22 listapada na pracesie nad 11 ašmianskimi mytnikami, jakich pačali sudzić 18 listapada ŭ Partyzanskim sudzie Miensku, prakuror začytaŭ abvinavačańni ŭsim padsudnym.
Aleś Jurkojć, fota Siarhieja Hudzilina
Pieradapošnim, kamu prahučała abvinavačańnie, byŭ mytnik z Astraŭcu Aleś Jurkojć, viadomy svajoj krajaznaŭčaj dziejnaściu i pracaj, što prapahanduje biełaruskuju movu.
Abvinavačańnie Alesiu Jurkojciu začytvali pa-biełarusku ciaham 1,5 hadziny.
Razam ź Jurkojciem, pavodle śledztva, u złačynnuju hrupu ŭvachodzili mytniki Surjanc, Vysocki, Łapševič, Maroz, Bukiel, Jermałajeŭ, Karpovič, Babrovič, Vysocki, Zarecki, Kaźmirčuk, Kurnievič, Jaškievič, Mišuk, Nahorski, Nazaraŭ, Paškievič, Ivaševič, Śmirnoŭ, Stelmach, Strapko, Karevič, Časnojć, Čepina, Bubnoŭ, Kupčanka, Jakucienka, Paškoŭski, Daščynski i jašče bolš za 12 mytnikaŭ.
Dziejničała hrupoŭka, u skład jakoj nibyta ŭvachodziŭ Aleś Jurkojć, na mytnym pastu «Kamienny Łoh».
Chabar brali z aŭtamabilaŭ, jakija vieźli z terytoryi Eŭraźviazu ŭ Rasieju i Kazachstan kvietki, a taksama inšyja tavary, jak havorycca ŭ abvinavačańni. Chabar atrymlivali za toje, što nie pravodzili naležnaj pravierki. «Bieśpieraškodna prapuskali», — skazana ŭ abvinavačańni.
Adnym kiraŭnikoŭ hrupoŭki byŭ mytnik Karpovič, jon nibyta razam z Surjancam i ŭciahnuŭ Jurkojcia ŭ złačynnuju hrupu. Źviestki pra aŭtamabili, jakija treba było prapuścić biez naležnaha afarmleńnia i kantrolu, jak śćviardžaje śledztva, davaŭ Surjanc. Siarod tych, chto zahadvaŭ, jak dziejničać adnosna aŭtamabilaŭ, byli Bubnoŭ i Kupčanka.
Pavodle śledztva, Jurkojć taksama musiŭ infarmavać načalstva pra parušeńni, jakija dapuskajuć inšyja mytniki, i nie dapuskać hetych parušeńniaŭ.
Razam ź inšymi Jurkojć nibyta nabyŭ srodki mabilnaj suviazi dla kantaktaŭ z čalcami złačynnaj hrupy.
Taryfy chabaru byli ad 250 da 80 dalaraŭ za aŭtamabil z kvietkami. Hetyja taryfy vyznačyli Surjanc i Vysocki, jakija ź inšymi kiraŭnikami hrupoŭki atrymlivali pa 500 dalaraŭ štomiesiac. Jany brali sabie hetyja hrošy z atrymanych chabaraŭ, a astatnimi dzialilisia z mytnikami, jakija znachodzilisia ŭnizie piramidy.
Z pastaŭščykami pra «bieśpieraškodny propusk praz mytniu «Kamienny Łoh» damoviŭsia Vysocki dy inšyja mytniki. Była dasiahnutaja damova z Muratavym, heta adbyłosia ŭ Litvie, z Haniškinym (na terytoryi Ašmianskaha rajonu), ź inšymi pastaŭščykami, u tym liku na terytoryi Rasiei.
Pavodle śledztva, chabary ad pradstaŭnikoŭ firmaŭ pieradavalisia ŭ Vilni, u Maskvie, u Miensku ŭ Nacyjanalnym aeraporcie, na terytoryi punktu «Kamienny Łoh», kala vioski Šyrajeva, na darozie pamiž Navapołackam i Połackam dy ŭ inšych miescach. U abvinavačańni ŭkazanyja dakładnyja daty, kali heta adbyvałasia.
Usiaho hrupoŭka, ź jakoj byŭ źviazany Jurkojć, nibyta atrymała kala 600 tysiač dalaraŭ ZŠA, albo bolš za 8 miljardaŭ rubloŭ da denaminacyi. Hrošy byli raźmierkavanyja pamiž usimi ŭdzielnikami hrupy. Jurkojć nibyta atrymaŭ 12 tysiač 700 dalaraŭ ZŠA. Paviedamlajecca, što jon nibyta atrymlivaŭ hrošy na terytoryi punktu Kamienny Łoh, na aŭtamabilnaj stajancy ŭ Astraŭcy dy ŭ inšych miescach.
Za što atrymlivali chabary?
Adzin prykład z abvinavačańnia: Jurkojć nibyta «aformiŭ na ŭkazańnie Karpoviča transpartny srodak, jaki prajechaŭ na adras firmy «Bałtyjski padarunak» 24.02.2014, za što arhanizavanaja złačynnaja hrupa atrymała 200 dalaraŭ ZŠA». Potym hučali inšyja daty: 28.02, 04.03, 04.03, 25.04 — i taksama šmat razoŭ u 2013, 2014 hodzie. Usiaho bolš za 40 vypadkaŭ. Hruzy išli taksama na adras inšych firmaŭ: «Naš sad», «Kryštal», «Kalipsa», «Milenijum», «Eldarada», «Harmonija», «Akapeła» dy inšych.
Sumy chabaru atrymanych hrupaj adnarazovych chabaraŭ z aŭtamabilaŭ, jakija aformiŭ Jurkojć, byli ad 260 da 80 dalaraŭ ZŠA, śćviardžajecca ŭ abvinavačańni.
Było 2 vypadki, kali Jurkojć aformiŭ aŭtamabil z hruzam «na ŭkazańnie Maroz», astatnija — «na ŭkazańnie Karpoviča».
Pavodle abvinavačańnia, Aleś Jurkojć učyniŭ złačynstva, praduhledžanaje častkaj 3 artykułu 430 Kryminalnaha kodeksu — heta atrymańnie chabaru ŭ asabliva vialikim pamiery ŭ składzie arhanizavanaj hrupy.
Viadoma, što da sudu Aleś Jurkojć nie pryznavaŭ siabie vinavatym. Jaho ŭtrymlivajuć pad vartaj bolš za 20 miesiacaŭ, u sudzie mytnika trymajuć u žaleznaj kletcy razam ź jašče 4 byłymi kalehami.
Siońnia na pasiedžańni Jurkojć zajaviŭ, što nie razumieje vystaŭlenaje jamu abvinavačańnie:
«Ja prosta vykonvaŭ svaju pracu. Sankcyju i sutnaść artykułu 430 ab chabary ja razumieju, a ŭ čym mianie abvinavačvajuć, nie razumieju. Nivodnaha faktu i nivodnaha dokazu ja nie pračytaŭ. Sa słovaŭ uvieś čas roznyja rečy paviedamlajuć. Mnie hetak i nie zmahli davieści, u čym ja vinavaty. Viny nie pryznaju całkam».
U sudovaj zale, pakul idzie praces, prysutničajuć hramadzkija aktyvisty i siabry Alesia Jurkojcia.
Inšym padsudnym u spravie 11 ašmianskich mytnikaŭ inkryminavanyja chabary ad 8 da 18 tysiač dalaraŭ. Kiraŭnikoŭ Ašmianskaj mytni, jakija fihurujuć u tym liku ŭ hetaj spravie, sudziać asobna ŭ Mienskim abłasnym sudzie.
Kamientary