Футбольны клуб БАТЭ ў вершаванай форме адказаў на прапановы аб выкарыстанні беларускай мовы. Запыт даслаў Ігар Случак, арганізатар кампаніі «Справаводства па-беларуску». Яму адказаў генеральны сакратар БАТЭ Андрэй Вашкевіч.
* * *
Шаноўны Iгар!
У першую чаргу,
Вялiкi дзякуй Вам за вiншаваннi!
Зiмовую маркоту і тугу
Мы гналi ад сябе падчас чакання
Сезона новага. Нарэшце, вось i ён
Пагрукаўся i ў нашае акенца!
I клуб наш — шматразовы чэмпiён —
Ужо адчынiў сваёй»Арэны» сенцы.
I Ваш зварот — вясновая прыкмета —
Прыйшоў да нас ужо ў чацвёрты раз.
Канешне, мы ўдзячныя за гэта
I пiшам Вам чарговы наш адказ.
Над ужываннем роднай мовы нашай
Мы ўсе ў БАТЭ працуем кожны дзень
Стараецца i Валадзько наш Саша,
Стараецца i Лiхтаровiч-Дзед.
У Дудзiнцы — толькi «ранiца», не «утро».
У Дудзiнцы не «арбуз» якi — «кавун»!
I хутка скажа «Смачна есцi!»Дубра,
I «Дзякую!» адкажа наш Мiлун.
Не ўсё так проста, але не сумуем,
I спадзяемся, будзе толькi лепш.
Мы мовай карыстаемся, працуем,
Пакуль не iдэальна, не, але ж…
На форме мова ў Лiзе чэмпiёнаў,
У сацсетках нашых мова часцяком.
Прафесар наш, Вiталька Радзiвонаў, —
Ён мовы правадыр у кожны дом.
Наш шчыры дзякуй Вам за прапановы,
Iх будзем усебакова разглядаць.
Барысаўшчына — край народнай мовы,
Яе тут прагнуць людзi зберагаць.
Напрыканцы жадаем вам здароўя —
Яго ж анi купiць, нi намяняць
(Вы ж разумееце: калi ўжо Дэвiд Боўi…
Дык што тады яшчэ пра нас казаць?).
Жадаем мiру блiзкiм, шчасця ў хату,
У гарбаце цукру, у гаманцы — лавэ!
Наступным годам Ваш чакаем пяты
Зварот да клуба.
Шчыра Ваш, А.В.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч15
Каментары