«Tałaka» admoviłasia źbirać hrošy na druk chryścijanskaj azbuki. Chryścijanie: «Čamu źbirać na Ryhviedu možna, a na azbuku – nie?»
Kraŭdfandynhavaja płatforma Talaka.by admoviłasia pačynać na svaim sajcie zbor hrošaj na vydańnie «Čytanki-chryścijanki». Pryčyna – płatforma nie padtrymlivaje palityčnyja i relihijnyja prajekty.
Kreatyŭny dyrektar Talaka.by Ivan Viadzienin tłumačyć: «U nas ad pačatku stvareńnia «Tałaki» stajali abmiežavańni na palityčnyja i relihijnyja temy. Naša placoŭka stvoranaja dla abjadnańnia ludziej, a palityka i relihija – kanfliktnyja, unutry hramadstva niama kansensusu pa hetych pytańniach».
Ivan raskazvaje, što da kožnaj asobnaj prapanovy pavinien być svoj padychod. «Naprykład, kali źbirajucca hrošy na adnaŭleńnie carkvy ci kaplicy, to my padtrymlivajem, bo heta nakiravana na ŭznaŭleńnie našaj histaryčnaj spadčyny, a nie na raspaŭsiudžvańnie peŭnych idej», — kaža spadar Viadzienin.
Surazmoŭca padkreślivaje, što heta nie pieršy vypadak admovy. «Apošni raz pamiataju admaŭlali ŭ dapamozie niejkaha pravasłaŭnaha patryjatyčnaha łahiera dla padletkaŭ».
Sustaršynia arhkamitetu BCHD Pavieł Sieviaryniec nazyvaje takoje rašeńnie Talaka.by «niespraviadlivym». «Vielmi škada, što ŭsio tak adbyvajecca. 31 maja my nakiravali zapyt u «Tałaku», nam abiacali razhledzieć pytańnie. Nijakaha adkazu ŭsio nie było, pakul Volha Sieviaryniec sama paŭtorna nie źviarnułasia. Adkazali, što prajekt padtrymlivać nie buduć, bo jon relihijny».
«Rasčaroŭvaje takaja vybarnaść, bo toj ža pierakład «Ryhviedy» «Tałakoj» byŭ padtrymany. My bačym, što chryścijan adsiul vykidvajuć, tut vam miesca niama, tam – niama. Ale 80% biełaruskaj kultury – heta chryścijanskaja kultura. Heta ahramadny masiŭ, jaki niemahčyma nikudy vykinuć», — kaža Pavieł Sieviaryniec.
Ivan Viadzienin na zaŭvahu pra «Ryhviedu» adznačaje, što imi hety prajekt najpierš razhladajecca jak kulturny, a nie relihijny.
Ciapier vydaŭcy chryścijanskaj azbuki chočuć źviarnucca da prajekta ulej.by, u jakoha niama abmiežavańniaŭ u padtrymcy praz relihiju. «Da mianie ŭžo źviartałasia šmat ludziej, jakija hatovyja dapamahčy, — kaža Sieviaryniec. – Kali spravy tak pojduć dalej, to nie vyklučajem stvareńnia asobnaj chryścijanskaj kraŭdfandynhavaj płatformy».
«My razhledzieli roznyja varyjanty taho, jak lepiej vybudavać pracu z relihijnymi prajektami. I najbolej kanstruktyŭnym i słušnym krokam nam zdajecca stvareńnie ekśpiertnaj rady z pradstaŭnikoŭ roznych kanfiesijaŭ, jakaja dapamoža nam u pytańniach: ci źjaŭlajecca prajekt z vydańniem «Azbuki» i ŭsie nastupnyja, što buduć da nas pastupać, adpaviednymi intaresam relihijnaj supolnaści Biełarusi i praviłam płatformy.
Darečy, z Volhaj Sievieryniec, aŭtarkaj prajekta, my ŭžo hetuju ideju abmiarkavali i znajšli parazumieńnie, što heta sapraŭdy budzie dobry varyjant dla vyrašeńnia situacyi», — padsumoŭvaje zasnavalnik talaka.by. Jaŭhien Kliševič.
Pahladzieć, što ž heta za «Čytanka-chryścijanka», možna na sajcie krynica.info.
Kamientary