Biełaviežskaja pušča na terytoryi Polščy padvierhnułasia napadu žukoŭ-karajedaŭ. Praz «žyvuju pahrozu» ŭ Polščy pačali vysiakać drevy ŭ reliktavym lasnym masivie, paviedamlajecca ŭ polskich ŚMI.
Aktyŭnaja vysiečka dreŭ u polskaj častki Biełaviežskaj puščy pačałasia 25 maja.
Polskija ŭłady adznačajuć, što padobnyja miery pryniatyja, kab spravicca z aktyŭnaściu karajedaŭ. Žuki psujuć karu, pazbaŭlajuć dreva pažyŭnych rečyvaŭ, tamu jano moža zahinuć. Miž tym vysiečka dreŭ była raskrytykavanaja z boku ekołahaŭ. Adrazu siem pryrodaachoŭnych arhanizacyj adpravili skarhu na hetaje rašeńnie ŭ JEK, akcentujučy ŭvahu na tym, što vysiečka parušaje dyrektyvu Jeŭrasajuza.
Šerah śpiecyjalistaŭ kaža, što ŭ Biełaviežskaj puščy žuki-karajedy žyli zaŭsiody. Pry hetym raz u 10 hadoŭ škodniki pačynajuć aktyŭna razmnažacca.
U časopisie Nature polskija navukoŭcy apublikavali materyjały, dzie śćviardžajuć, što rašeńnie pradyktavanaje nie pryrodaachoŭnymi, a chutčej ekanamičnymi mierkavańniami.
Raniej ministr navakolnaha asiarodździa Polščy Jan Šyška kazaŭ, što rašeńnie ab vysiečcy dreŭ na polskaj terytoryi Biełaviežskaj puščy było pryniata ź mierkavańniaŭ ekałahičnaj biaśpieki. Pavodle jaho słoŭ, da 2021 hoda płanujecca pravieści rubku dreŭ na płoščy da 188 tys. kv.m. Takim čynam płošča vysiečki pavialičycca amal u try razy.
Pry hetym adznačajecca, što terytoryju «Biełaviežskaha nacyjanalnaha parku» ŭ Polščy vysiečka dreŭ nie zakranie.
Praź Biełaviežskuju pušču prachodzić miaža pamiž Polščaj i Biełaruśsiu. Pušča źjaŭlajecca najbujniejšaj terytoryjaj pieršabytnaha lesu ŭ Jeŭropie.
Kamientary