Pra imidž milicyi, internet-biesaŭščynu i narmalnych pacanoŭ — ministr unutranych spraŭ Ihar Šunievič
1 sakavika ŭ Nacyjanalnym pres-centry ŭ Minsku prajšła pres-kanfierencyja minstra unutranych spraŭ Ihara Šunieviča. Ministr pačaŭ jaje ź vinšavańniaŭ: spačatku jon pavinšavaŭ usich ź pieršym dniom viasny — pažartavaŭšy, što heta doŭhačakanaja padzieja dla našaj krainy — i pavinšavaŭ žančyn z 8 Sakavika.
Infarmacyjnaja vajna z MUS
Pačałasia pres-kanfierencyja z revieransa z boku dziaržaŭnych ŚMI. Žurnalist «Sovietskoj Biełoruśsii» pacikaviŭsia, ci nie nadta miakkaja ŭ nas milicyja:
«Apošnim časam pačaścilisia pravakacyi ŭ adras milicyi. U mianie składvajecca ŭražańnie, što vietlivaść milicyjantaŭ pamyłkova prymajuć za słabaść. Ci nie pryjšoŭ čas stanavicca bolš žorstkaj, kali milicyja sutykajecca ź jaŭnymi pravakacyjami, i što ŭvohule MUS płanuje supraćpastavić hetamu?»
Šunievič paviedamiŭ, što taki fienomien isnuje, a milicyja nie vyhladaje biezdapamožna, «choć niekatoryja ŚMI chočuć jaje takoj vystavić».
«Bolšaść ŚMI krytykuje kanstruktyŭna, ale častka, jakuju maje na ŭvazie karespandent, — heta nie što inšaje, jak infarmacyjnaja ataka na dziejnaść takoj struktury jak MUS», — skazaŭ Šunievič. —– Ja aceńvaju heta tak. Kali kazać jašče ščyrej, heta infarmacyjnaja vajna, jakaja viadziecca z MUS. Z usimi adpaviednymi nastupstvami».
Ale, zapeŭniŭ Šunievič, vajavać MUS ni z kim nie budzie, a budzie maksimalna prafiesijna vykonvać svaju pracu.
«Što tyčycca pravakacyj, to supracoŭnik MUS nie maje prava iści na pavadu svaich pačućciaŭ. Jon pavinien reahavać prafiesijna», — skazaŭ ministr.
Adkrytaje ministerstva
Žurnalisty partała Tut.by spytali ŭ ministra, čamu nichto z pradstaŭnikoŭ viedamstva nie staŭ abmiarkoŭvać z žurnalistami situacyju źbitaha supracoŭnikami AMAPa ŭ Frunzienskim sudzie Paŭła Dabravolskaha.
— Chto ličyć, što naša viedamstva zakrytaje? — pacikaviŭsia ministr u prysutnych. — Bačycie, ruki padniali dva čałavieki z 45 [Heta byli žurnalisty Tut.baj i «Našaj Nivy».]. Rabicie vysnovy. My nie zakrytaje ministerstva.
Nakont situacyi z Paŭłam Dabravolskim ministr zajaviŭ, što zaraz milicyja čakaje vyniki pravierki.
Pra zarobki ŭ milicyi
Žurnalisty pacikavilisia, ci padajuć zarobki ŭ milicyjantaŭ i ci buduć pavyšać im piensijny ŭzrost. Šunievič zapeŭniŭ, što zarobak u supracoŭnikaŭ MUS nie pamienšyŭsia i takoje nie płanujecca. «Kali pieraličyć na valutu, to mienš, nie sakret, my ŭ roŭnaj situacyi ź inšymi biudžetnikami. Ale nie dumaju, što materyjalny dastatak staviać milicyjanty napieradzie, kali aceńvajuć svaju pracu», — skazaŭ Ihar Šunievič.
Što tyčycca pavyšeńnia piensijnaha ŭzrostu, to, pa słovach ministra, u MUS da hetaha hatovyja. Šunievič zajaviŭ, što hety praces niepaźbiežny i hałoŭnaje, kab zachavałasia formuła piensijnaha zabieśpiačeńnia supracoŭnikaŭ MUS.
Pra pavodziny milicyi na akcyjach
Žurnalisty adznačyli, što raniej milicyja žorstka razhaniała ludziej na niesankcyjanavanych akcyjach, a ciapier takoha niama.
«Tut, nie budu spračacca, źmianiłasia i naša staŭleńnie, i rytoryka ahulnapalityčnaja. My znajšli prymalny z kropki hledžańnia ułady i mižnarodnaj supolnaści ałharytm našych dziejańniaŭ. My reahujem — składajem administratyŭnyja pratakoły», — adznačyŭ Šunievič.
Dziaržzakupki — kryminahiennaja śfiera
Ab prablemnych momantach u halinie dziaržzakupak Ihar Šunievič vykazaŭsia tak: «Hetaja śfiera kryminahiennaja va ŭsim śviecie. My nie vyklučeńnie, bo kala 90% dziaržzakupak u Biełarusi viadziecca pa niekankurentnaj pracedury,to bok zakupajuć z adnoj krynicy».
Dla prazrystaści pavinna być kankurencyja, adznačyŭ ministr.
Biesaŭščyna z dapamohaj internetu
Za apošnija piać hadoŭ kolkaść «ałkaholnych złačynstvaŭ» u Biełarusi skaraciłasia amal na 40% — z 27 tysiač da 17,5 tysiač, padkreśliŭ Šunievič. I MUS budzie imknucca abmiažoŭvać dastupnaść ałkaholu ŭ krainie.
«Bo ałkaholiki stanoviacca maładziejšyja, ciažar ałkahalizmu ŭzrastaje, vydatki dziaržavy na pieraadoleńnie nastupstvaŭ ałkahalizmu pavialičvajucca. Ale ŭ nas jość niekalki kozyraŭ», — zajaviŭ Ihar Šunievič.
Akramia taho, na jaho dumku, «admiena šerahu sankcyjnych mier u dačynieńni da ałkaholu» moža pryvieści da taho, što kolkaść «ałkaholnych złačynstvaŭ» znoŭ budzie pavialičvacca.
Ihar Šunievič zajaviŭ, što kateharyčna suprać internet-dastaŭki śpirtnych napojaŭ, jakuju ciapier łabirujuć u krainie niekatoryja handlovyja sietki.
«Dastaŭka — heta elemient biesaŭščyny, jakaja adbyvajecca z dapamohaj internetu», — upeŭnieny jon.
Dyscyplina i imidž milicyi
Ciapier idzie sud nad bujnymi raspaŭsiudnikami spajsaŭ. Siarod abvinavačvanych jość i supracoŭniki MUS. Ale ministr ustrymaŭsia ad kamientaraŭ.
«Dačakajemsia rašeńnia suda, tady budziem kamientavać i aceńvać. Ale prablema z unutranaj biaśpiekaj jość. Pracuje cełaja słužba, ja jak ministr nadaju vialikuju ŭvahu hetaj słužbie. Bo škoda, jakuju prynosić adzin złačynca ŭ pahonach, heta nie łyžka dziohciu, a ceły cebar», — skazaŭ Ihar Šunievič.
Taksama, padkreśliŭ jon, pytańni dyscypliny buduć razhladacca žorstka.
«Navat vyjšaŭ z cyharetaj u formie na vulicu — dyscyplinarnaje spahnańnie», — skazaŭ Šunievič.
Taksama Šunievič skazaŭ, što, kali infarmacyjnaja vajna budzie praciahvacca, to, mahčyma, pryjdziecca brać na pracu pijarščyka. Bo ministr pavinien kłapacicca pra imidž svajho ministerstva.
Viedajuć usich biełarusaŭ, jakija vajujuć va Ukrainie
Pa słovach Šunieviča, u MUS jość śpis asobaŭ, jakija vajujujuć na tym ci inšym baku va Ukrainie. Ahułam ich kala 140 čałaviek. Acenku ich dziejańniam budzie davać śledstva, padkreśliŭ ministr.
Narmalnyja pacany
Uźniali žurnalisty i prablemu bajkieraŭ, jakija parušajuć spakoj.
«Bajkiery — narmalnyja pacany, jany pryjazdžajuć na našyja śviaty, katajuć dziaciej. A tyja, chto hazuje pa načach, — heta, miakka kažučy, matacyklisty», — skazaŭ Ihar Šunievič.
Jon adznačyŭ, što milicyja maje zakonnyja sposaby baraćby z takimi «honščykami». Naprykład, supracoŭnik MUS moža «usamnicca» ŭ sieryjnym numary matacykła i pastavić jaho «na prykoł» dla ekśpiertyzy.
«Ja takoha supracoŭnika nie pakaraju, kali pabaču, što karyści ad jaho rašeńnia budzie bolš čym škody», — padkreśliŭ ministr.
Naprykancy Ihar Šunievič jašče raz nahadaŭ, što MUS — niezakrytaje ministerstva.
«My nie chanžy i niejkija tam ludzi ŭ šerych pinžakach», — skazaŭ Šunievič. I nie schłusiŭ — pinžak na im byŭ čorny.
Kamientary