Byłaja pieršaja łedzi Paŭdniovaj Karei asudžana na 20 miesiacaŭ turmy pa abvinavačańni ŭ karupcyi
Raniej byŭ asudžany jaje muž, i tamu ŭpieršyniu ŭ historyi Paŭdniovaj Karei kryminalnyja prysudy adnačasova vyniesieny abodvum čalcam byłoj prezidenckaj siamji.
Žonka adchilenaha ad ułady byłoha prezidenta Paŭdniovaj Karei Kim Hon Chi prysudžana da 20 miesiacaŭ pazbaŭleńnia voli za atrymańnie chabaraŭ ad relihijnaj arhanizacyi Carkva abjadnańnia, piša Bi-bi-si.
Pry hetym sud apraŭdaŭ 53‑hadovuju Kim Hon Chi pa abvinavačvańniach u machinacyjach z cenami na akcyi i parušeńni zakona ab palityčnych fondach.
Jaje muž, eks-prezident Jun Sok Jol, jakomu ŭ śniežni 2024 hoda abviaścili impičmient, raniej byŭ prysudžany da piaci hadoŭ turmy pa abvinavačvańni ŭ pieraškodzie aryštu. Centralny sud Sieuła vynies hety prysud 16 studzienia ŭ ramkach pieršaha rašeńnia pa spravie, źviazanaj z karotkačasovym uviadzieńniem vajennaha stanovišča eks-prezidentam u śniežni 2024 hoda.
Akramia taho, prakurory zapatrabavali prysudzić Jun Sok Jola da śmiarotnaha pakarańnia pa abvinavačvańni ŭ zmovie z metaj miaciažu. Pa viersii abvinavačvańnia, jon abviaściŭ vajennaje stanovišča, bo imknuŭsia ŭtrymacca va ŭładzie, zachapiŭšy kantrol nad sudovaj i zakanadaŭčaj halinami ŭłady.
Sud płanuje vynieści rašeńnie pa hetym abvinavačvańni 19 lutaha.
Upieršyniu ŭ historyi Paŭdniovaj Karei kryminalnyja prysudy adnačasova vyniesieny abodvum členam byłoj prezidenckaj pary.
Sprava byłoj pieršaj łedzi
U sieradu sudździa Centralnaha rajonnaha suda Sieuła U In Son pastanaviŭ, što Kim Hon Chi «vykarystoŭvała svajo stanovišča jak instrumient dla atrymańnia asabistaj vyhady».
«Čym vyšej stanovišča čałavieka, tym bolš śviadoma jon pavinien ścierahčysia padobnych pavodzin. Padsudnaja nie adchiliła prapanovy [ad Carkvy abjadnańnia] i była skancentravana na ŭpryhožvańni ŭłasnaha vobraza», — zajaviŭ sudździa.
Pa viersii śledstva, u pieryjad z krasavika pa lipień 2022 hoda Kim atrymała ad Carkvy abjadnańnia padarunki na sumu 80 młn von (56 tys. dalaraŭ), uklučajučy dyjamientavanyja karali Graff i niekalki sumak Chanel, — u abmien na dziełavyja i palityčnyja pasłuhi.
Abvinavačańnie patrabavała pryznačyć joj 15 hadoŭ pazbaŭleńnia voli i štraf u 2 młrd von (kala 1,5 młn dalaraŭ) pa ŭsich troch abvinavačvańniach, adnak sudździa ŭličyŭ, što Kim asabista nie patrabavała i nie vymahała chabary, a taksama što ŭ jaje «niama značnaha kryminalnaha minułaha».
Tym nie mienš sud abaviazaŭ jaje viarnuć 12,85 młn von (10 tys. dalaraŭ) najaŭnymi, a taksama pastanaviŭ kanfiskavać bryljantavaje karali.
Pa abvinavačvańniach u machinacyjach z cenami na akcyi i atrymańni biaspłatnych sacyjałahičnych apytańniaŭ ad palityčnaha pasiarednika pierad prezidenckimi vybarami 2022 hoda, jakija vyjhraŭ jaje muž, Kim była apraŭdana.
Kim taksama abvinavačvajecca ŭ mierkavanym pryciahnieńni paśladoŭnikaŭ Carkvy abjadnańnia ŭ kansiervatyŭnuju partyju «Siła naroda», u jakoj znachodziŭsia jaje muž, a taksama ŭ atrymańni padarunkaŭ u abmien na pryznačeńni na dziaržaŭnyja pasady. Hetyja spravy sudom pakul nie razhledžany.
Byłaja pieršaja łedzi admaŭlała ŭsie abvinavačvańni, nazyvajučy ich «hłyboka niespraviadlivymi», choć pryznała atrymańnie sumak Chanel, zajaviŭšy, što paźniej viarnuła ich, tak i nie skarystaŭšysia.
U žniŭni minułaha hoda, źjaviŭšysia na dopyt u sudzie, jana publična paprasiła prabačeńnia. «Mnie ščyra škada, što taki nikčemny čałaviek, jak ja, vyklikaŭ niepakoj u naroda», — skazała jana.
Rasśledavańnie suviaziaŭ Kim z Carkvoj abjadnańnia taksama pryviało da aryštu lidara carkvy Chan Chak Ča.
Akramia kryminalnych abvinavačvańniaŭ, Kim była zamiešana i ŭ inšych skandałach. U pryvatnaści, u minułym hodzie Žanočy ŭniviersitet Sukmion anulavaŭ jaje dypłom pa mastackaj adukacyi, atrymany ŭ 1999 hodzie, paśla taho jak kamisija pa etycy pryjšła da vysnovy, što ŭ jaje mahistarskaj dysiertacyi jość płahijat.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary