Pakupnikam kvater u padarunak prapanujuć «padarožža ŭ lubuju kropku śvietu». Što, praŭda?
Adździeł markietynhu kampanii «A-100 Development» abjaviŭ pra start akcyi «Kupi kvateru ŭ Zialonym Bary i atrymaj adpačynak u padarunak», u ramkach jakoj kožny, chto nabyvaje novaje žytło ŭ hetym kvartale, atrymlivaje siertyfikat na padarožža ŭ lubuju krainu śvietu. Rekłama z takoj spakuślivaj prapanovaj źjaviłasia ŭ ŚMI.
Rekłamadaŭcy sami zrabili akcent na tym, što vandroŭka moža być absalutna luboj: niachaj heta budzie žadańnie pajechać u Antarktydu ci Aŭstraliju. Adnak kali ŭčytacca ŭ praviły akcyi, vyśviatlajecca, što vybar davoli abmiežavany: siertyfikat na akazańnie turystyčnych pasłuh dziejničaje tolki pa tych kirunkach, jakija moža prapanavać turystyčnaje ahienctva. Jaho, u svaju čarhu, arhanizatar akcyi abiraje samastojna. A košt padarunkavaha padarožža nie pavinien pieravyšać $1500. Pra ŭsie hetyja tonkaści moža daviedacca tolki toj čałaviek, jaki nie lanujecca pierachodzić pa dadatkovych spasyłkach i čytać umovy da kanca, u tym liku źviartajučy ŭvahu na drobny šryft.
Pra toje, ci nie bačać tut supracoŭniki «A-100 Development» padmieny paniaćciaŭ i padmanu, my spytali ŭ ich asabista.
«My nie chavajem umovy akcyi: paśla taho, jak čałaviek nabyvaje kvateru, jamu dajuć siertyfikat, jaki praduhledžvaje atrymańnie vandroŭki ad našaha turapieratara ŭ miežach 1,5 tysiačy dalaraŭ. Udakładniajučaja infarmacyja pra heta jość na sajcie Zialonaha Boru, kudy viaduć usie spasyłki z artykułaŭ u ŚMI. Dadatkovyja źviestki možna atrymać i pa telefonie. My nikoha nie chočam uvieści ŭ zman: tak, biudžet na vandroŭki abmiežavany, ale pra ŭsie niuansy akcyi na tym ža radyjo niemahčyma raskazać adrazu, bo efirny čas abmiežavany», — prakamientavała «Našaj Nivie» namieśnica dyrektara adździeła markietynhu i rekłamy «A-100 Development» Maryna Ivanoŭskaja.
Karaciej, dla supracoŭnikaŭ kampanii situacyja nie źjaŭlajecca prablemnaj. Vidavočna, što pradaŭcy va ŭsim śviecie hrajuć pa žorstkich praviłach, dzie ŭsie srodki dobryja. I heta situacyja jašče raz paćviardžaje nieabchodnaść sto razoŭ pieračytvać usie damovy i ŭmovy rekłamnych akcyj, kab potym nie adčuvać siabie łocham.
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary