10 rečaŭ, jakija mianie ździvili na vostravie Hran-Kanaryja
«Vostraŭ Hran-Kanaryja, jaki ŭvachodzić u archipiełah Kanarskich vyspaŭ, nie taki maleńki, jak mnie ŭjaŭlałasia pa kartach. Jaho płošča amal u piać razoŭ bolšaja za płošču Minska, i krychu bolš za płošču Smalavickaha rajona», — dzielicca ŭ fejsbuku pieršymi ŭražańniami ad vostrava aŭtar «Našaj Nivy» Jahor Lebiadok.
Bierahavaja linija — 236 km, ź ich 60 km — heta plažy (usiaho 128 plažaŭ, praŭda, nie ŭsie jany piasčanyja i vialikija). U turystyčnych praśpiektach hety vostraŭ nazyvajuć «minijaturnym kantynientam» i, pabyvaŭšy na im, mahu z takim epitetam całkam pahadzicca. Pryroda na vostravie raznastajnaja i ŭnikalnaja — ad pustynnych vydmaŭ da łaŭrovych lasoŭ.
Tut vyroščvajuć kavu (adzinaje miesca ŭ jeŭrapiejskich krainach), apielsiny, abrykosy, banany, finiki i inšyja ekzatyčnyja frukty.
40% vostrava pryznana JUNIESKA bijaśfiernym zapaviednikam suśvietnaha značeńnia.
Paŭnočnaja i paŭdniovaja častki vyspy adroźnivajucca praź viatry z Sachary i hornaha masiva ŭ centry vyspy. Paŭnočnaja častka bolš zialonaja, čym paŭdniovaja, u harach u asnoŭnym rastuć miascovyja vidy sosnaŭ.
Kanarskija vyspy nazvali ŭ honar sabak (na łacinskaj Canariae), maŭlaŭ, ich było tut bahata, ale nie skazaŭ by, što ciapier ich šmat.
Sabaki na vostraŭ patrapili ź pieršymi pierasialencami dzieści kala 800—500 hh. da n.e. Karennaje nasielnictva nazyvałasia «huančy» (choć i siarod ich byli raznavidnaści). Na vyśpie ad abaryhienaŭ zastałasia spadčyna ŭ vyhladzie kultury, tradycyj i piačor. Samy viadomy kompleks piačor — Cenobio de Valeron — heta žyllo abaryhienaŭ, pryčym «nory» takija nie tolki na viersie, ale i hłyboka ŭ skałach i pad ziamloj raźmiaščalisia.
Najbolš viadomaja siarod piačor vyspy — Cueva Pintada, raźmieščanaja ŭ miastečku Haldar — pieršaj stalicy huančaŭ. Piačora viadomaja zachavanym na jaje ścienach naskalnym žyvapisam.
U ciapierašni čas uvachod u piačoru ažyćciaŭlajecca praz muziejny kompleks.
U cełym na vostravie šmat piačor, jakija, naroŭni z łandšaftam, miascovaje nasielnictva na praciahu doŭhaha času paśpiachova vykarystoŭvała ŭ roznych vojnach za niezaležnaść (varta adznačyć, što zavajova vyspy ispancami doŭžyłasia amal 80 hadoŭ).
U ciapierašni čas nasielnictva vyspy składaje kala 850 tys. čałaviek, bolšaja častka jakoha žyvie ŭ asnoŭnym horadzie vyspy — Łas-Palmas. Niahledziačy na heta, vostraŭ dosyć ščylna zasieleny ŭ tym sensie, što i ŭ harach, i ŭ dalinach jość nievialikija pasieliščy abo, pa mienšaj miery, damy.
Charakterna, što architektura ŭ roznych pasieliščach adroźnivajecca, ad hetaha naviedvańnie vyspy stanovicca jašče bolš cikavym i niemanatonnym.
Jašče da naviedvańnia na Hran-Kanaryja vielmi rekamienduju miascovy bataničny sad — tam vielmi pryhoža i ramantyčna (kamu treba). Ale varta ŭličyć, što tam jość abryvistyja vyšynnyja ściežki, nu i jaščarki, viadoma, choć jany i amal nie prykmietnyja.
Najlepšy z punktu hledžańnia jakaści i krajavidaŭ plaž na vostravie — heta plaž u Maspałomasie, raźmieščanym na poŭdni vyspy.
Hetaja častka vyspy svaimi dziunami nahadvaje pustyniu. Ułasna, piasok siudy častkova i zanosicca viatrami z Sachary.
Hulać pa vydmach basanož cikava — na aśvietlenaj soncam častcy horača (apoŭdni, napeŭna, i nie ŭstoiš), na cieniavym — całkam sabie pryjemna.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary