Što pra ekanamičny šantaž Biełarusi piša rasiejskaja presa?
Što pra ekanamičny šantaž Biełarusi piša rasiejskaja presa?
Hazeta «Kommiersant'» sa spasyłkami na svaje krynicy ŭ rasiejskim uradzie nadrukavała 12 traŭnia materyjał, u jakim śćviardžajecca, nibyta Ŭładzimier Pucin padpisaŭ daručeńnie spynić subsydyjavańnie biełaruskaj ekanomiki z raźlikam na toje, što ŭ Alaksandra Łukašenki nie zastaniecca vyjścia z systemnaha ekanamičnaha kryzisu i jon sam paprosicca ŭ Rasieju.
«Kommiersant'» piša, što Maskva rychtujecca da šyrokamaštabnaha nacisku na Miensk: na hazavym, naftavym, elektryčnym, chimičnym (kalijnym), metałaprakatnym, charčovym i inšych nakirunkach. Vynikam jaho musić stać stvareńnie adzinaj dziaržavy na ŭmovach Maskvy. Na hazavym kirunku Rasieja nastojvaje na kantroli «Hazpromu» nad biełaruskimi hazapravodami. Pry hetym aficyjna ŭžo niekalki razoŭ paćvierdžana, što cana na haz u nastupnym hodzie dla Biełarusi vyraście ŭ kožnym razie.
Zhodna ź infarmacyjaj «Kommiersanta», Pucin zahadaŭ «pryniać vyčarpalnyja miery» z metaj spynieńnia datacyjaŭ Rasiejaj biełaruskaj ekanomiki, a taksama reekspartu j kantrabandy rasiejskich tavaraŭ (pieradusim enerhanośbitaŭ) praz terytoryju krainy. I – hałoŭnaje – pravieści reviziju ŭsich damovaŭ, što rehlamentujuć rasiejska-biełaruskija adnosiny.
Pra toje samaje paviedamlajuć u aŭtorak «Novyje iźviestija»: «Nad prezydentam Biełarusi znoŭ zhuščajucca chmary. Uzmacniajecca cisk z boku Maskvy, što pahražaje padvysić canu na haz i spynić subsydyjavańnie biełaruskaj ekanomiki… Centralnyja rasiejskija ŚMI apošnimi dniami razharnuli cełuju pijar-kampaniju na temu spynieńnia finansavych i inšych ŭlivańniaŭ u biełaruskuju ekanomiku. U Miensku ž hetyja syhnały zaŭvažać nie žadajuć. Nia vyklučana, što pry stracie rasiejskaj padtrymki Łukašenka moža źviarnucca da rytoryki nacyjanalnaj apazycyi. Maŭlaŭ, abaronim naš suverenitet ad imperskaj Rasiei!»
Bolš za ŭsio Rasieja hublaje na h.zv. «schavanaj» formie reekspartu praz ekspart naftapraduktaŭ u Biełarusi. Biełaruś nia spłačvaje ekspartnych mytaŭ pry pastaŭkach nafty (u adroźnieńnie ad rasiejskich zavodaŭ), a naftapradukty pradajucca pa eŭrapiejskich cenach. Atrymlivajecca, što hublaje rasiejski biudžet, a biełaruski, naadvarot, napaŭniajecca. Ahułam Biełaruś ekspartuje 13 młn ton naftapraduktaŭ u hod, siarod jakich kala 60% prychodzicca na daččynyja struktury rasiejskich kampanijaŭ, jakim taksama vyhadna hetaja schiema, paviedamlaje «Kommiersant».
«Z pavyšeńniem cenaŭ na haz i spynieńniem subsydyjavańnia naftavaha ekspartu, – robić vyvad «Kommiersant», – Maskva naniasie pa A.Łukašenku surjozny palityčny ŭdar, i Miensk albo budzie vymušany pajści na ŭmovy Maskvy, albo apyniecca pierad pahrozaj mocnych ekanamičnych i sacyjalnych pieratrusaŭ». A słovami krynicy hazety ŭ Kramli, «adziny sposab dla Biełarusi atrymlivać haz pa ŭnutryrasiejskich cenach – heta ŭvachod u skład Rasiei».
«Biełaruś ŭ kanstruktyŭnym klučy papiaredzili, što my budziem vychodzić na standartnyja ŭmovy pastavak hazu», – cytuje rasiejski «Interfaks» svajho surazmoŭcu «z rasiejskich uradavych kołaŭ» z rasiejskich uradavych kołaŭ, jaki padkreślivaje, što «raźlik za haz było b vieści našmat praściej, kali b u Biełarusi j Rasiei isnavała adzinaja valuta».
Mienš kankretna, ale nia mienš žorstka vykazaŭ aficyjnuju pazycyju «Hazpromu» dla radyjo «Echo Moskvy» pres-sakratar kampanii Siarhiej Kupryjanaŭ: «Nam treba zrazumieć, jakija kroki ŭ hetym hodzie Biełaruś zrobić dla «Hazpromu» dla zdavalnieńnia našych ekanamičnych patrebaŭ».
«Vriemia novostiej» padkreślivaje, što «prapanova «Hazpromu» nie znajšła naležnaha vodhuku ŭ Miensku, jaki zhodny tolki na 11-adsotkavuju indeksacyju hazavych cenaŭ. A kali ŭličyć, što namieśnik staršyni praŭleńnia «Hazpromu» Alaksandar Razanaŭ prapanavaŭ raspačać razmovu pra pierachod na eŭrapiejski ŭzrovień cenaŭ dla Biełarusi sa 150 dalaraŭ za tys. kuboŭ (u try razy bolš, čym ciapier), dyk prapanovy Miensku vyhladajuć jak ździek».
A hazeta «Viedomosti» ŭ aŭtorak piša, što dla samoj Rasiei nizkija ceny na enerhanośbity mohuć stacca vialikaj prablemaj, bo «Eŭrakamisija prapanavała SHA ličyć unutranyja ceny na enerhanośbity dla rasiejskich vytvorcaŭ zabaronienaj subsydyjaj». I nastojvać na ich pavieličeńni pad pahrozaj niedałučeńnia Rasiei da Suśvietnaj handlovaj arhanizacyi. U hetym hodzie dla rasiejskich kampanijaŭ haz kaštuje $43,12 za 1000 kub. m, a kantraktnaja cana dla Eŭropy – kala $250.
Tymčasam «Hazieta»paviedamlaje pra vialiki mižnarodny skandał, źviazany sa schiemaj spažyvańnia hazu Ŭkrainaj, što kančatkova pierakryvaje mahčymaść ažyćciaŭleńnia analahičnaha scenaru ŭ dačynieńni da Biełarusi (heta kali «Hazprom» nabyvaje haz faktyčna ŭ siabie samoha j pierapradaje va Ŭkrainu pa mienšych cenach, ale vałodaje tranzytam centralnaazijackaha hazu). Minjust ZŠA šukaje vaładaroŭ pałovy akcyjaŭ kampanii «RosUkrEnierho», zarehistravanaha ŭ Švajcaryi, paviedamlaje «Hazieta» (druhaja pałova naležyć «Hazpromu»). Heta mohuć być maskoŭskija čynoŭniki, piša hazeta.
Narešcie, hazeta «Biźnies» 16 traŭnia analizuje: ««Hazprom» atrymaŭ ad Biełarusi prava admovicca ad budaŭnictva Paŭnočna-eŭrapiejskaha hazapravodu na karyść druhoj čarhi hazapravodu «Jamał–Eŭropa», pad jaki ŭ Biełarusi nibyta ŭžo adviedzienaja ziamla. Na samaj spravie aptymizm Biełarusi adnabakovy: "Nijakich rašeńniaŭ što da budaŭnictva druhoj čarhi hazapravodu «Jamał–Eŭropa» nie pryniata, bolš za toje, pieramovy navat i nie raspačynalisia», – zajaviŭ hazecie pres-sakratar «Hazpromu» Siarhiej Kupryjanaŭ.
Źmicier Dryhajła, Maskva
Kamientary