Rasii nie ŭdałasia sproba ŭpieršyniu za 8 hadoŭ zapuścić hipierhukavuju rakietu «Avanhard»
Rasija adkłała zapłanavany vyprabavalny zapusk najnoŭšaj hipierhukavoj rakiety «Avanhard». Hetaja zbroja ŭvachodzić u lik šaści vidaŭ tak zvanaha «cuda-zbroi», pra stvareńnie jakich Uładzimir Pucin zajaviŭ u 2018 hodzie, piša The Moscow Times.
Pavodle adkrytych źviestak, vyprabavańnie płanavałasia pravieści 3—5 vieraśnia na palihonie Dambroŭski ŭ Arenburhskaj vobłaści. Mienavita tam raźmieščanaja adzinaja dyvizija Rakietnych vojskaŭ stratehičnaha pryznačeńnia, uzbrojenaja «Avanhardami».
Na zapłanavanyja daty rasijskija ŭłady vypuścili avijacyjnyja paviedamleńni NOTAM, jakija zakryvali dla palotaŭ niebiaśpiečnyja rajony. U rajonie Dambroŭskaha abmiežavańnie achoplivała zonu rakietnych šachtaŭ z «Avanhardami». Taksama byli zakrytyja ŭčastki ŭ Ciumienskaj vobłaści i Chanty-Mansijskaj aŭtanomnaj akruzie, dzie mierkavałasia padzieńnie častak rakiety. Akramia taho, abmiežavańni ŭviali ŭ rajonie palihona Kura na Kamčatcy, kudy pavinien byŭ pryziamlicca bajavy błok rakiety paśla palotu.
Miascovyja ŭłady taksama papiaredžvali žycharoŭ niekalkich rajonaŭ Ciumienskaj vobłaści pra budučaje vyprabavańnie. Asnoŭnaj dataj zapusku nazyvałasia 3 vieraśnia, reziervovaj — 4 vieraśnia.
Adnak zapusk mižkantynientalnaj balistyčnaj rakiety UR-100N UTTCH z hipierhukavym płanavalnym błokam «Avanhard» tak i nie adbyŭsia.
Staršy navukovy supracoŭnik Instytuta AAN pa daśledavańni prablem razzbrajeńnia Pavieł Podźvih ličyć, što zapusk, chutčej za ŭsio, nie byŭ niaŭdałym, jon mienavita byŭ admienieny. Kali b rakieta paśpiachova startavała, rasijskija ŭłady, vierahodna, zrabili b pra heta publičnuju zajavu, bo «Avanhard» maje vialikaje simvaličnaje značeńnie dla rasijskich uzbrojenych sił. Kali b adbyŭsia niaŭdały zapusk, NOTAM, na dumku ekśpierta, pavinny byli b chutka admianić, ale hetaha nie adbyłosia.
Pa słovach Podźviha, Rasija, vidać, płanavała zapuścić «Avanhard» z Dambroŭskaha palihona ŭ bok Kamčatki, ale pa nieviadomaj pryčynie była vymušanaja adkłaści vyprabavańnie. Jon miarkuje, što ŭ najbližejšy čas moža adbycca novaja sproba zapusku.
Apošni paśpiachovy zapusk «Avanharda» adbyŭsia ŭ śniežni 2018 hoda. Uładzimir Pucin tady śćviardžaŭ, što hetaja rakieta «nie maje anałahaŭ u śviecie» i źjaŭlajecca nieparažalnaj dla sistem supraćrakietnaj abarony. Pavodle jaho słoŭ, padčas palotu błok nahravajecca da tempieratury kala 3000 hradusaŭ, ale pry hetym zachoŭvaje mahčymaść atrymlivać sihnały kiravańnia.
Były kiraŭnik «Raskosmasu» Juryj Barysaŭ zajaŭlaŭ, što «Avanhard» zdolny raźvivać chutkaść da 27 machaŭ. Adnak ekśpierty adznačajuć, što niekatoryja zajaŭlenyja rasijskim kiraŭnictvam charaktarystyki vyklikajuć sumnievy z punktu hledžańnia fiziki.
Pry hetym, pavodle acenki ekśpiertaŭ SIPRI, «Avanhard» sapraŭdy isnuje i znachodzicca na ŭzbrajeńni Rasii. U adroźnieńnie ad niekatorych inšych rasiejskich prajektaŭ, naprykład «cuda-tarpiedy» «Pasiejdon» abo rakiety ź jadziernym ruchavikom «Buravieśnik», jakija sutykalisia z prablemami padčas vyprabavańniaŭ, isnavańnie «Avanharda» paćviardžajecca dastupnymi źviestkami.
Pavodle SIPRI, na pačatak 2026 hoda Rasieja mieła na ŭzbrajeńni 12 kompleksaŭ «Avanhard». Zajaŭlenaja dalokaść ich dziejańnia składaje da 10 tysiač kiłamietraŭ, a kožny ź ich abstalavany adnoj bojehałoŭkaj.
Ciapier čytajuć
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram16
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary