U ruchavik samalota «Biełavija» trapiła ptuška. Aburanaja pasažyrka patrabuje kampiensacyi

Vyśvietliłasia: u ruchavik trapiła ptuška. U «Biełavija» kažuć, heta pieršy padobny incydent ad pačatku hoda. Pasažyraŭ ža nieardynarnaść situacyi nie ŭraziła.

«My 12 hadzin prasiedzieli na mietaličnych łavach u aeraporcie, pakul čakali nastupnaha rejsa, — aburanaja Śviatłana. — Ja źbirajusia źviartacca ŭ avijakampaniju pa kampiensacyju».

— Jak tolki samalot staŭ zavodzicca, muž źviarnuŭ uvahu na niejki dziŭny tresk, ale što heta, nichto nie viedaŭ, — pryhadvaje tuju ranicu surazmoŭca. — Kali stali źnižacca, my vielmi pierapałochalisia. Dumali, zaraz razabjemsia. A potym daviedalisia: u ruchaviku znachodzicca ptuška.

Pa słovach pasažyrki, nastupny samalot prybyŭ za imi ź Minska tolki bližej da viečara. U 20.35 jany vylecieli na radzimu.

— Uvieś hety čas my siadzieli ŭ nievialikim aeraporcie na mietaličnych łavach, — aburanaja Śviatłana. — Viadoma, dziakuj, što nas pakarmili, ale čamu nie pasialili ŭ hatel?! Mnohija, kab patrapić u Burhas da 8.00, paŭstavali ŭ 4 ranicy. Na borcie było čałaviek 20 dziaciej. U mianie samoj čatyrochhadovaja dačka. Čamu jana paśla adpačynku pavinna paŭdnia pakutavać?! Ale bolš za ŭsio mnie było škada ciažarnuju žančynu, jakaja ŭvieś hety čas siadzieła pobač z nami. Ź joj było taksama było jašče dzicia. Ujavicie, jak joj?

Ciapier Śviatłana źbirajecca pisać zajavu ŭ avijakampaniju.

— Ja b chacieła, kab usim pasažyram vypłacili kampiensacyju. I za toje, što my adpakutavali ceły dzień, i za stres. Ujavicie, jak paśla hetaha było sieści ŭ samalot i znoŭ uźlatać?!

U «Biełavija» paćvierdzili: sapraŭdy, rejs, jaki 7 žniŭnia 2016 hoda ŭ vosiem ranicy vylecieŭ z Burhasa ŭ Minsk, nieŭzabavie paśla ŭźlotu zrabiŭ pasadku ŭ tym ža bałharskim aeraporcie. U ruchavik trapiła ptuška, i piłot vyrašyŭ viarnucca. U suviazi z tym, što samalot atrymaŭ paškodžańni, było vyrašana nakiravać u aeraport Burhasa reziervovaje pavietranaje sudna.

— Ludziej raźmiaścili ŭ tranzitnaj zale, dzie ź imi ŭvieś čas znachodziŭsia supracoŭnik aeraporta, — raspaviadajuć u pres-słužbie avijakampanii. — Jon padavaŭ im usiu nieabchodnuju infarmacyju. Pasažyram arhanizavali dvuchrazovaje haračaje charčavańnie, a dziciaci, jakoje adčuła bol u vušach, tut ža akazali miedycynskuju dapamohu. U suviazi z tym, što pasažyry prajšli pamiežnyja i mytnyja pracedury, u mnohich byli zakrytyja (pahašany) vizy, bolšaść ź ich nie mahli pakinuć zonu aeraporta Burhasa. Varta ŭličyć, što leta — heta siezon. Usie samaloty zadziejničany na roznych napramkach, i znajści svabodny —dosyć składana.

U avijakampanii raspaviali, što situacyi, kali ptuška traplaje ŭ ruchavik samalota, adnosiacca da abstavin niepieraadolnaj siły. Zdarajecca takoje vielmi redka. Ad pačatku hoda ŭ «Biełavija» — heta pieršy padobny incydent.

• 0
• 0
• 0
• 0
• 0
• 0
• 0
• 0