Retraśpiektyva najlepšych tvoraŭ japonskaha kiniematohrafa XX stahodździa projdzie ŭ miežach XXII Minskaha mižnarodnaha kinafiestyvalu «Listapad».
Arhanizatary fiestyvalu vyrašyli źviarnuć uvahu na japonskaje kino ŭ suviazi z tym, što adnoj z samych viadomych japonskich kinakampanij «Siociku» sioleta spoŭniłasia 120 hadoŭ, paviedamili ŭ pres-centry «Listapada». Kampanija była zasnavanaja ŭ 1895 hodzie i z samaha pačatku zajmałasia pastanoŭkami tradycyjnaha teatra kabuki. Vytvorčaściu filmaŭ «Siociku» zajmajecca z 1920 hoda, zaraz taksama vypuskaje japonskuju multyplikacyju — anime.
Padrychtavać retraśpiektyŭnyja pakazy ŭ Minsku dapamahli pasolstva Japonii ŭ Biełarusi i Japonski fond pry sadziejničańni kampanii JTI. U prahramu ŭvajšli siem kinakarcin, siarod jakich «Idyjot» (1951) Akiry Kurasavy pavodle adnajmiennaha ramana Fiodara Dastajeŭskaha, «Historyja Chacika» (1987) Sejdzira Kajamy, «Krepaść ź piasku» Jositara Namury, «Žoŭtaja chustačka ščaścia» Jodzi Amady, «Takijskija pryciemki» Jasudzira Odzu, «Utamara i piać jaho žančyn» Kendzi Midzahuci i «Mnie pomsta i ja adpłaču» Siocheja Imamury. Razabracca ŭ japonskim kiniematohrafie minčanam dapamoža historyk u śfiery kino Makika Kamija.
«Važna adznačyć, što ŭsie filmy buduć demanstravacca vyklučna na kinastužcy 35 mm, to bok u ich pieršapačatkovaj jakaści, — zaznačaje dyrektar prahram ihravoha kino «Listapada» Ihar Sukmanaŭ. — Ubačyć kłasičnaje kino ŭ takim farmacie zaraz amal niedazvolnaja raskoša. Tamu heta amal što adziny šanc atrymać asałodu ad hienijalnych tvoraŭ minułaha, jakija maksimalna dakładna adpaviadajuć aŭtarskamu bačańniu».
Kinafiestyval «Listapad» projdzie 6—13 listapada pad słohanam «Zadavalnieńnie dla vačej». Filmam adkryćcia hetaha fiestyvalu stanie francuzskaja karcina «Dalina kachańnia» Hijoma Nikłu, roli ŭ jakoj vykanali Žerar Depardźjo i Izabel Jupier.
Forum zasnavany Ministerstvam kultury i Minharvykankamam pry sadziejničańni Biełteleradyjokampanii, kinastudyi «Biełaruśfilm» i Biełaruskaha sajuza kiniematahrafistaŭ. Arhanizataram fiestyvalu vystupaje Centr vizualnych i vykanaŭčych mastactvaŭ «ART Karparejšn».
-
Džoni Dep ekranizuje «Majstra i Marharytu» Bułhakava — rychtujecca pieršy anhłamoŭny film
-
Hetaje kino pryvodzić žančyn u zachapleńnie, a mužčyn — u šalenstva. U prakacie novy film z łaŭreatkaj «Oskara» Dženifier Łoŭrens
-
Mult pra hienacyd reptylij bahatymi žyviołami bje rekordy ŭ suśvietnym prakacie. Niekatoryja bačać aluziju na Paleścinu
Ciapier čytajuć
«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna10
Kamientary