Žaleźničenka: «U vojsku zabaraniajuć čytać «Našu Nivu» i «ARCHE»

Sud Centralnaha rajonu Homiela pryznaŭ pravamiernym zahad rektara na paŭtornaje adličeńnie Žaleźničenki z Homielskaha dziaržaŭnaha ŭniversytetu imia F. Skaryny.

Sam Źmicier admovu sudu na adnaŭleńnie va ŭniversytecie kamentuje z humaram: “Mnie voś abiacali jafrejtara praz paŭhodzika dać (uśmichajecca). A ŭ hetym universytecie – čaho ja dabjusia? Piać hadoŭ – i ŭsio student. A ŭ vojsku praz hodzik mohuć navat małodšaha siaržanta prysvoić. Da staršyny možna dasłužycca. Bačycie, idzie vidavočny prahres. Nia toje, što va ŭniversytecie: atrymlivaješ dyplom – a kudy ź im iści? A ŭ vojsku Ministerstva abarony ŭsim zabiaśpiečvaje – i ježaj, i vopratkaj. I hrošy navat daje”.

Źmicier raskazvaje, što prablemy ŭ vojsku imkniecca pieraadolvać “pa miery ich pastupleńnia”. Niadaŭna zapatrabavali pisać tłumačeńnie z pryčyny admovy prymać prysiahu, pahražali taksama adkaznaściu za admovu čytać vajskovyja dakumenty na rasiejskaj movie: “Paprasili mianie napisać tłumačeńnie, čamu ja admaŭlajusia prymać vajskovuju prysiahu. Ja napisaŭ, što mianie niezakonna pryzvali ŭ vojska. Tamu ja nie źbirajusia prymać prysiahu i maju na heta prava ŭ adpaviednaści z zakanadaŭstvam. Ja zapytaŭsia: “Navošta tłumačeńnie?”. Mnie adkazali, što pavodle statutu ja nia maju prava biez prysiahi słužyć bolš jak paŭtara miesiaca. Ale ž u statucie napisana, što asabovy skład pryvodzicca da prysiahi praz paŭtara miesiaca. Jak ja razumieju, hetaja pracedura ładzicca dziela taho, kab dać mahčymaść sałdatu pryniać prysiahu. Kali ž abaviazvajuć abaviazkova davać klatvu, tady klatva hublaje ŭsialaki sens. Klatva – jana pavinna ad serca iści, a nie ad prymusu. Pahražali nastupstvami za toje, što ja admaŭlaŭsia dakumenty na rasiejskaj movie čytać”.

U volnuju časinu Žaleźničenka imkniecca čytać specyjalnuju litaraturu pa svajoj universyteckaj adukacyi, a taksama hazetu “Naša Niva” i časopis “ARCHE”. Ich časam pryvozić u vojska maci. Ale vajskovyja kamandziry zabaraniajuć čytać i “ARCHE”, i “Našu Nivu”:

“Pastajanna zabaraniajuć čytać “Našu Nivu” i “ARCHE”. Ja sprabavaŭ dakazać, što hazeta aficyjnaja i časopis aficyjny. Jany zarehistravanyja – i nichto nia maje prava zabaraniać ich čytać. Kažu: “Kali ŭ vas jość niejkija prablemy, kali niejki artykuł nie padabajecca, pišycie ŭ Ministerstva infarmacyi, niachaj jany pravodziać litaraturnuju ekspertyzu i začyniajuć vydańni. Tady jany nia buduć prychodzić da mianie. Na heta prosta hvałtam, nie zvažajučy na zakony, adkazvajuć: “Svajoj uładaj zabaraniaju hetuju hazetu čytać!”. Kankretna było, skazaŭ adzin: kali jašče raz pabaču – źnišču”, – raspavioŭ sałdat transpartnaj vajskovaj častki ŭ Žłobinie Źmicier Žaleźničenka.

• 0
• 0
• 0
• 0
• 0
• 0
• 0
• 0