Haradskija aŭtobusy ŭ Minsku pastupova buduć pieravodzicca na hazavaje paliva, paviedamiŭ 20 studzienia na pres-kanfierencyi hienieralny dyrektar dziaržaŭnaha pradpryjemstva «Minsktrans» Lavoncij Papianok.
Pavodle jaho słoŭ, u stalicy z sakavika minułaha hoda ŭžo kursiruje 10 takich aŭtobusaŭ. «Jany pakazali, što mohuć pracavać i pry panižanych tempieraturach, pracavać ustojliva. Kali, jak abiacali pastaŭščyki, buduć taryfy ŭ dva razy nižejšyja za košt dyzielnaha paliva, to ekanomija składzie 47%», — adznačyŭ Papianok.
«My płanujem zakuplać jašče takija aŭtobusy, kali budzie dazvalać biudžet. My nie adydziem ad hetaha, praz paŭhoda, hod my pryjdziem da poŭnaj zamieny na hazavyja aŭtobusy», — ličyć hiendyrektar.
Jon taksama adznačyŭ, što ŭ hetym hodzie budzie praciahvacca praca pa abnaŭleńni ruchomaha sastavu. «Nami zaklučany dahavor z «Biełkamunmašam» na pastaŭku 33 sučlenienych tralejbusaŭ, taksama jość dahavor na pastaŭku 97 aŭtobusaŭ. Heta pakul pieršyja kroki, patreby bolšyja. Ale ŭ nas jość zapas tryvałaści, ja nie baču krytyčnaści ŭ hetym pytańni, budziem pracavać ustojliva i abjomy pieravozak budziem vykonvać», — zapeŭniŭ Papianok.
Jon paviedamiŭ, što na bałansie pradpryjemstva 1.463 aŭtobusy, 995 tralejbusaŭ i 138 tramvajaŭ.
«Možna stvaryć i bolšyja reziervy, ale heta budzie nie ekanomna. Treba dapaŭniać štat vadzicielaŭ, pavialičvać sabiekošt prajezdu. U hetym siońnia niama nieabchodnaści», — ličyć Papianok.
Sioleta taksama pačataja praca sa stvareńni tralejbusnych linij u mikrarajonie Kamiennaja Horka, praciahniecca rekanstrukcyja tramvajnych puciej, u pryvatnaści, na vulicy Čapajeva.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary