Biełarusku pavinny sudzić u ZŠA za kantrabandu avijadetalaŭ u Rasiju, ale adździeł mihracyi choča jaje jak nielehałku departavać da suda
Biełarusku, ekstradavanuju ŭ ZŠA za kantrabandu avijadetalaŭ paśla pačatku vajny, mohuć prosta departavać.
Hramadzianka Biełarusi Jana Lavonava, jakuju ekstradavali z Francyi ŭ ZŠA pavodle abvinavačvańnia ŭ kantrabandzie avijacyjnaha abstalavańnia ŭ Rasiju ŭ abychod sankcyj, apynułasia ŭ niečakanaj pravavoj kalizii. Jaje mohuć departavać z ZŠA jašče da pačatku sudovaha pracesu, paviedamlaje The Washington Post.
Fiederalnyja prakurory bolš za hod pracavali nad ekstradycyjaj biełaruski, abvinavačanaj u kantrabandzie kanfidencyjnaha amierykanskaha avijacyjnaha abstalavańnia na sumu bolš jak 2 miljony dalaraŭ u Rasiju padčas vajny suprać Ukrainy. Ale sprava moža razvalicca, bo abvinavačanaja Jana Lavonava ciapier ryzykuje być departavanaj da pačatku suda.
Lavonava była zatrymanaja ŭ Francyi ŭ vieraśni 2024 hoda, a ŭ listapadzie 2025 hoda jaje ekstradavali ŭ ZŠA, dzie joj vystavili abvinavačvańnie pavodle 10 punktaŭ, u tym liku ŭ machlarstvie, kantrabandzie i admyvańni hrošaj.
Prablema ŭ tym, što lehalny termin znachodžańnia Lavonavaj u ZŠA, kudy jaje dastavili suprać jaje voli dla suda, skončyŭsia praz dva tydni paśla jaje prybyćcia. U dačynieńni da jaje byŭ vydadzieny zapyt na zatrymańnie z metaj departacyi.
Na sudovym pasiadžeńni 8 śniežnia sudździa Zia M. Faruki nazvaŭ situacyju «kafkijanskaj».
«Urad pavinien vyznačycca z pryjarytetami: abo nakručvać statystyku departacyj, abo pieraśledavać mierkavanych złačyncaŭ, — zajaviŭ sudździa. — Prosta absurdna i abraźliva, što ŭrad dastaŭlaje kahości ŭ Złučanyja Štaty suprać jaho voli, a potym viartajecca da zatrymańnia ICE [imihracyjnaj słužbaj] na toj padstavie, što hety čałaviek znachodzicca tut «nielehalna».
Prakuratura prosić Ministerstva ŭnutranaj biaśpieki (DHS) nadać Lavonavaj lehalny status dla praviadzieńnia suda.
Pradstaŭnik DHS zajaviŭ, što nie piarečyć, ale čakaje farmalnaha zapytu ad pravaachoŭnaha viedamstva.
Abarona Lavonavaj apisvaje jaje jak «supracoŭnicu nizkaha ranhu», jakaja nie atrymlivała prybytku, akramia zarobku, i zajaŭlaje, što jana nie choča trapić u imihracyjnuju turmu.
Sudździa Faruki pastanaviŭ, što kali DHS admovicca dać Lavonavaj časovy lehalny status, sud razhledzić mahčymaść nadać taki status samastojna.
Zhodna z abvinavačvańniem, paśla pačatku poŭnamaštabnaha ŭvarvańnia Rasii va Ukrainu Lavonava pry spryjańni saŭdzielnikaŭ, jakija znachodzilisia na terytoryi ZŠA, arhanizavała niezakonnyja zakupki i vyvaz u Rasiju avijacyjnaha abstalavańnia i inšych detalaŭ.
81‑hadovuju maci aŭtaryteta Skitova z «Babulinaj krynki» kinuli ŭ SIZA KDB, kab jon narešcie zahavaryŭ8
Kamientary