12 kastryčnika ŭ sudzie Oršy raspačniecca razhlad administratyŭnaj spravy Vitala Paŭłava. Čałavieka abvinavačvajuć u drobnym chulihanstvie. Za što? Za vybary.
Paŭłaŭ byŭ zatrymany 12 vieraśnia, na nastupny dzień paśla vybaraŭ, kali išoŭ na aršanski čyhunačny vakzał, kab pajechać u Minsk na akcyju pratestu.
«Milicyjanty Valancin Miežuś i Rusłan Papko pad pahrozaj siły zmusili aktyvista sieści ŭ milicejskuju mašynu i advieźli ŭ pastarunak. Tam jaho dvojčy abšukali i źmiaścili ŭ kamieru časovaha ŭtrymańnia, a zatym prapanavali aznajomicca z pratakołam ab administratyŭnym pravaparušeńni — drobnym chulihanstvie, — paviedamlaje pres-słužba partyi BNF. — Pavodle pratakoła, u dzień hałasavańnia 11 vieraśnia na ŭčastku №5, dzie Vital Paŭłaŭ prysutničaŭ u jakaści naziralnika, jon, nibyta, niecenzurna łajaŭsia i abražaŭ staršyniu kamisii Natallu Vajciachovič, za što byŭ vydaleny z učastka. Pry hetym major milicyi Andrej Łapcinski nie dazvoliŭ frontaŭcu aznajomicca z zajavaj, na padstavie jakoj byŭ składzieny pratakoł».
Sam Vital Paŭłaŭ śćviardžaje, što nijakaha pravaparušeńnia nie ŭčyniaŭ, a administratyŭny pieraśled staŭ vynikam jahonaj sproby trapić u Miensk na vuličnuju akcyju «Patrabujem sapraŭdnych vybaraŭ», jakaja adbyłasia 12 vieraśnia. Jak kaža Paŭłaŭ, jon rabiŭ zaŭvahi staršyni kamisii, jakaja pieraškadžała nazirać za padlikam hałasoŭ, adnak łajanki i abrazaŭ nie vykazvaŭ, i z učastka nichto jaho nie vydalaŭ. Pamiaškańnie dla hałasavańnia jon pakinuŭ paśla zakryćcia ŭčastka samastojna, razam ź inšymi naziralnikami. Tym nie mienš, pratakoł byŭ nakiravany ŭ sud.
Kamientary