Viadučy prahramy «Kontury» na ANT padpracoŭvaje na rasijskim telekanale

«Tvar telekanała» ANT Illa Kołasaŭ rehularna ahladaje palityčnyja padziei ŭ Biełarusi dla rasijskaha telekanału RTVI, jaki, darečy, krytykuje dziejnuju ŭładu susiedniaj krainy.

Pa biełaruskich zakonach pracavać na zamiežnyja ŚMI možna tolki z adpaviednaj akredytacyjaj Ministerstva zamiežnych spraŭ. Toje, što heta rasijskaje ŚMI, nie maje značeńnia.

«Dla supracoŭnictvam z rasijskimi ŚMI taksama patrebnaja akredytacyja, jak i ź lubymi inšymi zamiežnymi ŚMI, — kamientujuć Jeŭraradyjo ŭ pres-słužbie MZS. — Nie zvažajučy na sajuznuju dziaržavu. Navat dla razavych materyjałaŭ jana patrebnaja».

Bolš za toje! Pa zakonie žurnalist, jaki maje akredytacyju na terytoryi Biełarusi ad zamiežnaha miedyja, nie maje prava pracavać žurnalistam na inšyja ŚMI.

Adpaviedna, navat kali ŭ Illi Kołasava jość akredytacyja ad RTVI, to jon nie maje prava pracavać… na ANT. Ale heta adbyvajecca, a značyć, viadučy «Konturaŭ» mahčyma parušaje zakon.

«Ja nie vyklučaju, što heta niejkija archiŭnyja materyjały, — ździŭlajecca pytańniu Jeŭraradyjo dyrektar dyrekcyi infarmacyjnaha viaščańnia telekanała ANT Rusłan Paddubski. — Kali vy viedajecie, to papiaredniaje miesca pracy ŭ jaho było na hetym kanale (RTVI). Jon uznačalvaŭ karpunkt u Bierlinie. Ale ciapier u jaho nijakich štatnych adnosinaŭ tam niama, jon pracuje ŭ nas. Dumaju, što ŭ tych siužetach, pra jakija vy kažacie, jaho vykarystoŭvali, jak ekśpiertnaje mierkavańnie, i razmova nie viałasia pra toje, što jon niejki štatny ahladalnik i hetak dalej».

Ale sprava ŭ tym, što Illu Kołasava na kanale RTVI padpisvajuć i pradstaŭlajuć mienavita, jak «ahladalnik RTVI ŭ Minsku». A dla siužetaŭ, jakija pakazvajuć paralelna ź jaho słovami, vykarystoŭvajuć tyja ž kadry, što i dla siužetaŭ na hetu ž temu ŭ prahramie «Kontury».

Apošni vystup Kołasava na rasijskim kanale byŭ pra vizit Alaksandra Łukašenki ŭ Turcyju. Dyk voś kamientaryj ministra zamiežnych spraŭUładzimira Makieja ŭ siužetach ANT i RTVI vidavočna zdymaŭsia adnym apierataram i ŭ adzin čas.

«Z pačatku hoda aštrafavali dvaich žurnalistaŭ, ale ahułam dziesiać razoŭ, — raspaviadaje pra pakarańni za pracu biez akredytacyi na niezaležnyja biełaruskija ŚMI staršynia BAŽ Andrej Bastuniec. — Ahulnaja suma štrafaŭ na siońnia — kala 78 miljonaŭ rubloŭ. A letaś było 28 štrafaŭ na ahulnuju sumu bolš za 146 miljonaŭ rubloŭ. To bok sioleta aštrafavali ŭžo faktyčna na pałovu sumy minułaha hoda».

Ci budzie ŭ vyniku pakarany za mahčymaje parušeńnie zakanadaŭstva Illa Kołasaŭ, nieviadoma.

• 0
• 0
• 0
• 0
• 0
• 0
• 0
• 0