Milicyja zabrała kampjutar i telefon błohiera z Bresta, jaki sabraŭsia ŭ deputaty
5 lipienia da pretendenta ŭ kandydaty ŭ deputaty parlamentu Siarhieja Piatruchina, jaki balatujecca ŭ Bieraści, pryjšli milicyjanty i zabrali jaho mabilny telefon i noŭtbuk.
«Milicyjanty pryjšli ŭ suviazi z kamentarom, jaki byccam by ja pakinuŭ datyčna adnaho bujnoha čynoŭnika Kamitetu dziaržaŭnaha kantrolu. Ja rabiŭ repartaž pra jaho try miesiacy tamu, dzie raspaviadałasia, što były staršynia Bieraściejskaha harvykankamu niezakonna pieradaŭ jamu nadzieł u centry horadu. Pavodle majho repartažu była raspačataja kryminalnaja sprava», — kaža Siarhiej.
Siarhiej Piatruchin raspavioŭ, što ŭ časie vizytu milicyjantaŭ jaho ździviła patrabavańnie addać mabilny telefon, jaki jon nabyŭ tydzień tamu i maje adpaviednyja dakumenty. Spadar nie razumieje, jakoje dačynieńnie moža mieć hety telefon da spravy trochmiesiačnaj daŭniny.
«Ja siońnia pačaŭ źbirać podpisy, u mianie ŭ kamputary ŭsia maja baza kantaktaŭ, usie maje napracoŭki», — kaža Siarhiej Piatruchin. Jon nie vyklučaje, što adnaŭleńnie spravy ab kamentary na sajcie źviazanaje z aktyvizacyjaj jaho vybarčaj kampanii.
Bieraściejski błohier Siarhiej Piatruchin zajmajecca žurnalisckimi raśśledavańniami na temu karupcyi čynoŭnikaŭ i siłavikoŭ. Na svaim youtube-kanale «Narodny reparcior» jon vykładaje videasiužety na prablemnyja temy, źviazanyja sa złoŭžyvańniami čynoŭnikaŭ. Kožnaje raśśledavańnie žurnalista źbiraje tysiačy prahladaŭ u siecivie.
Adzin ź niadaŭnich filmaŭ Siarhieja Piatruchina «Kak zarabotať 50 bazovych» raspaviadaŭ ab vyłučeńni harvykankamam nadziełu ziamli čynoŭniku dziaržkantrolu.
U svaim raśśledavańni Siarhiej Piatruchin vykazaŭ mierkavańnie, što były staršynia harvykankamu Alaksandar Pałyšenkoŭ, jaki sadziejničaŭ vydzialeńniu nadziełu čynoŭniku, «nanios dziaržavie materyjalnyja straty ŭ asabliva bujnym pamiery».
Užo paśla źjaŭleńnia materyjału Piatruchina ŭ siecivie, u traŭni da jaho prychodzili milicyjanty z pretenzijami da kamentaru, jaki niechta pakinuŭ na rehijanalnym sajcie na adras čynoŭnika. Adnak potym sprava nia ruchałasia, i Siarhiej Piatruchin kaža, što ŭžo i nia dumaŭ, što jana adnovicca ŭ časie jaho vybarčaj kampanii.
Ciapier čytajuć
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3131
Kamientary