Kaścioła ŭ skviery Kotaŭka nie budzie. Prajekt pieraniasuć na vulicu Niakrasava
Na pabudovie kaścioła ŭ Kotaŭcy ŭžo možna stavić kropku. Śviatyni ŭ skviery nie budzie. Pra heta karespandentu časopisa «Ave Maria» paviedamiŭ probašč parafii svv. Apostałaŭ Piatra i Paŭła i Jaŭhiena de Mazeno ajciec Dźmitryj Zaniamonski OMI.
«Kaścioł u skviery Kotaŭka nie budzie pabudavany. Nam byŭ prapanavany novy ŭčastak ziamli, i my dali zhodu na jaho. Mitrapalit Tadevuš Kandrusievič hetuju prapanovu zaćvierdziŭ. Ciapier viadziecca praca pa padrychtoŭcy nieabchodnaj dakumientacyi», — raspavioŭ a. Dźmitryj.
Pavodle słovaŭ śviatara, novy ŭčastak dla budaŭnictva kaścioła budzie raźmieščany «ŭ zonie hramadskaj zabudovy pa vulicy Niakrasava».
«Niejkuju častku raniej raspracavanaha prajekta kaścioła treba źmianić. Naprykład, źviazanuju z padmurkam i sietkami, tamu što heta novaja terytoryja, a značyć — užo novyja ŭmovy», — zaŭvažyŭ ajciec Dźmitryj u svaim kamientary.
Nahadajem, što pieršapačatkova śviatyniu płanavałasia pabudavać u minskim skviery Kotaŭka. Dla hetaha budaŭnictva, pavodle słovaŭ mitrapalita Tadevuša Kandrusieviča, byŭ atrymany nieabchodny dazvoł ad prezidenta, adnak u mai minułaha hoda, kali ŭ skvier pryjechała bryhada «Zielanbudu», kab padrychtavać učastak i vysiekčy nieabchodnuju častku drevaŭ, joj pieraškodziła hrupa miascovych žycharoŭ i aktyvistaŭ «Zialonaj sietki». Pratestujučyja zajaŭlali, što budaŭnictva nie maje zakonnych padstavaŭ.
U vyniku šmatlikich pratestaŭ «zialonych» i miascovych žycharoŭ budaŭnictva było prypyniena da śniežnia 2016 hoda, kali situacyja paŭtaryłasia. Staršynia Minharvykankama Andrej Šorac zajaviŭ na pres-kanfierencyi, što, «chutčej za ŭsio, u skviery ničoha budavać nie budziem». Takim čynam, budaŭnictva było spyniena, a potym pieraniesiena ŭ inšaje miesca.
Pieršapačatkovaj i pryjarytetnaj zadačaj dla minskich abłataŭ siońnia źjaŭlajecca pabudova kaścioła ŭ novym miescy.
«Važna, kab u nas źjaviłasia svajo miesca malitvy, sustrečy i katechizacyi, bo biez hetaha raźvićcio parafii ci niejkaje jaje žyćcio, niemahčymaje», — padkreśliŭ ajciec Dźmitryj Zaniamonski OMI.
Kamientary