Nieandertalcy, jakija vymierli prykładna 40 tysiač hadoŭ tamu, jeli adzin adnaho. Navukoŭcy znachodzili ich kostki z paškodžańniami, jakija pakazvajuć na toje, što miasa ź ich źjeli.
Ale navošta nieandertalcy jeli adzin adnaho, da hetaha času nieviadoma. Daśledčyk z Univiersiteta Brajtana Džejms Koŭł vyrašyŭ vyśvietlić, ci vyhadna było jeści ludziej z punktu hledžańnia kałoryj, i pierakanaŭsia, što nie.
Dla pačatku Džejms Koŭł vyvučyŭ daśledavańni pra źmiest prateinu, vuhlavodaŭ i tłušču ŭ roznych častkach cieła čałavieka.
Ź ich vynikała, što ŭ sercy prykładna 650 kałoryj, u piečani - 2500 kałoryj, u ciahlicach - 32 tysiačy kałoryj i hetak dalej. Usiaho ŭ čałavieku kala 125 tysiač kałoryj. Hetyja paramietry ułaścivyja ludziam, jakija žyli ŭ 1940-50-ch hadach. Nieandertalcy byli bolš ukormlenymi, ale nie asabliva.
How many calories is that human? A nutritional guide for prehistoric cannibals https://t.co/UmO87bEhqV pic.twitter.com/v0c3cId70e
— The Verge (@verge) April 7, 2017
Kałaryjnaja kaštoŭnaść čałavieka.
Koŭł zatym vyvučyŭ, kolki kałoryj źmiaščajecca ŭ myšačnych tkankach žyvioł, jakich jeli nieandertalcy. Vyśvietliłasia, što,
kali źjeści ŭsie myšcy mamanta, možna atrymać 3,6 miljona kałoryj. Z šarścistaha nasaroha - 1,3 miljona kałoryj.
Pa enierhietyčnaj kaštoŭnaści ŭnutranych orhanaŭ staražytnych žyvioł dadzienych niama, tamu vučony paraŭnoŭvaŭ tolki enierhietyčnuju kaštoŭnaść myšačnaj tkaniny. Paraŭnańnie atrymałasia nie na karyść nieandertalcaŭ.
Miasa adnaho suplamieńnika 25 darosłym nieandertalcam nie chapiła b i na dzień, a mamantam možna było charčavacca miesiac.
Džejms Koŭł robić vysnovu, što, imavierna, nieandertalcy jeli adzin adnaho nie dziela charčavańnia. Inšyja navukoŭcy, jakija nie ŭdzielničali ŭ daśledavańni Koŭła, adznačajuć, što jon padyšoŭ da pytańnia ź cikavaha boku, ale naŭrad ci kali-niebudź možna budzie napeŭna skazać, navošta nieandertalcy jeli adzin adnaho.
Pakul niama ŭpeŭnienaści, zabivali jany suplamieńnikaŭ dziela ježy, jeli pamierłych ci adzin adnaho padčas relihijnych rytuałaŭ. Sam Koŭł schilajecca da viersii ab rytualnym pajadańni.
Kamientary