Chłopiec, jaki vioŭ viciebski «Marš niedarmajedaŭ», zajaviŭ, što jamu «abiacali za heta 50 rubloŭ». Padmanščyku ŭsio adno dali 15 sutak

U Kastryčnickim rajsudzie Viciebsku siońnia raźbirali spravu Juryja Łynšy — chłopca, jaki išoŭ na čale kalony 26 lutaha, kali ŭ Viciebsku adbyvaŭsia «Marš niedarmajedaŭ».

Pavialičyć

Jury žyvie ŭ Miensku, u viciebskich demakratyčnych kołach pra jaho nichto nia čuŭ. Tamu na «maršy», kažuć miascovyja aktyvisty, jany byli ździŭlenyja, kali vysoki nieznajomiec z ryžavataj barodkaj pačaŭ vyhukvać «kryčałki»: «Nie — dekretu numar try, Łukašenka, sychodź», «Basta!» i hetak dalej. Kali ludzi rušyli pa vulicy Lenina ŭ centar horadu, nieviadomy pajšoŭ na čale kalony. U interviju 27-hadovy Jury Łynša kazaŭ, što žyvie ŭ Miensku, u Viciebsk pryjechaŭ admysłova, što źbirajecca stvaryć ułasnuju partyju, što padzialaje pohlady pradstaŭnikoŭ apazycyi.

Paśla imprezy Juryja Łynšu zatrymali na čyhunačnym vakzale i advieźli ŭ Kastryčnicki RAUS. Tut užo była zatrymanaja kaardynatarka arhkamitetu pa stvareńni partyi BCHD Taciana Sieviaryniec, jana pamiataje hetaha chłopca ŭ pastarunku:

«Mianie zabrali ŭ milicyju prosta z kramy, tamu ŭ mianie akazalisia z saboj charčy. I ja prapanavała Juryju pajeści. My razmaŭlali, heta byŭ adekvatny chłopiec. Na nas abaich składali pratakoły pavodle artykuła 23.34. Siońnia jon vyhladaŭ trochi dziŭna: pryjšoŭ u sud z pabitym tvaram. Praŭda, patłumačyŭ, što heta da spravy adnosin nia maje — što jaho źbili za niejkija pazyki. Sudździa Alesia Žarykava pierad razboram spravy zhadała, što sioleta jon pryciahvaŭsia da adkaznaści piać razoŭ — u tym liku za chulihanstva, i heta taksama troški naściarožyła. Ale toje što daviałosia pačuć ad jaho ŭ zali sudu, mianie prosta šakavała. I heta jašče nadta miakka skazana!»

Pavialičyć

Za «Marš niedarmajedaŭ» na chłopca skłali pratakoł pavodle častki 2 artykuła 23.34 — jak na arhanizatara niesankcyjanavanaj akcyi. Jury pačaŭ asprečvać heta, raskazaŭšy sudu absalutna nievierahodnuju dla miascovych žycharoŭ historyju:

«Ja nia viedaju Viciebsku, ja pryježdžy. Pryjechaŭ ranicaj, kab prosta pahladzieć horad. Na vulicy Frunze mianie sustreła žančyna hod pad 50, u čyrvona-karyčnievym palito, i prapanavała zarabić 50 rubloŭ. Skazała, što dla hetaha mnie treba ŭziać bieł-čyrvona-bieły ściah i vyvučyć kryčałki dla «Maršu niedarmajedaŭ». Ja pahadziŭsia, bo biespracoŭny. Jana nakiravała mianie da ŭnivermahu, dzie mianie sustreŭ mužčyna, jaki nazvaŭsia Alaksiejem, jon daŭ mnie bieł-čyrvona-bieły ściah. U jaho była vuda, my pačapili ściah i pajšli da płoščy Pieramohi, dzie źbiralisia ludzi».

Prysutnyja ŭ zali sudu ludzi, jakija pryjšli padtrymać Juryja Łynšu, byli prosta ahałomšanyja: ničoha padobnaha ŭ Viciebsku nia čuli.

Pavialičyć

Ździŭleńnie prysutnych stała jašče bolšym, kali sudździa pračytała pratakoł zatrymańnia. Akazvajecca, pra «50 rubloŭ za ŭdzieł u akcyi» Jury Łynša kazaŭ milicyjantam jašče 26 lutaha, adrazu pa zatrymańni.

Ale na sud apoviedy pra biednaść i abiacany zarobak uražańnia nie zrabili: sudździa Alesia Žarykava pakarała chłopca aryštam na 15 sutak. Hetaksama jak i inšych viciablan, jakich milicyja zaličyła va ŭdzielniki niesankcyjanavanych imprezaŭ u Dzień Voli i 26 sakavika.

Ale nichto z tych, kaho raniej vinavacili za ŭdzieł u roznych akcyjach, ni razu nie spasyłaŭsia na niejkich ujaŭnych asobaŭ, hatovych zapłacić za vychad sa ściaham, aburajecca Taciana Sieviaryniec:

«Ničoha padobnaha ŭ Viciebsku nikoli nie było! Słovy Juryja prahučali jak abraza ŭsioj viciebskaj demakratyčnaj supolnaści! Viadoma, heta poŭnaja łuchta i vydumki, što za ŭdzieł u akcyjach niechta płacić. Čamu ž milicyja nie šukaje taho «Alaksieja», jaki razdaje ściahi? Abo žančynu, jakaja abiacaje pieršamu strečnamu 50 rubloŭ? Jasna, što heta chłuśnia! Ale navošta tak chłusić chłopcu, jaki išoŭ pad našym ściaham? Bieł-čyrvona-bieły ściah — dla kožnaha biełarusa heta śviatoje, a Jury jaho zhańbiŭ!»

Pavialičyć

Sam Jury Łynša paśla sudu zajaviŭ žurnalistam, što ŭsio prydumaŭ — i pra žančynu, jakaja abiacała zapłacić, i pra mužčynu, u jakoha ŭziaŭ ściah. Na pytańnie, navošta jon heta zrabiŭ, adkazaŭ karotka: «Tak było treba. U mianie składanyja žyćciovyja abstaviny. Kali mianie zatrymali 26 lutaha, to ŭ milicyi na mianie nacisnuli». U toj ža čas, pa jahonych słovach, historyju z žančynaj, jakaja prapanavała jamu 50 rubloŭ za bieł-čyrvona-bieły ściah i «kryčałki», jon prydumaŭ sam.

Dziŭnym dla aktyvistaŭ padałosia i toje, što paśla sudu Juryja Łynšu nie zabrali «na sutki» kanvojnyja milicyjanty. Paśla pracesu da jaho pryjechaŭ načalnik adździełu achovy pravaparadku i prafilaktyki Kastryčnickaha RAUS Siarhiej Viaraksa, i jany pra niešta doŭha razmaŭlali ŭ budynku sudu.

• 0
• 0
• 0
• 0
• 0
• 0
• 0
• 0