U Minsku źjaviacca vulicy Paŭliny Miadziołki, šlachcičaŭ Jelskich i Respublikanskaja
Tak, novy skvier u miežach vulic Iosifa Haškieviča, Uładzisłava Syrakomli i Janki Łučyny prapanavana nazvać Viłkaŭščyna. Jak rastłumačyli ŭ Kamisii pa najmieńni i pierajmienavańni praśpiektaŭ, vulic, płoščaŭ i inšych składovych častak Minska, u žyłym rajonie Łošyca budzie słušniej uviekaviečyć nazvu vioski, jakaja isnavała tut raniej, čym dać tryvijalnuju nazvu «Łošycki» abo ŭ honar Syrakomli, Haškieviča albo Łučyny.
Jašče čatyrom prajektavanym vulicam i trom zavułkam prapanavany nazvy z ulikam tapanimičnaj situacyi, jakaja ŭžo skłałasia. I na samaj spravie, łahična, što zavułki 1-y i 2-i Ratamskija, Kniahininskija pavinny być kala vulic Ratamskaj i Kniahininskaj. Jak i toje, što prajektavanuju pobač ź isnujučymi vulicami Astrožskich i Tyškievičaŭ vulicu nazavuć u honar viadomaha biełaruskaha šlachieckaha rodu Jelskich.
Respublikanskaja źjavicca niedaloka ad Pałaca Niezaležnaści. Heta pryhožaja nazva ŭžo była na karcie stalicy, ale źnikła ŭ 1993 hodzie.
A voś nazva «Michałoŭskaja» — novaja. Ciapier jość vulica Michałova. Praŭda, na joj tolki niekalki budynkaŭ, jakija ŭ pierśpiektyvie źniasuć. Tak što praz nazvu prajektavanaj Michałoŭskaj taponim u honar mikrarajona ŭdasca zachavać.
U rajonie vulicy Zarečnaja i zavułka Mały Traścianiec prajektujecca Stajkaŭskaja — jakraz pa darozie da viadomaha alimpijskaha spartkompleksu «Stajki».
A Ždanovickaja źjavicca ŭ rajonie vulicy Masiukoŭščyna.
Adnu novuju vulicu prapanavana zrabić imiennaj. Jana atrymaje nazvu ŭ honar viadomaj biełaruskaj aktrysy, piedahoha i piśmieńnicy, pieršaj vykanaŭcy roli Paŭlinki ŭ adnajmiennaj kamiedyi Janki Kupały Paŭliny Miadziołki. Prajektujecca vulica ŭ rajonie Vyhockaha.
Darečy, minčanie mohuć vykazacca pa prapanavanych kamisijaj nazvach, nakiravaŭšy svaje mierkavańni i zaŭvahi ŭ hałoŭnaje ŭpraŭleńnie ideałahičnaj raboty, kultury i pa spravach moładzi Minharvykankama (220006, h. Minsk, vuł. Majakoŭskaha, 22, korpus 2) na praciahu 2 tydniaŭ.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary