Ministerstva abarony źbirajecca ŭvieści abmiežavańni na pajezdki va Ŭkrainu aficeraŭ i hramadzianskich vajskoŭcaŭ, jakija majuć dostup da vajennych sakretaŭ. Abmiežavańni planujecca ŭvieści ŭ suviazi z praktyčna vyrašanym pytańniem ustupleńnia Ŭkrainy ŭ blok NATO, što aŭtamatyčna adnosić jaje da liku patencyjnych praciŭnikaŭ Biełarusi.
Niahladziačy na toje, što Ŭkraina na apošnim samicie NATO nie atrymała zaprašeńnia dałučycca da planu dziejańniaŭ pa siabroŭstvie ŭ NATO, bolšaść ekspertaŭ schilajecca da mierkavańnia, što Ŭkraina budzie dałučanaja da planu nie paźniej za 2009 hod.
Vyhladaje, hetaha ž punktu pohladu prytrymlivajucca j eksperty Ministerstva abarony Biełarusi, dzie pačali dumać pra toje, kab abmiežavać pajezdki aficeraŭ i hramadzianskich vajskoŭcaŭ, jakija majuć dostup da sakretaŭ. Havorka, viadoma ž, idzie nie pra poŭnuju zabaronu pajezdak, a pra standartnuju praceduru, jakaja dziejničaje ŭ tych vypadkach, kali aficery abo hramadzianskija słužboŭcy, jakija majuć dostup da sakretaŭ, źbirajucca vyjechać (naprykład, na adpačynak) u krainy — udzielniki NATO.
Hetaja pracedura praduhledžvaje, što kali chtości z hrupy asob, jakija padpadajuć pad abmiežavańni, zachoča pajechać, da prykładu, u Baŭharyju, jon musić napisać zajavu z prośbaj dazvolić jamu hetuju pajezdku. Paśla hetaha zapuskajecca standartnaja pracedura pravierki zajaŭnika z udziełam upraŭleńnia vajennaj kontravyviedki KDB. Kali ničoha padazronaha nie vyjaŭlajecca, dazvoł na vyjezd dajecca.
Ale šmat kamu nie padabajecca padviarhacca praviercy kožny raz, kali źbiraješsia pajechać ź siamioj na adpačynak. Z hetaj pryčyny mnohija aficery addavali pieravahu adpačynku va Ŭkrainie. Ciapier sytuacyja moža źmianicca.
Pakul ža ŭ minabaronie papiaredzili vajskoŭcaŭ, jakija majuć dostup da sakretaŭ, što kali jany źbirajucca pajechać hetym letam va Ŭkrainu, jany musiać padać rapart ci zajavu. Heta nieabchodna, kab ministerstva mahło acanić patencyjnuju niebiaśpieku ŭciečki sakretnaj infarmacyi. Aproč taho, nośbitaŭ sakretaŭ užo papiaredzili, što, mahčyma, da pačatku sezonu vakacyj budzie zapuščanaja poŭnaja pracedura pravierki tych, chto vyjaždžaje va Ŭkrainu.
Džon Koŭł pryjedzie ŭ Biełaruś 15 vieraśnia. Łukašenka, adnak papiaredziŭ: «vialikaj ździełki» nie budzie10
Kamientary