Na palihonie pad Barysavam utylizavali bombu, jakuju dniom raniej znajšli pry znosie vystavačnaha kompleksu «Biełekspa» ŭ Minsku. Sapiory vyvieźli jaje ŭ biaśpiečnaje miesca. Videa padryvu apublikavała MUS.
Niamieckuju avijabombu časoŭ Druhoj suśvietnaj vajny znajšli 13 krasavika padčas znosu kompleksu «Biełekspa» ŭ centry Minska. Miarkujučy pa zdymkach apieratyŭnych słužbaŭ, jana znachodziłasia pad ziamloj niedaloka ad prystupak, jakija viaduć da centra.
Heta avijabomba SC250 masaj 250 kh (ź ich 128 — vybuchovaje rečyva). Radyus raźlotu askiepkaŭ u takoha snarada — da 2 km.
Jak paviedamlaje MUS, ekskavatarščyk vyniaŭ jaje z katłavana hłybinioj kala 2 mietraŭ i pakinuŭ na budplacoŭcy. Na miesca vyjazdžali sapiory ŭnutranych vojskaŭ MUS pad kamandavańniem padpałkoŭnika Maksima Kula.
«Akramia taho na miescy praviadzieńnia budaŭničych rabot sapiory taksama vyjavili niekalki davoli vialikich frahmientaŭ inšaj avijabomby, jakaja ŭžo kaliści razarvałasia», — kažuć u pres-słužbie viedamstva.
«Učorašni ekskavatarščyk u «BiełEkspa» [jaki znajšoŭ bombu] — prykład važnaści zachavańnia techniki biaśpieki zaŭsiody i ŭsiudy. Žyvy prykład, na ščaście», — napisaŭ paźniej u tvitary aficyjny pradstaŭnik MNS Biełarusi Vital Navicki.
Kamientary