy. Pra mikraskapičnaje serca jany raspaviali ŭ časopisie Nature Communications.
Štučnaje serca maje dyjamietr usiaho paŭmilimietra. U im źmiaściłasia kamiera, jak u šłunačku sapraŭdnaha serca. I jak u sapraŭdnaha serca, u jaho nazirałasia niehatyŭnaja reakcyja na snatvornaje «Talidamid».
Praz chimičnyja sihnały navukoŭcy «skamandavali» stvałavym kletkam utvarać roznyja kletki serca, u tym liku kletki sardečnaj ciahlicy — kardyjamijacyty. Praz peŭny čas kletki pačali farmavać abjomnuju strukturu ź ciahličnaj tkankaj usiaredzinie i złučalnaj tkankaj zvonku.
Choć heta nie pieršaje «serca ŭ prabircy», jano ŭnikalnaje tym, što kletki adreahavali na sihnały, što pryviali da dyfierencyjacyi kletak — orhan «vyras samastojna», kletki sami zarhanizavalisia ŭ miechanizm.
«Naša madel — heta pieršy krok da pabudovy serca praz samaarhanizacyju kletak biez dapamohi źniešnich trochvymiarovych ryštavańniaŭ», — kaža kiraŭnik daśledčykaŭ Žen Ma. Ciapier meta navukoŭcaŭ — stvareńnie serca ŭžo nie ŭ minijatury, a ŭ maštabie 1:1.
Ale i «mikraserca» moža vykarystoŭvacca dla testaŭ lekaŭ. Pieršy test navukoŭcy ŭžo praviali: ad uviadzieńnia snatvornaha «Talidamid» u pracy serca pačalisia parušeńni, jaho raźvićcio parušyłasia (takoje snatvornaje nielha prymać ciažarnym, jano pryvodzić da parušeńniaŭ raźvićcia dziciaci).
Kamientary