Kavieryn: U mianie raście dačka, i ja chacieŭ by, kab jana žyła, chutčej, u tym śviecie, jaki ŭjaŭlajuć sabie idealnym fieministki
Viadoŭca ranišniaha šou «Obyčnoje utro» Kanstancin Kavieryn u novym vypusku TOKu parazvažaŭ pra kulturu admieny i skandał vakoł Andreja Stryžaka, zhadaŭ ułasny dośvied hramadskaj krytyki, a taksama raskazaŭ, jak z hadami źmianiłasia jaho staŭleńnie da fieminizmu.
Nastaśsia Roŭda spytała ŭ Kavieryna, ci nie baicca jon sam kali-niebudź sutyknucca z chvalaj hramadskaha abureńnia, padobnaj da toj, ź jakoj paśla skandału z rassyłkaj dykpikaŭ sutyknuŭsia Andrej Stryžak.
U adkaz Kanstancin uzhadaŭ, što taki dośvied u jaho ŭžo byŭ — praz vykazvańnie pra biełaruskuju movu.
«Heta było niaprosta. Ja chaču skazać, što ja paŭdurak. Nu što, kali ty niešta zrabiŭ, navošta abaraniać? Ty napaskudziŭ i davaj abaraniać toje, što napaskudziŭ… Vyhladała b pa-durnomu. Nu, napaskudziŭ», — raskazaŭ Kavieryn.
Pavodle jaho, sama dumka, jakuju jon tady sprabavaŭ danieści, nie padajecca jamu zahannaj. Prablemu Kavieryn ciapier bačyć u tym, jak jaje sfarmulavaŭ.
«Jość sapraŭdy piedahohi-idyjoty, jakija prosta advaročvajuć ad čahości važnaha. Ale farmuloŭka tam, naprykład, niejkaja była typu: «Ja nienavidžu biełaruskuju movu». Nu navošta zachodzić z takoj farmuloŭkaj? Dla čaho? Voś ja i zasłužana atrymaŭ».
Roŭda pacikaviłasia, kali mienavita Kavieryn zrazumieŭ svaju pamyłku — adrazu paśla skandału ci ŭžo praz hady.
«Nie, tady ja byŭ bolš samaŭpeŭnienym. Tady — šaškaj nahała. Heta ŭžo potym, kali ŭsio zhładziłasia, ja sam z saboj niedzie abdumvaŭ heta, pieradumvaŭ. Paźniej».
Ciapier, pavodle Kanstancina, toj samaŭpeŭnienaści ŭ jaho niama. Pry hetym jon nie źviazvaje svoj stan z bojaźziu być «admienienym».
«Ja ciapier nie ŭpeŭnieny ŭ sabie. Ja ni ŭ čym nie ŭpeŭnieny, ja ŭsiaho bajusia. Pryčym heta nie nastupstva kultury admieny. Heta niejki ŭnutrany stan razhublenaści ŭ mianie ciapier. Tamu što ja mnohich rečaŭ vielmi nie razumieju: čamu voś tak adbyvajecca, jak adbyvajecca».
«Heta jak pytańnie z Krymam»
Paśla hetaha Roŭda viarnułasia da historyi Andreja Stryžaka i spytała ŭ Kavieryna, ci zasłužanaj była hramadskaja reakcyja na jaho ŭčynak.
«Ja nie mahu zrazumieć, dzie hetaja rysa prachodzić. To-bok ja nie mahu zrazumieć miežaŭ, — praciahnuŭ Kanstancin i prapanavaŭ zmadelavać situacyju:
— Dapuścim ja siońnia pryjazdžaju dadomu, napivajusia i adpraŭlaju tabie… Jakija varyjanty dziejańnia ŭ ciabie?»
Nasta adkazała, što nikoli nie atrymlivała takich fota, tamu nie viedaje, jak adreahavała b u takoj situacyi.
Kanstancin, u svaju čarhu, adznačyŭ, što taksama nie moža viedać, što adčuvaje žančyna, jakaja atrymlivaje niepažadanaje intymnaje fota:
«Ja nie viedaju nastupstvaŭ hetaha dykpika dla žančyn. Ja nie viedaju, jak siabie adčuvaje ŭ hety momant dziaŭčyna. Ja nie viedaju nastupstvaŭ hetaha dziejańnia Stryžaka dla jaje psichiki, dla ŭsiaho jaje dalejšaha žyćcia. Ja nie viedaju.
Śćviardžać, što: «Oj, biednaja dziaŭčynka, boža-boža, nikoli nie bačyła. Aj-jaj-jaj. Voś jašče caca, jana ž užo paŭnaletniaja», — ja nie mahu tak skazać, tamu što ja nie viedaju, što adčuvaje ŭ hety momant čałaviek».
Adnačasova viadoŭca «Obyčnoho utra» ličyć, što pamylicca moža kožny i adzin učynak nie zaŭsiody pavinien pryvodzić da poŭnaj admieny čałavieka.
«Ja cudoŭna razumieju, što kožny zdolny na pamyłku. Tryhieram moža vystupać što zaŭhodna: ałkahol, narkotyki, niejki emacyjny ŭsplosk, usio što chočaš. Nu, zakarcieła niešta takoje. I aŭtamatyčna admianiać čałavieka za heta? Mnie zdajecca, heta praźmierna».
Z druhoha boku, Kavieryn zaŭvažyŭ, što adsutnaść svoječasovaj reakcyi na peŭnyja ŭčynki taksama moža mieć nastupstvy. U jakaści prykładu jon zhadaŭ rasijska-hruzinskuju vajnu 2008 hoda.
«Kali b Pucin atrymaŭ pa ziapie jašče ŭ 2008 hodzie, to, moža być, usio było b pa-inšamu. Nu voś nie atrymaŭ, nie admianili, i my bačym nastupstvy ŭsiaho hetaha. To-bok kali heta nie spynić u zarodku, to nieviadoma, čym heta ŭsio taksama moža skončycca».
U vyniku svajo staŭleńnie da historyi Stryžaka Kavieryn sfarmulavaŭ tak:
«Škada mnie Stryžaka? Tak, škada. Pierajšoŭ jon miažu? Spraviadliva jon atrymaŭ? Tak, spraviadliva».
Pry hetym Kanstancin dapuściŭ, što navat u takoj situacyi nie kožnaje asabistaje pačućcio varta ahučvać publična.
«Znoŭ ža, moža być, nielha kazać, što mnie jaho škada. Prytrymaj svajo mierkavańnie pry sabie. Nie zaŭsiody treba kazać toje, jak ty adčuvaješ. Talerantnaść u tym i zaklučajecca, što ty možaš nienavidzieć niehraŭ, i jaŭrejaŭ, i ŁHBTK+, i hetak dalej. Ale ty nie možaš pra heta havaryć.
Śviataja prastata talerantnaści ŭ tym, što ty možaš adčuvać usio što zaŭhodna, ale ty nie pavinien hetaha ahučvać i vykazvać».
«Ja, napeŭna, schłušu, kali skažu, što cudoŭna razumieju, što takoje fieminizm»
Paśla hetaha Nasta spytała ŭ Kanstancina pra jaho staŭleńnie da fieminizmu.
«Vydatna, cudoŭna. Fieminizm — heta baraćba za pravy žančyn, tak? Cudoŭna», — adkazaŭ Kavieryn.
Pry hetym viadoŭca pryznaŭsia, što jaho ŭjaŭleńni pra fieminizm i rolu žančyn ź ciaham času istotna źmianilisia. Pavodle Kanstancina, raniej jon byŭ pierakanany navat u tym, što žančyny nie zdolnyja zdymać dobraje kino.
«Ja, napeŭna, schłušu, kali skažu, što cudoŭna razumieju, što takoje fieminizm. [Raniej], jašče da Maryny [Mientusavaj], ja byŭ pierakanany, što, naprykład, žančyna nie zdolnaja źniać dobraje kino. Nu, jość tam, umoŭna kažučy, Kira Muratava, Ahnieška Chołand. Heta takija vyklučeńni».
Padobnym čynam, pavodle Kavieryna, jon raniej tłumačyŭ i toje, čamu siarod nobieleŭskich łaŭreataŭ, viadomych mastakoŭ, navukoŭcaŭ i piśmieńnikaŭ značna bolš mužčyn.
«Ja byŭ pierakanany, što heta abumoŭlena intelektualnaj pieravahaj mužčyny nad žančynaj. Voś hetyja piačornyja pierakanańni ŭva mnie žyli», — zaŭvažyŭ Kavieryn.
Kanstancin pryznaŭ, što ŭ toj čas, kali ŭ jaho byli takija pohlady, jon navat nie zadumvaŭsia, ci mieli žančyny roŭnyja z mužčynami mahčymaści atrymać adukacyju, raźvivacca i realizoŭvać siabie.
«Ja hetych pytańniaŭ nie zadavaŭ. Navošta? Nu voś jany prosta horšyja — i ŭsio. Heta było ŭva mnie».
Padsumoŭvajučy, Kavieryn zaŭvažyŭ:
«Biezumoŭna, majo mierkavańnie źmianiłasia. Akramia taho, u mianie raście dačka, i ja chacieŭ by, kab jana žyła chutčej u tym śviecie, jaki ŭjaŭlajuć sabie idealnym fieministki, čym u tym śviecie, jaki ŭjaŭlaje sabie idealnym [rasijski pradprymalnik i skandalny prychilnik abmiežavańnia pravoŭ žančyn] Hierman Ścierlihaŭ».
Šoŭmen Kanstancin Kavieryn: Pryčyny majoj ahidy da biełaruskaj movy — vykładčyki i kniha pa historyi Biełarusi za piaty kłas
aŭ režymu Łukašenki»: Kavieryn raskazaŭ, čamu staŭ takim radykalnym
Kanstancin Kavieryn raskazaŭ, jak na radyjo jamu prydumali psieŭdanim i jakoje jaho sapraŭdnaje proźvišča
«Ja tudy nie viarnusia nikoli»: Kavieryn pra Biełaruś
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary
Bołtaj, bołtaj Kostik...))
zdajecca,heta niejak inakš nazyvajecca.. kryvadušša i t.p.
dyk hetyja pierakanańni padzialaje pieravažnaja bolšaść kamientataraŭ-t.zv. mužčyn i takija ž ich aktyŭna łajkajuć