Dniami ŭ Rastoŭskaj vobłaści prajšli spabornictvy na zvańnie lepšaha traktarysta Rasiei. Na adnym z etapaŭ traktary vypuścili na tryjalnuju trasu. «Biełarusy» licha latali pa joj z chutkaściu 70 km/h.
Dniami ŭ Rastoŭskaj vobłaści
Jany tak licha latali pa trasie, što dla hledačoŭ zahadzia adviali miescy dalej ad jaje. A što vy chočacie: pry maksymalnaj chutkaści 40 kilametraŭ u hadzinu «spartsmeny» vydavali ŭsie 70 kilametraŭ u hadzinu! U telesiužecie cikava było nazirać, jak «Biełarusy», niby tyja «łastaŭki», uźnimajucca ŭ pavietra, prachodziačy składanuju trasu. Biezumoŭna, i arhanizatary spabornictvaŭ, i ŭdzielniki nie chavali, što takuju chutkaść demanstrujuć nia bazavyja madeli, a ŭdaskanalenyja rukami majstroŭ.
«Traktarny ciuninh», jak havaryłasia, papiarednie pravodziŭsia na praciahu niekalkich miesiacaŭ — u kožnaha ŭdzielnika na svoj hust. Kankretnyja sakrety, viadoma, nichto ahučvać nie imknuŭsia. U jakaści ahulnaj infarmacyi havaryłasia tolki pra toje, što było navidavoku i što schavać navat pry žadańni było niemahčyma. Tak, dla lepšaj ustojlivaści na trasie (pry takoj chutkaści) na traktary naviešvali dadatkovy hruz nad piarednimi kołami, bolš ciažkimi rabili i zadnija. Zhadvałasia zamiena hazahienerataraŭ, bolš mahutnyja paliŭnyja pompy. A jak staviacca ŭ nas da takich spabornictvaŭ? Pa nievialiki kamentaryj my źviarnulisia na Mienski traktary zavod da v.a. hałoŭnaha kanstruktara pradpryjemstva Vasila Žuka.
Pavodle jaho słoŭ, aficyjna zavod nie rychtavaŭ mašyny da takich spabornictvaŭ, nie akazvaŭ nijakaj techničnaj padtrymki arhanizataram, choć apošnimi byŭ prainfarmavany pra majučy adbycca konkurs. A čamu b i nie, chto admovicca ad reklamy?
— Heta rehijanalnaja zadumka nakont spabornictvaŭ, takija svojeasablivyja šoŭ charakternyja dla niekatorych rehijonaŭ Rasiei, u tym liku i Rastoŭskaj vobłaści. Čamu byli abranyja mienavita biełaruskija traktary dla ŭdziełu ŭ ich? MTZ — samy masavy, samy papularny traktar nia tolki na poŭdni, ale i ŭvohule va ŭsioj Rasiei. Darečy, nakolki viadoma, pieramožca ŭ jakaści pryza pavinien atrymać taksama novy traktar MTZ ad našaha rehijanalnaha pradstaŭnika, — skazaŭ Vasil Uładzimieravič.
Pavodle słoŭ specyjalista, udzielniki šoŭ «dabivali» ŭłasnyja mašyny, pakolki pierarobleny takim čynam traktar, kali ŭ tranśmisiju ŭnosiacca źmianieńni, źmianiajecca pieradatačnaje čysło, farsirujecca ruchavik, pracavać u jakaści zvyčajnaj sielskahaspadarčaj techniki ŭžo nia moža.
«Heta nie rabočaja mašyna, ciapier jana moža vystupać tolki voś na takich spabornictvach. Ale orhany techničnaha nahladu, Dziaržaŭtainspekcyja, vidavočna, dazvolili zrabić takuju «madernizacyju».
Padčas vyprabavańniaŭ traktaroŭ na specyjalnym palihonie, jak skazaŭ dalej surazmoŭca, jany taksama raźvivajuć vysokuju chutkaść («nie 70 kiłamietraŭ u hadzinu, viadoma ž»), vysoka «skačuć» na specyjalnaj trasie ź pieraškodami. Raźlikovy termin ekspluatacyi mašyny biez kapramontu składaje bolš za 10 hadoŭ, tamu vyprabavańni j pravodziacca ŭ takim paskoranym režymie. Jak kažuć, na karyść spravie, a nia dziela šoŭ. Darečy, jašče pra apošnija. Na Zachadzie specyjalna abstalavanyja traktary ciahnuć za saboj balast — chto dalej (taki ž etap byŭ i ŭ spabornictvach u Rastoŭskaj vobłaści, kali mašyny ciahnuli za saboj hruz vahoj u adnu tonu). U krainach SND takija zabavy jašče nia vielmi papularnyja. Spabornictvy my paprasili prakamentavać (zavočna, zrazumieła) i našaha čytača — traktarysta sielskahaspadarčaha filijała «Krynica» AAT «Minskrambud» Kapylskaha rajona Uładzimiera Łohmana, jaki ŭ hety momant na «Amkadory‑332» trambavaŭ siłasnuju jamu.
— A što, narmalnaja źjava. Sam pracavaŭ na «Biełarusach», maksymalnaja chutkaść u ich 36—37 kilametraŭ u hadzinu. Kolki ja asabista maksymalna «vyciskaŭ»? Nu, było niejak na MTZ‑82… (Redakcyja pakidaje nazvanuju ličbu ŭ tajnie.) Tak, moh by i paŭdzielničać u takich spabornictvach, nie havoračy, što i prosta panaziraŭ by z zadavalnieńniem.
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ79
Kamientary