Re1ikt vystupić razam ź finalistami «Zaśpiavaj 3.0»

Hurt Re1ikt vystupić 5 žniŭnia u dvoryku na płoščy Svabody, 4 razam ź finalistami konkursu «Zaśpiavaj 3.0» — Janam Žančakom, Jaŭhienam Ciarenćjevym i hurtom Teleport dy hurtom U.G.Oslavia.

Hurt Re1ikt sabraŭ usie mahčymyja ŭ Biełarusi ŭznaharody ŭ apošnija hady.Cioleta ich praca «Lekavyja travy» była nazvanaja inšymi biełaruskimi muzykam «Albomam hodu» na premii Rock Profi, a sam hurt nazvany «Artystam hodu». Na ŭznaharodach Experty.by hety ž albom byŭ pryznany najlepšym rok-albomam, a taksama albomam hodu pa dźviuch versijach — štatnych ekspertaŭ i narodnych ekspertaŭ. A da hetaha hurt pieramoh u šerahu biełaruskich i polskich festach, a taksama atrymaŭ zvańnie «Hierojaŭ hodu» ad Tuzin.fm. 5 žniŭnia muzyki syhrajuć akustyčnuju prahramu poŭnym składam, jakaja składajecca jak z dobra viadomych piesień, tak i niečakanych i rarytetnych trekaŭ. Admysłova da hetaha vystupuTuzin.fm skłaŭ top-12 najlepšych piesień u vykanańni samaj mahičnaj rok-kamandy krainy.

U hety viečar vystupić adzin z favarytaŭ u naminacyi «Śpiavanaja paezija» Jan Žančak. 32-hadovy vykanaŭca viadomy z udziełu ŭ takich hurtach jak «Pieśniary» (p/k Bartkieviča), In Search For, Jankey. Sioleta jon debiutavaŭ z svaim solnym prajektam. Na konkurs śpiavak padaŭ pieśniu «Ŭspaminy», napisanuju na vierš baćki, paeta Barysa Žančaka. Siarod favarytaŭ konkursu jaje nazvali siabry žury Aleh Chamienka i Jaŭhien Karpaŭ. U vypadku pieramohi, Jan chacieŭ by ŭkłaści hrošy, atrymanyja ŭ jakaści pryzu, u svoj debiutny solny albom.

5 žniŭnia vystupić z setam taksama adzin z pretendentaŭ na pieramohu ŭ naminacyi «Zamiežny pierakład»Jaŭhien Ciarenćjeŭ z hurtom Teleport. Letaś vykanaŭca ŭžo ŭdzielničaŭ u konkursie i byŭ adznačany ŭ liku laŭreataŭ u naminacyi «Biełaruski kaver» za interpretacyju «pieśniaroŭskaha» šedeŭra «Začaravanaja». Hetym razam Jaŭhien padaŭ zajavu adrazu ŭ dźvie naminacyi — u «Biełaruski kaver» pieśniu «Vieranika» (zusim krychu joj nie chapiła, kab trapić u finał), a ŭ «Zamiežny pierakład» — biełaruskamoŭnuju versiju pieśni rasiejskaha hurta «Kipiełov» — «Noč u lipni», dziakujučy jakoj i trapiŭ u druhi raŭnd konkursu. Ciarod najlepšych hetuju pieśniu nazvali Siarhiej Pukst i Pavał Bierahovič. U vypadku pieramohi Jaŭhien chacieŭ by ŭkłaści pryzavyja hrošy ŭ raźvićcio svajho hurta.

Trecim ź finalistaŭ «Zaśpiavaj 3.0» u hety viečar vystupić hurt, jaki pretenduje na pieramohu ŭ naminacyi «Biełaruski kaver» — U.G.Oslavia, jakija zrabili svaju versiju znakavaj pieśni N.R.M. — «Fabryka». Siarod siabraŭ žury jana nadzvyčaj zachapiła Hleba Łabadzienku i Hannu Jankutu. Svaju tvorčaść muzyki pazycyjanujuć jak «rok-n-roł i bła-bła-bła», aktyŭna vystupajuć, a letaś byli naminavanyja na «Debiut hodu» na premii Rock Profi. U vypadku pieramohi ŭ konkursie, muzyki miarkujuć źniać klip.

Vieści kancert «Zaśpiavaj 3.0» budzie Aleh Chamienka. U prodažy tolki 50 kvitkoŭ.

Za ŭsich finalistaŭ konkursu možna taksama prahałasavać na sajcie Talaka.by, dzie idzie vyznačeńnie najlepšaha na mierkavańnie narodnaha žury.

5.08. Miensk, Chill Out (płošča Svabody, 4, unutrany dvoryk). 19:00-22:00. Re1ikt + finalisty «Zaśpiavaj 3.0»: Jan Žančak, Jaŭhien Ciarenćjeŭ i Teleport, U.G.Oslavia. Košt kvitkoŭ: 10 rub. (papiarednie), 15 rub. (u dzień, pry najaŭnaści). Infa: +375 29 687-20-93.

• 0
• 0
• 0
• 0
• 0
• 0
• 0
• 0