Minčuk, jaki vyjšaŭ da Doma ŭrada z šyldačkaj «Dapamažycie. Help», aštrafavany na 10 bazavych

Minčuk Ihar Cielpuchoŭski aštrafavany na 10 bazavych vieličyń za niesankcyjanavany pikiet na płoščy Niezaležnaści ŭ Minsku. Takoje rašeńnie 31 kastryčnika vyniesła sudździa suda Maskoŭskaha rajona Taćciana Motyl.

15 i 16 vieraśnia Cielpuchoŭski prychodziŭ da Doma ŭrada z šyldačkaj «Dapamažycie. Help», bo da hetaha biespaśpiachova sprabavaŭ trapić na pryjom da hienieralnaha prakurora. U vyniku ŭ dačynieńni da minčuka byŭ składzieny pratakoł na padstavie č. 1 art. 23.34 KoAP (parušeńnie paradku arhanizacyi abo praviadzieńnia masavych mierapryjemstvaŭ).

Na pieršym sudovym pasiadžeńni 28 vieraśnia Cielpuchoŭski zajaviŭ, što ličyć siabie nievinavatym u hetym pravaparušeńni, i rastłumačyŭ svoj učynak tym, što byŭ daviedzieny da adčaju ihnaravańniem uładami jaho prablem.

Mužčyna nie admaŭlaje, što znachodziŭsia na płoščy ŭ hetyja dni, ale nie ličyć heta pikietavańniem, bo, pavodle jaho słoŭ, usiaho tolki prasiŭ dapamohi «ŭ tych, chto pracuje ŭ Domie ŭrada». Cielpuchoŭski padkreśliŭ, što nie parušaŭ hramadski paradak i pravy inšych hramadzian, na płoščy nie stajaŭ, a siadzieŭ na krai kłumby, nie vykrykvaŭ łozunhaŭ, a šylda lažała pobač i jon nie trymaŭ jaje ŭ rukach.

Na jaho dumku, pratakoł byŭ składzieny niepravamierna, i ŭ kancy vieraśnia jon vykłaŭ hetuju pazicyju ŭ skarhach ŭ MUS i Hienprakuraturu, ale adkazaŭ da hetaha času nie atrymaŭ.

Ihar Cielpuchoŭski — invalid druhoj hrupy, biespracoŭny. Jaho žonka taksama nidzie nie pracuje i znachodzicca na ŭliku ŭ słužbie zaniataści. U ich dvoje dziaciej.

Z sudovym rašeńniem mužčyna nie zhodny i maje namier źviarnucca da prezidenta.

U Hienprakuratury, kudy Cielpuchoŭski sprabavaŭ trapić dla rašeńnia šerahu svaich prablem, jamu była pryznačanaja sustreča z namieśnikam hienieralnaha prakurora Alaksandram Łašynym. Adnak na ŭvachodzie ŭ budynak jon admoviŭsia zdać svoj mabilny telefon, bo mieŭ namier zdymać sustreču na videa. U vyniku ŭ sustrečy jamu było admoŭlena.

U 2011 hodzie Cielpuchoŭski patrabavaŭ raspačynańnia kryminalnaj spravy za niadbajnaść u dačynieńni da pradstaŭnikoŭ darožnaj słužby, paśla taho jak jaho syn zvaliŭsia ŭ vialikuju jamu na vieładarožcy. Akramia taho, u 2014 hodzie, pavodle słoŭ Cielpuchoŭskaha, u apornym punkcie milicyi jaho źbiŭ major, ź jakim u jaho byli napružanyja adnosiny. Jon taksama ličyć, što pravaachoŭnyja orhany zaciahvajuć razhlad u dačynieńni da hramadzianina, jakomu Cielpuchoŭski ŭ 2014 hodzie pradaŭ aŭtakłaŭ, ale jaki, pavodle jaho słoŭ, na hod zaciahnuŭ afarmleńnie nieabchodnych dakumientaŭ i ŭ vyniku ŭkazaŭ u dahavory sumu, adroznuju ad pieršapačatkovaj damoŭlenaści.

• 0
• 0
• 0
• 0
• 0
• 0
• 0
• 0