U Bieraści trenercy pa mastackaj himnastycy dali dva hady za ździeki ź dziaŭčatak‑vychavanak.
U Bieraści trenercy pa mastackaj himnastycy dali dva hady za ździeki ź dziaŭčatak‑vychavanak.
U kalaspartovych kołach Bieraścia abmiarkoŭvajuć zdareńnie z byłoj staršaj trenerkaj zbornaj Bieraściejskaj vobłaści pa mastackaj himnastycy Tamaraj Syrakvaškaj: jaje niadaŭna asudzili za žorstkaje abychodžańnie z svaimi vychavankami, paviedamlaje «SB-Biełaruś Siehodnia».
«U sporcie biaz kryku ničoha nie dabješsia. Sapsavali trenercy žyćcio j karjeru», — kažuć adnyja. «Źbivać dziaciej — heta złačynstva», — upeŭnienaja prakurorka Leninskaha rajonu Bieraścia Alena Płyšeŭskaja, jakaja ŭ sudzie padtrymała abvinavačańnie.
Baćki pryviali Danu ŭ himnastyku, ledź joj tolki spoŭniłasia 6 hadoŭ. Ź pieršaha dnia trenerkaj była Tamara Syrakvaška. Dana była samaj maleńkaj u hrupie, i nia ŭsio ŭ jaje atrymlivałasia adrazu.
«Jana biła mianie rukami, svaimi tapkami, biła pa nahach, tvary, kryčała niecenzurnyja słovy. Kazała mnie prynieści skakałku, potym zabirała jaje j biła mianie», — raskazvaje 11‑hadovaja dziaŭčynka.
Adnojčy na zborach u Dany štości nie załadziłasia, i Tamara Alaksandraŭna va ŭsich na vačach… źniała ź dziaŭčynki štany, a paśla j trusy.
U sakaviku 2006 hodu Dana apynułasia ŭ balnicy.
— Dačku stali turbavać hałaŭnyja boli, jaje błažyła. My dumali, ci, barani Boh, nie puchlina hałaŭnoha mozhu. Paśla abśledavańnia lekary zrabili vysnovu, što heta reakcyja dzicia na źniešniaje fizyčnaje ci psychalahičnaje ŭździejańnie, — kaža maci dziaŭčynki Volha Łoś.
Niadaŭna sud Leninskaha rajonu Bieraścia razhledzieŭ spravu pa artykule Kryminalnaha kodeksu «Katavańnie». Ciapier biespracoŭnaja Tamara Syrakvaška pryznanaja vinavataj i prysudžanaja da dvuch hadoŭ abmiežavańnia voli biez nakiravańnia ŭ vypraŭlenčuju ŭstanovu adkrytaha typu.
Ale vinavataj trenerka siabie nia ličyć. Pracavać ź dziećmi joj nie zabaranili, bo na momant sudovych raźbiralnictvaŭ aficyjna jana była biaz pracy.
Fota z archivu Volhi Łoś, «SB-Biełaruś Siehodnia»
Kamientary