U čempijanacie Biełarusi budzie hulać futbalist zbornaj Jamajki, heta samy darahi hulec pieršynstva krainy
Jaho tranśfierny košt — 3,2 młn jeŭra.
Čempijon krainy «MŁ Viciebsk» padpisaŭ hulca zbornaj Jamajki Šamara Nikałsana.
Nikałsanu 28 hadoŭ. Jon naradziŭsia ŭ stalicy Jamajki Kinhstanie. Prafiesijnuju karjeru pačaŭ na radzimie, paśla čaho pierajechaŭ u Jeŭropu. Spačatku hulaŭ za słavienski «Damžale», potym u bielhijskim «Šarlerua» (pravioŭ za kłub 80 matčaŭ i zabiŭ 11 miačoŭ), maskoŭskim «Spartaku», francuzskim «Klermonie», apošni jaho kłub — mieksikanskaja «Cichuana», jaki i addaje Nikałsana ŭ arendu ŭ Biełarusi.
Nikałsan pravioŭ 62 matčy za zbornuju Jamajki i zabiŭ 11 hałoŭ. Ciapier zbornia hulaje ŭ płej-of za vychad na čempijanat śvietu i pretenduje na trapleńnie ŭ turnir. 27 sakavika adbudziecca pieršy paŭfinalny matč stykavych matčaŭ suprać Novaj Kaledonii. U vypadku pieramohi jany ŭ finale zhulajuć sa zbornaj Demakratyčnaj Respubliki Konha.
Pavodle źviestak statystyčnaha partała Transfermarkt, jon adrazu staŭ samym darahim futbalistam čempijanatu. Jaho tranśfiernaja vartaść aceńvajecca ŭ 3,2 młn jeŭra. Tak, u najlepšaha hulca Biełarusi minułaha hoda Valeryja Hramyki, što pierajšoŭ u «MŁ Viciebsk» z kazachstanskaha «Kajrata» — 1,5 młn.
Uładalnik viciebskaha kłuba Arciom Lavonaŭ u intervju Onliner.by raskazaŭ, kolki budzie atrymlivać Šamar Nikałsan u kamandzie.
«Niekalki tydniaŭ tamu mnie patelefanavaŭ ahient futbalista i prapanavaŭ pasłuhi Šamara. My byli nie suprać i damovilisia pra ŭmovy. Jany dla nas vielmi dobryja. 90 % zarobku budzie pakryvać «Cichuana», ź jakoj u Nikałsana dziejny kantrakt. My budziem dapłačvać kala 10 tysiač dalaraŭ u miesiac. U «Cichuanie» jaho zarobak kala 100 tysiač», — raskazaŭ jon.
Lavonaŭ kaža, što jamajca matyvavaŭ pierachod u biełaruski čempijanat tym, što jość mahčymaść hulać u Lizie čempijonaŭ: «Dumaju, matyvacyja mienavita ŭ hetym: dajści da asnoŭnaha raŭnda i spadabacca jakomu-niebudź inšamu kłubu» [kab trapić u asnoŭny raŭnd Lihi čempijonaŭ, treba prajści čatyry etapy kvalifikacyi — NN].
Mahčyma, Nikałsan debiutuje za «MŁ» u hetu niadzielu ŭ matčy ŭ adkaz Kubka Biełarusi suprać bresckaha «Dynama», jaki projdzie ŭ Viciebsku.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary