Biełaruskaja piaciborka, na jakuju zvalicca miedal za Alimpijadu-2008: Łyžka była b dobraj da abiedu

Anastasija Prakapienka na Alimpijadzie ŭ Piekinie była čaćviortaj u sučasnym piaciborji (fiechtavańnie, kankur, płavańnie, bieh na vialikija dystancyi i stralba ź pistaleta). Praz vosiem hadoŭ u testach bronzavaj pryziorki ukrainki Viktoryi Cieraščuk znachodziać dopinh i dyskvalifikujuć. Biełaruska - treciaja, miedal pavinny uručyć joj.

«Nu, što ja adčuvaju… Łyžka była b dobraj da abiedu. Dobra było b adčuć siabie na pjedestale tam, padčas śviata. A postfaktum… Nu, pryjemna. Miedal znajšoŭ hieroja», - raskazvaje Jeŭraradyjo Anastasija.

Ci atrymaje Prakapienka razam z alimpijskim miedalom i hrašovuju premiju, jakuju ŭručajuć usim biełaruskim alimpijcam, jakija ŭzdymajucca na pjedestał? U 2008 hodzie za bronzu davali 30 tysiač dołaraŭ.

Mižnarodny Alimpijski kamitet pazbaviŭ ukrainku Viktoryju Cieraščuk bronzavaha alimpijskaha miedala pa piaciborstvie na hulniach 2008 hoda ŭ Piekinie.

Muž Anastasii Michaił ciapier zajmaje pasadu namieśnika staršyni Fiederacyi sučasnaha piaciborja. Jon kaža, što da uručeńnia miedala biełaruscy jašče daloka. «Litaralna ŭčora, 1 sakavika, my atrymali paviedamleńnie ad Mižnarodnaj fiederacyi sučasnaha piaciborja pra toje, što rašeńnie ab dyskvalifikacyi ukrainki nabyło moc. Ciapier va ukrainskaj fiederacyi jość 21 dzień, kab padać apielacyju ŭ spartyŭny arbitražny sud u Łazanu. Kali jana hetym pravam skarystajecca, to nieviadoma, na kolki zaciahniecca sudovaje raźbiralnictva. Chacia heta kaštuje hrošaj, i nie fakt, što ukrainka hetym pravam skarystajecca. Kali usio zastaniecca tak, jak jość ciapier, to Mižnarodny alimpijski kamitet budzie vyrašać, ci pieradavać miedal Anastasii. Pierad hetym, viadoma, buduć vyvučać i jaje dopinh-proby. My hetaha nie baimsia. Ale vinšavać možna budzie, kali MAK prymie rašeńnie pieradać miedal nam», - kaža Michaił Prakapienka.

Z premijalnymi situacyja taksama niaprostaja. Adnaznačnaha adkazu na hetaje pytańnie ŭ namieśnika kiraŭnika fiederacyi niama: «Heta ŭsio ŭ rukach kiraŭnictva spartyŭnaj haliny, napeŭna. Kali jany paličać patrebnym, to tady niejkija bonusy, napeŭna, buduć. Kali nie, to nie».

«Ciapier nijakaha tryumfu. Jość dobry nastroj, što voś, nie daremna starałasia, stolki hadoŭ patraciła na padrychtoŭku. Vystupaju jašče, rychtujusia da Tokia. Rychtujusia da nastupnaj Alimpijady… Dahetul ja zajmała pryzavyja miescy na etapach Kubka śvietu. Bronza i srebra byli na čempijanacie Jeŭropy. Ale hety miedal bolš prestyžny. Alimpijada!» - kaža Anastasija.

Što budzie dalej, jak uručać miedal? «Nie viedaju. Vierahodna, praz naš Alimpijski kamitet. Mahčyma, zładziać niejkuju cyrymoniju. Kali jašče budzie takoje, daj boh», - ścipła adkazvaje spartsmienka.

Na pytańnie Jeŭraradyjo ab vypłacie Anastasii Prakapienka premijalnych u pres-słužbie Minsportu adkazali koratka: «My takoha nie praktykujem». I dadali, što ŭ historyi biełaruskaha sportu ŭžo byli vypadki, kali našy alimpijcy «pieramiaščalisia» pa pjedestale na stupieńku vyšej praź niekalki hadoŭ paśla Alimpijady. U tych vypadkach ich premijalnyja nie pavialičvalisia.

Nie zabirajuć premijalnyja ŭ biełaruskich alimpijcaŭ, u jakich znajšli dopinh i zabrali miedal.

• 0
• 0
• 0
• 0
• 0
• 0
• 0
• 0