Niadaŭna pabačyła śviet piataje vydańnie papularnaj knihi — hetym razam u farmacie aŭdyjoknihi. Jaje prezentacyja projdzie ŭ aŭtorak 27 traŭnia na siadzibie TBM.
Adrasavanaja junym biełarusam kniha Ŭładzimiera Arłova «Adkul naš rod», dobra znajomaja čytačam samaha roznaha vieku — usim, chto cikavicca historyjaj. Pra heta śviedčać i čatyry vydańni, i šmathadovaja prysutnaść knihi ŭ školnych prahramach.
Niadaŭna pabačyła śviet piataje vydańnie — hetym razam u farmacie aŭdyjoknihi. Jaje składajuć zajmalnyja i paznavalnyja apaviadańni, u jakich našaja historyja padajecca praź losy znakamitych prodkaŭ.
Siarod hierojaŭ Arłova — kniazi Usiasłaŭ Čaradziej i Vitaŭt Vialiki, pieršadrukar Francišak Skaryna i kancler Leŭ Sapieha, vajavody Kanstancin Astrožski i Jan Karol Chadkievič, pravadyry paŭstancaŭ Tadevuš Kaściuška i Kastuś Kalinoŭski, paety Mikoła Husoŭski i Maksim Bahdanovič, «baćki» Biełaruskaj Narodnaj Respubliki Ivan i Anton Łuckievičy…
Padkreślivajučy vyklučnuju rolu, jakuju u našaj historyi ź pieršych jaje stahodździaŭ adyhryvajuć žančyny, Uładzimier Arłoŭ apaviadaje pra kniahiniu Rahniedu, aśvietnicu Jeŭfrasińniu, udzielnicu vyzvolnaha paŭstańnia 1831 hoda Emiliju Plater, paetesu Ciotku…
Chranalahičnyja miežy 30 raździełaŭ knihi — ad źjaŭleńnia na sučasnaj terytoryi Biełarusi pieršych ludziej da abviaščeńnia niezaležnaści BNR.
«Adkul naš rod» — pieršaja biełaruskaja aŭdyjokniha, jakuju načytaŭ sam aŭtar. Ale admietnaj jaje robić nia tolki heta. U dadzienym vypadku my majem spravu nia prosta z aŭdyjoknihaj, ale z multymedyjnym prajektam. «Adkul naš rod» možna jak słuchać, tak i čytać. Kniha maje bahataje hukavoje afarmleńnie i azdoblenaja malunkami viadomaha mastaka Viktara Staščaniuka. U jaje arhanična ŭvajšoŭ muzyčny «kampanent», dzie vyłučajucca kampazycyi hurtu siaredniaviečnaj muzyki «Stary Olsa». Siarod liku vykanaŭcaŭ, uštukavanych u knihu vieršaŭ, — naš vydatny aktor Viktar Manajeŭ.
Razam z Uładzimieram Arłovym nad dyskam pracavaŭ hukarežyser Aleś Kałoša, jaki maje niepasrednaje dačynieńnie ŭžo da cełaj aŭdyjobiblijateki biełaruskaj klasyki i sučasnych tvoraŭ.
Kniha vydadziena vydaviecka‑reklamnaj kampanijaj «BiełTonMedyja», jakaja nieŭzabavie planuje vypuścić aŭdyjoversiju jašče adnoj papularnaj knihi Ŭładzimiera Arłova «Tajamnicy połackaj historyi»(jaje taksama čytaje sam aŭtar).
Z hetaha miesiaca multymedyjny «Adkul naš rod» užo možna nabyć u centralnych mienskich kniharniach, a taksama ŭ niezaležnych raspaŭsiudnikaŭ.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary