Śledčyja nazvali dźvie asnoŭnyja viersii taho, što zdaryłasia ŭ škole ahraharadka Racičy Hrodzienskaha rajona. Viersija prymianieńnia atrutnych rečyvaŭ nie razhladajecca, zajaviŭ siońnia na pres-kanfierencyi načalnik upraŭleńnia Śledčaha kamiteta pa Hrodzienskaj vobłaści Iosif Lavonka.
Pravodzicca šerah ekśpiertyz — analizy kryvi, mačy paciarpiełych, uzoraŭ ich adzieńnia. Praviedzieny zamiery pavietra jak unutry škoły, tak i zvonku, pravodziacca inšyja ekśpiertyzy, pra vyniki jakich budzie viadoma ŭ najbližejšy čas. Adnak užo ciapier možna kazać, što viersija prymianieńnia atrutnych rečyvaŭ nie razhladajecca», — adznačyŭ Iosif Lavonka.
Pavodle adnoj z rabočych viersij, dzieciam stała drenna ad taho, što ŭ pamiaškańni było dušna. Dzieci stali skardzicca na drennaje samaadčuvańnie padčas liniejki, jakaja pravodziłasia na druhim paviersie staroha korpusa škoły. Budynak nie abstalavany sistemaj prymusovaj vientylacyi.
«Na momant ahladu miesca zdareńnia śledčymi tempieratura pavietra ŭ pamiaškańni składała kala plus 26 hradusaŭ. A da taho času vokny ŭ pamiaškańni byli adkrytyja, možna tolki zdahadvacca, jakoj była tempieratura padčas liniejki», — raspavioŭ Iosif Lavonka.
Akramia taho, padčas ahladu na voknach, padvakońnikach byli vyjaŭlenyja ślady sažy. U momant zdareńnia viecier dźmuŭ ad kacielni ŭ bok škoły, syroje nadvorje prybivała dym da ziamli. Tamu ŭ miežach kryminalnaj spravy budzie pravierana rabota kacielni, adpaviednaść prajektnaj dakumientacyi patrabavańniam biaśpieki. Zrešty, pieravyšeńnia maksimalna dapuščalnaj kancentracyi čadnaha hazu nie vyjaŭlena, choć jaho ŭtrymańnie ŭ pavietry było vyšej za minimalny paroh.
Nahadajem, 11 lutaha byli špitalizavany 42 vučni Racickaj siaredniaj škoły, papiaredni dyjahnaz hučyć jak «atručeńnie niajasnaj etyjałohii». Na praciahu dvuch nastupnych sutak usie paciarpiełyja byli vypisanyja z balnicy. Budynak škoły ŭ Racičach pakul pustuje — dzieci vučacca ŭ Sapockinie, za 7 kiłamietraŭ ad ahraharadka Racičy. Zaviedzienaja kryminalnaja sprava pa fakcie słužbovaj niadbajnaści.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
Kamientary