Futbolny kłub BATE ŭ vieršavanaj formie adkazaŭ na prapanovy ab vykarystańni biełaruskaj movy. Zapyt dasłaŭ Ihar Słučak, arhanizatar kampanii «Spravavodstva pa-biełarusku». Jamu adkazaŭ hienieralny sakratar BATE Andrej Vaškievič.
* * *
Šanoŭny Ihar!
U pieršuju čarhu,
Vialiki dziakuj Vam za vinšavanni!
Zimovuju markotu i tuhu
My hnali ad siabie padčas čakańnia
Siezona novaha. Narešcie, voś i jon
Pahrukaŭsia i ŭ našaje akienca!
I kłub naš — šmatrazovy čempijon —
Užo adčyniŭ svajoj»Areny» siency.
I Vaš zvarot — viasnovaja prykmieta —
Pryjšoŭ da nas užo ŭ čaćviorty raz.
Kaniešnie, my ŭdziačnyja za heta
I pišam Vam čarhovy naš adkaz.
Nad užyvańniem rodnaj movy našaj
My ŭsie ŭ BATE pracujem kožny dzień
Starajecca i Vaładźko naš Saša,
Starajecca i Lichtarovič-Dzied.
U Dudzincy — tolki «ranica», nie «utro».
U Dudzincy nie «arbuz» jaki — «kavun»!
I chutka skaža «Smačna jesci!»Dubra,
I «Dziakuju!» adkaža naš Miłun.
Nie ŭsio tak prosta, ale nie sumujem,
I spadziajemsia, budzie tolki lepš.
My movaj karystajemsia, pracujem,
Pakul nie idealna, nie, ale ž…
Na formie mova ŭ Lizie čempijonaŭ,
U sacsietkach našych mova čaściakom.
Prafiesar naš, Vitalka Radzivonaŭ, —
Jon movy pravadyr u kožny dom.
Naš ščyry dziakuj Vam za prapanovy,
Ich budziem usiebakova razhladać.
Barysaŭščyna — kraj narodnaj movy,
Jaje tut prahnuć ludzi źbierahać.
Naprykancy žadajem vam zdaroŭja —
Jaho ž ani kupić, ni namianiać
(Vy ž razumiejecie: kali ŭžo Devid Boŭi…
Dyk što tady jašče pra nas kazać?).
Žadajem miru blizkim, ščaścia ŭ chatu,
U harbacie cukru, u hamancy — łave!
Nastupnym hodam Vaš čakajem piaty
Zvarot da kłuba.
Ščyra Vaš, A.V.
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Kamientary