19 studzienia ŭ sudzie Frunzienskaha rajona Minska abvieščany prysud pa spravie ab najeździe na Minskaj kalcavoj aŭtadarozie ŭ žniŭni minułaha hoda na inśpiektara DAI, u vyniku čaho aficer atrymaŭ ciažkija traŭmy.
Jak paviedamiła pres-sakratar Minskaha haradskoha suda Nastaśsia Šylvian, małady minčuk pryznany vinavatym u parušeńni praviłaŭ darožnaha ruchu, što paciahnuła pa nieaściarožnaści pryčynieńnia ciažkaha cialesnaha paškodžańnia.
Na padstavie č. 2 art. 317 KK jamu pryznačana pakarańnie ŭ vyhladzie pazbaŭleńnia voli na dva hady šeść miesiacaŭ z adbyćciom pakarańnia ŭ papraŭčaj kałonii va ŭmovach pasialeńnia i pazbaŭleńniem prava zajmacca dziejnaściu, źviazanaj z kiravańniem transpartnymi srodkami, na piać hadoŭ.
Iskavyja patrabavańni paciarpiełaha ab spahnańni kampiensacyi maralnaj škody zadavoleny častkova i spahnanyja z abvinavačanaha ŭ pamiery 200 młn. rubloŭ. Ź jaho taksama spahnanaja dziaržpošlina ŭ dachod dziaržavy 630 tys. rubloŭ.
Prysud nie ŭstupiŭ u zakonnuju siłu i moža być abskardžany va ŭstanoŭlenym zakanadaŭstvam paradku na praciahu 10 dzion z dnia abviaščeńnia.
Nahadajem, 2 žniŭnia 2015 kala 10.40 na 38-m kiłamietry MKAD, u rajonie źjezdu na vulicu Cimirazieva, minčaninam 1991 hoda naradžeńnia, jaki kiravaŭ aŭtamašynaj «Opiel-Viektra», byŭ učynieny najezd na inśpiektara darožna-patrulnaj słužby adździeła DAI Frunzienskaha RUUS, jaki vykonvaŭ słužbovyja abaviazki pa harantavańni darožnaj biaśpieki. Supracoŭnika milicyi špitalizavali.
Kamientary