COVID-19 — chutčej za ŭsio, łabaratornaha pachodžańnia. Siensacyjny vynik rasśledavańnia
Śpiecyjalny padkamitet pa pandemii karanavirusa Pałaty pradstaŭnikoŭ ZŠA zaviaršyŭ dvuchhadovaje rasśledavańnie pa pytańniach pandemii COVID-19. Kanhresmieny pryjšli da vysnovy, što abaviazkovaje našeńnie masak było, chutčej, niepatrebnym, a łakdaŭny — škodnymi. Mnohija navukoŭcy ličać takija vysnovy palityčna matyvavanymi.
Vynikam staŭ dakład pad nazvaj «Analiz dziejańniaŭ padčas pandemii COVID-19: vyniesienyja ŭroki i šlach napierad». U sieradu, 4 śniežnia, padkamitet praviadzie karekcyju kančatkovaha dakłada i aficyjna nakiruje jaho Kanhresu.
Znajomim z hałoŭnymi vyvadami rasśledavańnia.
COVID-19 byŭ štučna stvorany? Piać arhumientaŭ «za»
Pavodle raparta, COVID-19, «chutčej za ŭsio, uźnik u łabaratoryi va Uchani, Kitaj». Voś asnoŭnyja arhumienty na karyść hetaj viersii:
- Virus maje bijałahičnuju asablivaść, jakaja nie sustrakajecca ŭ pryrodzie.
- Danyja pakazvajuć, što COVID-19 raspaŭsiudziŭsia z adnoj krynicy zaražeńnia.
- Uchań źjaŭlajecca miescam raźmiaščeńnia najvažniejšaj kitajskaj łabaratoryi dla daśledavańniaŭ SARS, jakaja viadomaja praviadzieńniem ekśpierymientaŭ z pavyšeńniem funkcyj virusaŭ pry niedastatkovym uzroŭni bijałahičnaj biaśpieki.
- Za niekalki miesiacaŭ da aficyjnaha vyjaŭleńnia COVID-19 navukoŭcy z Uchańskaha instytuta virusałohii zachvareli na virus, padobny da hetaha virusa.
- Kali b isnavali dokazy naturalnaha pachodžańnia virusa, jany najpraŭdapadobniej užo byli b znojdzieny.
SAAZ dziejničała pad ciskam Kitaja, a łokdaŭny byli niepatrebnyja
Rapart vostra krytykuje Suśvietnuju arhanizacyju achovy zdaroŭja.
«Reakcyja SAAZ na pandemiju COVID-19 była poŭnaj niaŭdačaj, bo arhanizacyja paddałasia cisku z boku Kamunistyčnaj partyi Kitaja i pastaviła palityčnyja intaresy Kitaja vyšej za svaje mižnarodnyja abaviazki», — havoracca ŭ im.
Padkamitet taksama krytyčna acaniŭ niekatoryja miery, pryniatyja padčas pandemii COVID-19, takija, jak sacyjalnaje dystancyjavańnie, abaviazkovyja maski i łakdaŭny.
U dakładzie śćviardžajecca, što rekamiendacyja trymać adlehłaść 6 futaŭ (prykładna 1,8 mietra) była advolnaj i navukova nieabhruntavanaj.
Što da masak, aŭtary dakłada źviartajuć uvahu na toje, što ich efiektyŭnaść sumnieŭnaja, a amierykanskija čynoŭniki achovy zdaroŭja źmianiali svaje pazicyi pa hetym pytańni «bieź jasnych navukovych abhruntavańniaŭ».
(Dla daviedki: apublikavany ŭ mai biahučaha hoda mietaanaliz bolš za 400 daśledavańniaŭ, praviedzieny Oksfardskim univiersitetam, pakazaŭ, što maski i reśpiratary ŭsio ž efiektyŭna źnižajuć pieradaču infiekcyj dychalnych šlachoŭ, u tym liku COVID-19.)
Pavodle dakłada, praciahłyja łakdaŭny nanieśli vialikuju škodu dla ekanomiki i psichičnaha zdaroŭja ludziej, asabliva maładych. Zamiest taho, kab zasiarodzicca na abaronie najbolš uraźlivych hrup, dziaržaŭnaja palityka prymusiła miljony ludziej admovicca ad važnych aśpiektaŭ zdarovaha žyćcia, ličać aŭtary dakłada.
Imaviernaść palityčnaha składniku
U dakładzie dziejańni administracyi Džo Bajdena ŭ spravie COVID-19 hałoŭnym čynam krytykujucca, u toj čas jak rašeńni administracyi Donalda Trampa amal zaŭsiody pradstaŭlajucca ŭ pazityŭnym śviatle. Heta stvaraje ŭražańnie praduziataści, prynamsi ŭ peŭnych častkach dakłada.
Varta nahadać, što padkamitet byŭ stvorany demakratami ŭ 2020 hodzie pa inicyjatyvie śpikierki Pałaty pradstaŭnikoŭ Nensi Pełasi.
U pieryjad demakratyčnaj bolšaści płanavałasia, što asnoŭnaj zadačaj padkamiteta budzie zabieśpiačeńnie prazrystaści ŭ vykarystańni srodkaŭ dapamohi ŭ suviazi z pandemijaj.
Adnak u pačatku 2023 hoda padkamitet byŭ rearhanizavany. Pad kiraŭnictvam respublikanskaha kanhresmiena Breda Venstrapa abšar jaho zadač pašyryŭsia: dadaŭsia analiz pachodžańnia virusa, vydatkaŭ urada na baraćbu z pandemijaj, a taksama realizacyi mier achovy zdaroŭja, takich jak abaviazkovyja maski i vakcynacyja.
Dziadula ź Viciebska zapościŭ fota sa skrynkaj ad televizara i staŭ zorkaj tyktoku. A jaho siabar pieratvaryŭsia ŭ miem4
Kamientary