Piać faktaŭ pra zatrymanaha sienatara-miljaniera Andreja Paŭłoŭskaha

Členy savieta respubliki pahadzilisia pazbavić niedatykalnaści svajho kalehu, sienatara Andreja Paŭłoŭskaha (zajmaje 26-je miesca ŭ rejtynhu samych upłyvovych i paśpiachovych biznesmienaŭ Biełarusi; 2-je miesca ŭ anałahičnym rejtynhu Hrodzienskaj vobłaści). Pavodle infarmacyi Tut.by, jon zatrymany supracoŭnikami KDB. Jaho nibyta padazrajuć u niaspłacie padatkaŭ.

«Naša Niva» sabrała piać faktaŭ z žyćcia bahatyra, jaki trapiŭ u niałasku.

Pavialičyć

Miedyk u miedycynskim biznesie

Maładość pinčuka Andreja Paŭłoŭskaha pryjšłasia na čas pieramienaŭ — razvał SSSR i niezaležnaść Biełarusi. Jon jakraz tolki skončyŭ Sankt-Pieciarburhskuju vajenna-miedycynskuju akademiju i, adsłužyŭšy ŭ vojsku, uładkavaŭsia starejšym łabarantam na kafiedru akušerstva i hiniekałohii Hrodzienskaha dziaržaŭnaha miedycynskaha ŭniviersiteta.

Zarpłaty ŭ śfiery achovy zdaroŭja byli mizernymi, i Paŭłoŭski vyrašyŭ nie siadzieć na miescy. Jak čałaviek, abaznany ŭ miedycynie, 25-hadovy pradprymalnik stvaryŭ kampaniju «Bijakom», jakaja zajmałasia aptovym handlem miedycynskimi preparatami.

Cikava, što i druhi hrodzienski miljanier, Valancin Bajko, taksama pryjšoŭ u biznes ź biudžetnaj śfiery — jon byŭ nastaŭnikam.

Aryjentacyja na sielskuju haspadarku

Nieŭzabavie Paŭłoŭski pieraaryjentavaŭ prodažy na sielskuju haspadarku, ale zachavaŭ «miedycynski» profil. «Bijakom Ahra» pradavaŭ vieterynarnyja preparaty, karmavyja dabaŭki i zaatechničny instrumient, uzhadvaŭ biznesoviec. Ź ciaham času kampanija stała adnym z najbujniejšych pastaŭščykoŭ na pradpryjemstvy Ministerstva sielskaj haspadarki.

Vytvorčaściu Paŭłoŭski zaniaŭsia ŭ kancy 2000-ch, kali pabudavaŭ niekalki zavodaŭ. Jon arhanizavaŭ stvareńnie zamianialnikaŭ celnaha małaka, vytvorčaść karmoŭ, a taksama dziciačaha charčavańnia.

Hrupa kampanij «Bijakom» razhortavałasia va ŭsioj Hrodzienščynie. Paŭłoŭski inviestavaŭ u małočnuju vytvorčaść, staŭšy akcyjanieram vaŭkavyskaha «Biełłakta», Ščučynskaha masłasyrzavoda i «Ahrakambinata «Skidzielski».

Dziaržava sprabavała paviesić na «Bijakom» stratnyja kałhasy, adnak Paŭłoŭski admaŭlaŭsia da apošniaha.

U tandemie ź Pieścisam

Doŭhija hady hrodzienskija ahraryi byli pradstaŭlenyja ŭ saviecie respubliki ŭ asobie Vitolda Pieścisa, niaźmiennaha (ažno z 1995 hoda!) rektara Hrodzienskaha dziaržaŭnaha ahrarnaha ŭniviersiteta. Jon zasiadaŭ u vierchniaj pałacie parłamienta z 2000 da 2012 hoda.

Apošnim časam jaho miesca zaniaŭ Paŭłoŭski. Biznesmien ličycca pradstaŭnikom ad Vaŭkavyskaha, Dziatłaŭskaha i Słonimskaha rajona.

Admietna, što Pieścis staŭ… jahonym pamočnikam. Inšy pamočnik – Alaksandr Vysocki, padnačaleny Paŭłoŭskaha ŭ «Bijakomie».

Kolki zarablaŭ Paŭłoŭski

Niekatoryja z kampanij, da jakich maje dačynieńnie biznesmien, majuć adkrytuju spravazdačnaść.

Naprykład, za pieršaje paŭhodździe 2015 hoda «Bijakom» mieŭ čysty prybytak pamieram $680 tysiač. Papiarednija hady byli dla Paŭłoŭskaha bolš paśpiachovyja. U 2014 hodzie «Bijakom» prynios jamu $10,5 miljona, za hod da taho — jašče $13 miljonaŭ.

Za hety ž čas «Ahrakambinat «Skidzielski», u jakim Paŭłoŭski mieŭ čverć akcyj, atrymaŭ čysty prybytak pamieram kala 4 miljonaŭ.

Padobna da spravy «Konsuła»?

Pavodle infarmacyi Tut.by, Paŭłoŭskaha padazrajuć u niaspłacie padatkaŭ. Padrabiaznaściaŭ spravy pakul niama, adnak

situacyja nahadvaje tuju, u jakoj apynułasia tydzień tamu kiraŭnictva bresckaj kampanii «Konsuł».

«Konsuł» zajmaŭsia pastaŭkami impartnych charčovych dabavak i abstalavańnia dla ahrapramysłovaha kompleksa (toj ža profil biznesu, što i ŭ Paŭłoŭskaha). «Vykarystoŭvajučy bolš za 40 padkantrolnych firmaŭ, arhanizatary vyvodzili za miažu valutu, uchilalisia ad vypłaty padatkaŭ i realizoŭvali pradukcyju kančatkovamu spažyŭcu z zavyšeńniem cenaŭ da troch razoŭ», — adrapartavała pres-słužba KDB.

Nahadajem, za apošnija paŭtara hoda niedatykalnaści pazbavilisia adrazu troje sienataraŭ-miljanieraŭ. Mahiloŭskaha biznesmiena Vitala Kastahorava abvinavacili ŭ niaspłacie padatkaŭ. Praź niekalki miesiacaŭ źniavoleńnia jon zapłaciŭ kala 350 tysiač jeŭra i vyjšaŭ pad padpisku ab niavyjedzie. Dyrektarka viciebskaj ptuškafabryki Hanna Šarejka padazrajecca ŭ złoŭžyvańni słužbovymi paŭnamoctvami. Pavodle viersii śledstva, jana zakuplała impartny kambikorm, a nie ajčynny.

• 0
• 0
• 0
• 0
• 0
• 0
• 0
• 0