Daŭni tenisny partnior Alaksandra Łukašenki Siarhiej Ciacieryn i były jaho pamočnik pa sporcie Ihar Zaičkoŭ, jakija skandalna pakinuli svaje pasady ŭ 2012 hodzie paśla niaŭdałaha vystupleńnia biełaruskich spartsmienaŭ na letnich Alimpijskich hulniach u Łondanie, ciapier aktyŭna zajmajucca biznesam. Pryčym, jak raspaviali krynicy TUT.BY, zachodziać u tyja siektary, kudy pačatkoŭcam biez suviaziaŭ i znajomstvaŭ vielmi składana prabicca.
Siarhiej Ciacieryn źjaŭlajecca dyrektaram kampanii «BiełHłobałStart», a jahony namieśnik — Ihar Zaičkoŭ. Pačatak biznesu byŭ zakładzieny ŭ 2013 hodzie.
Praz hod «BiełHłobałStart» staŭ hałaŭnoj arhanizacyjaj chołdynhu, jaki abjadnaŭ pad svaim kiravańniem niekalki kampanij, jakija zajmajucca roznaj dziejnaściu: «BiełHłobałStar», «BiełHłobałHarant» i «BiełHłobałTon».
«BiełHłobałTon» zajmajecca aptova-roźničnym prodažam mebli i pradmietaŭ interjeru. Jon impartuje svaju pradukcyju va ŭłasnyja šoŭ-rumy naŭprost z fabryk-vytvorcaŭ raźmieščanych u Danii, Italii, Kitai.
«BiełHłobałStar» kiruje sietkaj kinabaraŭ «Blockbuster», raźmieščanych u viadučych kinateatrach Minska, a taksama ŭ Mahilovie i Horkach, heta vynikaje sa staronki ŭstanovy ŭ sacsietkach.
Adnym z top-meniedžaraŭ «BiełHłobałStara» źjaŭlajecca dačka Ciacieryna Taćciana. «Jana tam haspadynia», — kaža znajomy biznesmiena.
«BiełHłobałHarant» pastaŭlaje na biełaruski rynak niekatoryja pradukty charčavańnia i tavary narodnaha spažyvańnia (čaj, kavu, sneki, kansiervy, kandytarskija vyraby i h.d.).
U 2015 hodzie kampanija ŭvajšła ŭ śpis śpiecimparcioraŭ ałkaholnaj pradukcyi. Ciacieryn atrymaŭ prava na pastaŭki vin, viermutu, kańjaku i viski z-za miažy.
Jašče adzin napramak dziejnaści — heta prodaž karmoŭ dla žyviołahadoŭli.
«BiełHłobałStart» taksama źjaŭlajecca pastaŭščykom spartyŭnaha charčavańnia.
«Nieabchodnaść prymianieńnia śpiecyjalnaha spartyŭnaha charčavańnia siońnia ŭžo nie vyklikaje sumnievu i źjaŭlajecca zakonnaj alternatyvaj dopinhu jak dla spartsmienaŭ-prafiesijanałaŭ, tak i dla amataraŭ zdarovaha ładu žyćcia. Ich užyvajuć ŭžo daŭno i paśpiachova», skazana na sajcie kampanii.
U rekłamnym moduli, raźmieščanym u niekatorych biełaruskich ŚMI, u skład chołdynhu «BiełHłobałStart» ŭklučana kampanija «BiełPakSnab». Infarmacyi pra jaje z adkrytych krynic — minimum.
Letaś na pakistanskich internet-resursach prajšła infarmacyja pra toje, što kampanija z takoj nazvaj płanavała zajmacca pastaŭkami biełaruskich traktaroŭ u Pakistan, ale patrapiła ŭ skandał, źviazny nibyta z machinacyjami z adkryćciom bankaŭskaha rachunku i podpisami na dakumientach. Nieŭzabavie inšy resurs,The Express Tribune, vypuściŭ materyjał pra toje, što biełaruskich biznesmienaŭ, jakija hatovyja pryvieźci ŭ krainu nieabchodnyja technałohii i inviestycyi, niespraviadliva abvinavačvajuć i ŭciskajuć u Pakistanie. U vyniku biełarusy anulavali pahadnieńnie z hramadzianinam Pakistana praź nievykanańnie im uziatych na siabie abaviazacielstvaŭ.
Niekalki biźniesmienaŭ paćvierdzili TUT.BY, što ŭsiu dziejnaść «BiełHłobałStarta» kuryruje Siarhiej Ciacieryn. «Jon sabraŭ kamandu, stvaryŭ niekalki zrazumiełych jamu biznesaŭ, vykarystoŭvajučy napracavanyja suviazi i mahčymaści», — havoryć minski pradprymalnik. Pry hetym jon skazaŭ, što «Ciacieryn moža być źviazany ź jašče niekalkimi biznesami».
***
Siarhiej Ciacieryn u saviecki čas damohsia peŭnych pośpiechaŭ u maładziožnym tenisie, byŭ kapitanam mužčynskaj zbornaj Biełarusi, jakaja z dapamohaj Maksima Mirnaha i Uładzimira Vałčkova prabivałasia ŭ paŭfinał Kubka Devisa.
Ciacieryn zachapiŭ Alaksandra Łukašenku tenisam, z časam staŭ adnym z samych blizkich da Łukašenki ludziej. Ciapier jaho časta možna ŭbačyć u składzie prezidenckaha puła na niefarmalnych mierapryjemstvach.
Ciacieryn zajmaŭ adkaznyja pasady ŭ spartyŭnaj halinie. Jon byŭ pieršym namieśnikam ministra sportu i turyzmu, pamočnikam prezidenta, dyrektaram alimpijskaha spartkompleksu «Raŭbičy», dyrektaram Respublikanskaha centra alimpijskaj padrychtoŭki pa tenisie, vice-prezidentam Nacyjanalnaha alimpijskaha kamiteta.
Ciapier člen kamandy Łukašenki zajmaje kresła namieśnika staršyni Biełaruskaj tenisnaj fiederacyi i ŭznačalvaje Biełaruski łyžny sajuz. «Jon u tenisie viasielny hienierał. Tam usim zahadvaje [Alaksandr] Šakucin», — kaža krynica ŭ spartovaj halinie.
Ciapier čytajuć
Daśledčyki znajšli miesca ŭ Biełarusi, dzie bazujecca «Arešnik»4
Daśledčyki znajšli miesca ŭ Biełarusi, dzie bazujecca «Arešnik»
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał33
Kamientary