«Haraš» z Kulinkovičam: trahikamiedyja pra šabanoŭskich aŭtaślesaraŭ
Premjera ŭvosień.
Na Youtube kanale biełaruskaj «čornaj trahikamiedyi» «HaraŠ» źjaviŭsia karotki tyzier filma. Zdymki i mantaž stužki zavieršanyja, premjera zapłanavanaja na vosień.
Film stvorany niezaležna ad dziaržaŭnych krynic finansavańnia, jon abyšoŭsia stvaralnikam va ŭsiaho piać tysiač dalaraŭ.
«Heta kino nie idealahičnaje, nie palityčnaje, ale pa-dobramu chulihanskaje i ekśpierymientalnaje. Jano pra nas — sučasnych biełarusaŭ. Takich, jakimi my jość na samoj spravie», — kaža režysior Andrej Kurejčyk.
Jak kaža Kurejčyk, film atrymaŭsia bolšym, čym płanavałasia, i vyjšaŭ za miežy sieryjalnych i sitkomaŭskich šabłonaŭ. Z kamiedyi vyrasła «prablemnaje, trahikamiedyjnaje, šmat u čym esteckaje kino».
Kamanda «Haraša» choča prademanstravać, što dla adradžeńnia nacyjanalnaha kiniematohrafu nie patrebnyja miljony dalaraŭ, z padatkaŭ hramadzian skiravanyja ŭ zamiežnuju ekanomiku, jak to stałasia z «Avielem».
«Saładzieńkaje, hłamurnaje kino i sieryjały vydatna robiać i biez nas rasiejcy i amierykancy, —miarkuje Kurejčyk. — A biełarusam para sumlenna pahladziecca ŭ lusterka i pašukać adkaz, što ž my heta za dziŭnaja nacyja takaja z savieckaj simvolikaj, saŭkovaj architekturaj, saŭkovym zakanadaŭstvam, kulturaj, estetykaj, humaram, «Dažynkami», ź niedabitaj nacyjanalnaj intelihiencyjaj i viečnym niavyrašanym vybaram: być častkaj «ruskaha śvietu» ci cyvilizavanaha jeŭrapiejskaha prastory».
Roli ŭ «Harašy» vykanali šerah muzykaŭ, u tym liku Alaksandr Kulinkovič, Juryj Navumaŭ (Neuro Dubel) i Jahor Zabiełaŭ («Hurzuf», «Jahor Zabiełaŭ Trya»), kinazorka Evielina Sakura i artysty biełaruskich teatraŭ.
U filmie prahučać pieśni jak Neuro Dubel, tak i inšych biełaruskich vykanaŭcaŭ. Aŭtary filma źbirajucca abvieścić konkurs dziela načynieńnia saŭndtreku jakasnaj ajčynnaj muzykaj.
Film chočuć pakazać na vialikich ekranach, ale moža atrymacca tolki ŭ internecie.
«Haraš» źbirajucca spačatku prademanstravać na zakrytych pakazach, zatym vypuścić dla maksimalna šyrokaj aŭdytoryi. Ci trapić jon u kinateatry i na TV, zaležyć ad staŭleńnia da tvoru ŭład, kažuć aŭtary. Jany ŭpeŭnienyja: film sabraŭ by dobruju «kasu», ale jamu takoj mahčymaści chutčej za ŭsio nie daduć.
-
Skančvajecca lehiendarnaja antyŭtopija pra ZŠA. Što čakać ad finału «Apoviedu słužanki»
-
Cenzura dabrałasia da filma «Pra što havorać mužčyny». Vyrazali Makareviča, «Bi-2», Adesu i hruzin
-
Paznajomciesia z The Beatles: režysior novych filmaŭ pra livierpulskuju čaćviorku pradstaviŭ vykanaŭcaŭ hałoŭnych rolaŭ
Kamientary