Internaŭty rezka krytyčna pra Biełsat

Biełaruskamoŭnaje TV abaviazanaje być bolš starannym i pieradusim dastupnym, pišuć kamentatary adnadušna.

Apošnija naviny vakoł polskaha biełaruskamoŭnaha telekanału «Biełsat» vyklikali žyvyja dyskusii ŭ Internecie.

Prajšło ŭžo bolš za 100 dzion ad pačatku viaščańnia, a kanał usio jašče zastajecca niedastupnym dla telehledačoŭ u Biełarusi i viadzie minimalnaje internet-viaščańnie. Sajt Biełsatu pa napaŭnieńni i aperatyŭnaści ciahniecca daloka zzadu za bolšaściu sajtaŭ BiełNetu. Miž tym, sa słovaŭ dyrektarki Ahnieški Ramašeŭskaj, košt viaščańnia Biełsatu składaje miljon dalaraŭ štomiesiačna, — heta, badaj, bolš, čym kruhłahadavy biudžet usich niezaležnych ŚMI Biełarusi, hazetaŭ i internet-sajtaŭ, razam uziatych.

Hałoŭnym zakidam internaŭtam Biełsatu zastajecca niezrazumieły vybar spadarožnika: chiba što niekalki tysiač siemjaŭ majuć anteny, nastrojenyja na «Astru», miž tym Biełsat viaščaje mienavita na im.

«Paśla taho, jak pačaŭ viaščańnie na Biełaruś spadarožnikavy kanał Biełsat, hałoŭnaje pytańnie da jaho stvaralnikaŭ było takoje: čamu vy sa spadarožnika Astra, jaki ŭ Biełarusi hladziać adzinki, nie pierachodzicie na Syryjus, jaki hladziać dziasiatki tysiač? — piša ŭ svaim błohu na naviny.by publicyst Siarhiej Dubaviec. — Adkazam byli pasuły, maŭlaŭ, niekali piarojdziem. A sami sabie padumali: piarojdziem i atrymajem statystyku «pšyk». I čym tady apraŭdajem miljonnyja ŭkładańni ŭ kanał?» Publicyst papiaredžvaje: «adzinym apraŭdańniem [efektyŭnaści kanału] moža być rejtynh».

«U tym vyhladzie [u jakim kanał isnuje], na Astry asabliva, z hetkim vebsajtam - prabačcie, ale – heta ździeki ź idei. Kamu patrebien Istfront, ciažkaja muzyka na rodnaje movie, kali mo 20 tysiač čałaviek razam hladzić hety kanał?» — pytajecca Juraś u abmierkavańni na sajcie nn.by .

«Talerki, na jakich stajać pa try kanvertery (hałoŭki) na Amas, Chotbiord i Syryjus (a ich absalutnaja bolšaść), užo ničym nie dapoŭniš, ustanovačnaha miesca prosta niama! Na tym ža Syryjusie dy Chotbiordzie proćma svabodnych transponderaŭ», — daje techničnuju daviedku Rudy.

«Sensu ad kanału nijakaha. Tolki papieraciahvali narmalnych ludziej u Polšču», — z horyčču kidaje internaŭt Maks.

Pačakać prosić internaŭt Maźzi, — blizki da vydaŭcoŭ Biełsatu. «Sprava nia ŭ hrošach, hrošy na Syryjus jość. Tolki sprava ŭ varunkach damovy. Uładalnik spararožnika choča zabiaśpiečycca. Abviaščeńnie studzieńskaj daty było niepatrebnym. Siońnia pieramovy amal skončanyja. U hetym miesiacy buduć naviny. Kamu patrebnaje TB na rodnaj movie — nie atakujcie nas. Ludziam, siarod jakich masa entuzijastaŭ, jakija staranna pracujuć stvarajučy Biełsat, vielmi kryŭdna bačyć takuju reakcyju. My tolki naradzilisia, ŭ škołu pajšli, a Vy nas nahami».

Ran Brudas aburajecca: sprava nia ŭ hrošach, sprava ŭ staŭleńni da hledača. «Vy, napeŭna, viedajecie, kali pačaŭ choć niejak pracavać sajt. Adkazu na pytańni, dasłanyja na jaho, čakaju i dahetul. Pośpiechaŭ!»

Toje samaje piša Aleś Jurkaviec: «Sprava nia ŭ tym, što nia ŭsio ŭdajecca, a ŭ samim staŭleńni da hledača. Naabiacali šmat — praktyčna ničoha nia vykanali. Tranślacyju nie mahli naładzić adrazu — dyk choć by na sajcie niešta tłumačyli, a nie zmušali čutki źbirać. A roznyja parady nakont taho, što kali chočacie hladzieć, to idzicie i pieranastrojvajcie anteny na Astru, uvohule nie razumieju. Dla kaho hety kanał stvaraŭsia — dla apazycyjaneraŭ? Dla ŭžo daŭno sahitavanych? Chiba takija tolki i pojduć niešta rabić z antenaj, kab mieć mahčymaść hladzieć mienavita Biełsat. Prostyja ž ludzi mohuć pačać jaho hladzieć, tolki vypadkova natknuŭšysia i niečym zacikaviŭšysia. A dziela hetaha Biełsat musić być nie na marhinalnym dla Biełarusi, a na masavym spadarožniku, — piša internaŭt i zaklikaje z vadoj nia vyplesnuć dzicia. — Ja dumaju, eŭrapiejcy hrošy mieli davać nie na absłuhoŭvańnie patrebaŭ vuzkaha koła zaanhažavanych ludziej? Tady čamu ŭsio tak pa-durnomu robicca?

• 0
• 0
• 0
• 0
• 0
• 0
• 0
• 0