«Jak ja pamianiaŭ pracu i žyćcio»: šeść hadoŭ adpracavaŭ u MUS, a potym syšoŭ u dramaturhi

FINANCE.TUT.BY abviaściŭ pra start konkursu «Jak ja pamianiaŭ pracu i žyćcio». Adzin ź pieršych listoŭ — ad dramaturha Vitala Karalova, jaki šeść hadoŭ prapracavaŭ u MUS, pierš čym zrazumieŭ: «Čas valić».

Pavialičyć

«Kalehi nie razumieli, navošta ja sychodžu ź ciopłaha miesca»

— U 2006 hodzie ja skančaŭ histaryčny fakultet BDU, kafiedru archieałohii. U toj momant žyćcia mnie byli cikavyja dźvie rečy, pamiž jakimi ja vybiraŭ: surjozna zajmacca navukaj abo pajści «słužyć Radzimie», jak maje dziady-hieroi Savieckaha Sajuza, jakija prajšli vajnu. Ciapier heta ŭsio ŭsprymajecca jak adzin vialiki štamp, ale ŭ toj momant ja realna dumaŭ, što, vybraŭšy druhi šlach, zmahu zrabić hetuju krainu lepšaj i prynosić karyść svajoj siamji i hramadstvu.

Mianie brali ŭ aśpiranturu Akademii navuk, ale Hieorhij Štychaŭ, lehienda biełaruskaj archieałohii, mnie niejak skazaŭ: «Ty možaš stać archieołaham, praca cikavaja, ale ž bahatym ty nikoli nie budzieš». Tady heta było čystaj praŭdaj, ciapier, nakolki ja viedaju, na žal, situacyja nie źmianiłasia. Uvohule, pahladzieŭ ja tady na tryccacihadovy pinžak najlepšaha archieołaha krainy i pajšoŭ pracavać u MUS.

Ja nie budu raśpisvać, dzie mienavita ja pracavaŭ, nijakich sakretaŭ niama, prosta tłumačyć doŭha i sumna. Skažu tolki, što złačyncaŭ ja ŭ vočy nie bačyŭ, ź pistaleta stralaŭ tolki ŭ ciry, karaciej, «pisaram adsiedzieŭsia». Ale šeść hadoŭ, jakija ja prapracavaŭ u sistemie, nie prajšli darma, — dośvied heta byŭ kałasalny. Kali b nie hetyja hady, ja b, napeŭna, nie pačaŭ pisać, bo maja pieršaja pjesa «Učastkovyja» jakraz pra heta: pra sistemu i čałavieka ŭ joj.

Dyk voś, nieŭzabavie moj entuzijazm zhas, a kali kazać bolš dakładna i pafasna: raźbiŭsia ab surovuju rečaisnaść. Ja zrazumieŭ, što realizavać siabie ŭ hetaj sistemie (jak, napeŭna, i ŭ luboj inšaj) ja nie zmahu. I zvolniŭsia. Bolšaść kalehaŭ, naturalna, nie razumieła, navošta ja dobraachvotna sychodžu ź ciopłaha miesca, u jakim mnie, u svaje 30, zastavałasia adsiedzieć ŭsiaho 14 hadoŭ da piensii. Ale ŭ hetym i była pryčyna majho sychodu: ja razumieŭ, što ŭsie hetyja hady ja budu prosta siadzieć u ciopłym mieście. Ale dumka pra heta mianie, kali ščyra, zabivała. Adnojčy ŭ mianie adbyŭsia cikavy dyjałoh z kaleham, jaki na toj momant adpracavaŭ u milicyi 21 hod. Ja spytaŭ: «Saša, ty tut stolki hadoŭ adpracavaŭ, raskažy choć, jak heta?» A jon mnie adkazaŭ: «Ty viedaješ, Vitala, pralacieli jak adzin dzień». Navat nie «adzin hod», jon skazaŭ mienavita «jak adzin dzień», i tady, napeŭna, ja kančatkova zrazumieŭ, što «para valić».

«U finansavym płanie paśla zvalnieńnia z MUS vyjhraŭ»

— Ja zvaliŭ. Staŭ fryłansieram, pačaŭ pisać scenary da rekłamnych rolikaŭ. Z časam zrazumieŭ, što kamiercyjnyja zamovy — heta, viadoma, dobra, ale chočacca, kab ciabie zapomnili, śled niejki ŭ kultury pakinuć zachaciełasia. I pačaŭ ja zajmacca teatralnaj dramaturhijaj. Spačatku vielmi doŭha i šmat vyvučaŭ ramiastvo pa knihach, internecie, a potym sam uziaŭsia za piaro i pačaŭ pisać pjesy. Dobra heta ŭ mianie atrymlivajecca ci nie — sudzić nie mnie, ale ludziam byccam by padabajecca. Voś śpiektakl pa maim «Opiumie» krytyki pryznali najlepšym u 2016 hodzie. Tak što adčuvaju addaču, adčuvaju, što rablu niešta patrebnaje, a značyć, spyniacca nie budu.

U finansavym płanie paśla zvalnieńnia z MUS ja, naturalna, vyjhraŭ: dobryja śpiecyjalisty atrymlivajuć dobra. Ale jość adzin minus — adsutnaść toj samaj stabilnaści, ad jakoj ja źbieh. Voś pačaŭsia vajenny kanflikt va Ukrainie, u Rasii i ŭ nas uzrovień žyćcia istotna ŭpaŭ, i maje prybytki razam ź im. Tamu ciapier zamovaŭ dobrych amal niama. Ale ja i ŭ hetym znajšoŭ stanoŭčy bok: zrazumieŭ, što treba zajmacca čymści svaim i ciapier raźvivaju niekalki kirunkaŭ nievialikaha biznesu. Stvaryŭ sajt i zajmajusia turyzmam, taksama chutka budu arhanizoŭvać pab-kviz.

Tak što ź viedańniem spravy mahu zajavić: usie źmieny — da lepšaha. Heta ja ŭžo dziasiatki razoŭ zrazumieŭ. Hałoŭnaje, nie bajacca i znachodzić u sabie siły, kab ruchacca dalej.

• 0
• 0
• 0
• 0
• 0
• 0
• 0
• 0