Dla pracy ź dziećmi pradziusarski centr niaviestki Łukašenki prydumaŭ biełaruskich transformieraŭ
«Muzyčnaja miedyjakampanija» nie tolki raskručvaje i prasoŭvaje biełaruskich artystaŭ estrady, stvaraje radyjostancyi, arhanizoŭvaje pradziaržaŭnyja mierapryjemstvy i navat haradskija školnyja vypusknyja. Jak vyśvietliła rasśledavalnickaja hrupa «Biuro», pradprymalnyja šoumejkiery asvojvajuć novuju nišu — dziciačyja śviaty, prasoŭvajučy biełaruskija traktary, hruzaviki i samazvały siarod moładzi niezvyčajnym čynam. Jany prydumali ajčynnych transformieraŭ — «biełobataŭ», jakich rekłamujuć u sacyjalnych sietkach i na karparatyŭnych mierapryjemstvach.
Pratatypami dla robataŭ pasłužyła technika hihantaŭ biełaruskaha mašynabudavańnia: MTZ, MAZa i BiełAZa. Naprykład, robat pa imieni Bazis simvalizuje dasiahnieńni žodzinskaha zavoda pa vytvorčaści samazvałaŭ.
Dziva-techniku abjadnali pad brendam «Kamanda pieršych». U handlovaj marki jość svaje sajt i akaŭnt u Instahramie, u jakich stvaralniki aceńvajuć zadaču prajekta — «sučasny dziciačy brend, jaki moža natchnić vučycca i pasprabavać siabie ŭ vynachodnictvie i dakładnych navukach».
«Biuro» vyśvietliła, što za imidžavaj kampanijaj pa papularyzacyi biełaruskaj techniki siarod moładzi i impartazamiaščeńniem zachodnich multyplikacyjnych hierojaŭ staić «Muzyčnaja miedyjakampanija». U studzieni 2024 hoda firma padała piać zajavak na rehistracyju handlovych marak «Kamanda pieršych» i «Biełobaty».
«Muzyčnaja miedyjakampanija» — heta pradziusarski centr, u jakim pasadu namieśnicy dyrektara zajmaje Taćciana Kułakova. Heta rodnaja siastra Hanny Łukašenki, žonki Dźmitryja Łukašenki.
«Muzyčnaja miedyjakampanija» naležyć Pałacu Respubliki Upraŭleńnia spraŭ Łukašenki (30%) i pryvatnaj kampanii «ANSŁ pradakšn» (70%). Apošniaja zapisanaja na Andreja Urubleŭskaha (95%) — adnaho z padnačalenych Dźmitryja Łukašenki. Vierahodna, Urubleŭski vykonvaje ŭ «ANSŁ pradakšn» funkcyju naminalnaha ŭładalnika, kab utaić udzieł u kampanii žonki svajho patrona.
Abrevijatura ANSŁ vielmi nahadvaje inicyjały žonki siaredniaha syna Łukašenki — ANna (pa-rusku) Siarhiejeŭna Łukašenka.
Aficyjnaja prezientacyja «biełobataŭ» prajšła 1 červienia ŭ Nacyjanalnaj biblijatecy ŭ miežach dziciačaha śviata «Razumniejšyja za ŭsich na śviecie», arhanizavanaha ŭ Mižnarodny dzień achovy dziaciej. U žniŭni «Kamandu pieršych» pryciahvali dla ŭdziełu ŭ «BiełAZ-feście» ŭ Žodzinie — arhanizataram fiestyvalu vystupili sam BiełAZ i «Muzyčnaja miedyjakampanija», źviazanaja z mašynabudaŭničym chołdynham. Pradziusarski centr taksama zajmaŭsia arhanizacyjaj haradskoha śviata, prymierkavanaha da 80-hodździa MAZa.
Jašče raniej ideju z «biełobatami», padobna, zacaniŭ Alaksandr Łukašenka. U minułym hodzie jon pa tradycyi naviedaŭ«Hałoŭnuju jełku krainy», jakaja sabrała ŭ Pałacy Respubliki bolš za dźvie tysiačy dziaciej ź Biełarusi, Łatvii, akupavanych Rasijaj ukrainskich terytoryj i siektara Haza. Dzieci pasłuchali pramovu Łukašenki i pahladzieli kazačny śpiektakl «Mašyna navahodniaha času».
Pavodle siužetu navahodniaj pastanoŭki,
«padstupny Šnups razam sa svaimi pamahatymi pałamali mašynu navahodniaha času i vykrali Dzieda Maroza, tak što Śniahurcy i jaje siabroŭcy Miry davodzicca źviartacca pa dapamohu da sapraŭdnych supierhierojaŭ — troch biełaruskich transformieraŭ biełobataŭ».
U Biełarusi źjavicca «Radyjo Šanson». Zdavałasia b, pryčym tut Hanna Siałuk?
Doktar Maryjarci biełaruskaj estrady. Vy nie pavierycie, chto piša patryjatyčnyja pieśni dla dziaržTB i karparatyvaŭ siłavikoŭ
Rasśledavalniki: Siamja Dźmitryja Łukašenki ciesna źviazanaja ź biznesoŭcami, jakija zarabili sotni miljonaŭ dalaraŭ na prodažy BiełAZaŭ
Aŭstryjski Raiffeisen Bank pradaŭ Pryjorbank arabam2
Kamientary