«Ludzi rynulisia ŭ kramy pa vadu, u vyniku byŭ časovy jaje deficyt». Biełarusy raskazvajuć pra toje, jak polskija ŭłady zmahajucca z pavodkaj
Pavodka zakranuła adrazu niekalki krain Centralnaj Jeŭropy, siarod jakich Polšča, kudy paśla 2020 hodu pierajechali sotni tysiač biełarusaŭ. Radyjo Svaboda pahavaryła ź imi pra toje, što ciapier adbyvajecca ŭ krainie i jak palaki reahujuć na stychiju.
Na tydni mocnyja liŭni pryviali da pavodki adrazu ŭ niekalkich eŭrapiejskich haradach. Najbolš ciarpiać Čechija, Słavaččyna, Rumynija, Aŭstryja i Polšča. U apošniaj najbolš paciarpieli žychary paŭdniova-zachodniaj častki krainy. Šmat haradoŭ i viosak stychija litaralna źniščyła: Hłuchałazy, Kłodzku, Londek-Zdruj. Ułady zajaŭlajuć pra miljony złotych strataŭ, na adnaŭleńnie paškodžanaj infrastruktury spatrebicca niekalki hadoŭ.
Padjom uzroŭniu vady ŭ race Odra ŭ čaćvier 19 vieraśnia dajšoŭ da Ŭrocłava, dzie žyvie šmat biełarusaŭ.
U horadzie zakryli dla ruchu niekatoryja masty i vulicy. U baraćbu sa stychijaj uciahnutyja 16 tysiač vajskoŭcaŭ. Pa infarmacyi na ranak piatnicy 20 vieraśnia, haradzkaja systema Ŭrocłava vytrymała kulminacyjnuju chvalu ŭ noč z 19 na 20 vieraśnia.
Ministerstva abarony Polščy ad paniadziełku pačynaje aperacyju «Feniks». Jaje mety — biaśpieka, zdaroŭje, medycynskaja dapamoha, u tym liku z udziełam viertalotaŭ, mabilnaść — adbudavańnie daroh i mastoŭ, lahistyka — vada, charčy.
Bieły ściah — dla evakuacyi, čyrvony — dla lekaŭ, sini — patreba ŭ vadzie
Biełaruska Anastasija Sasykbajeva žyvie va Ŭrocłavie z 2021 hodu. Jana raskazvaje, što ciapier sytuacyja ŭ horadzie tryvožnaja, adnak Anastasija ličyć, što horad padrychtavany da «vialikaj vady». Chacia incydenty ŭsio ž zdarajucca: niekalki dzion tamu chtości zapuściŭ čutki, što vada z krana bolš nie prydatnaja da spažyvańnia. Heta vyklikała reakcyju.
«Ludzi rynulisia ŭ kramy pa vadu, u vyniku byŭ časovy jaje deficyt. Ja ŭ piaci kramach nie znajšła vady. Ale nazaŭtra zavieźli», — raskazvaje surazmoŭca.
Pa nazirańniach Anastasii, u horadzie šmat vajskoŭcaŭ i valanteraŭ. Ludziam razdajuć miaški i piasok, kab jany mahli samastojna ŭmacavać žytło i padvały. Pa słovach surazmoŭcy, na čałavieka dajuć 20 miachoŭ piasku. Jana taksama brała i razam z susiedziami ŭmacoŭvała padvał u šmatkvaternym domie.
Anastasija raskazvaje, što ludzi aktyŭna ŭklučylisia i dapamahajuć kamunalnym słužbam. Šmat haradžan pryjšli na ŭmacavańnie miascovaha zaaparku. Jana taksama kaža, što spravicca z panikaj dapamahaje pastajannaje infarmavańnie z boku ŭładaŭ. Ludziam raskazvajuć, što kupić, čym zapasacca i inšaje. Naprykład, haradzkija ŭłady painfarmavali, što ŭ vypadku braku pitnoj vady treba vyviesić u akno što-niebudź błakitnaje ci siniaje; kali patrabujecca evakuacyja — biełaje, kali leki — čyrvonaje.
«Tam latajuć viertaloty i adsočvajuć sytuacyju, usio pilnujuć. Paraŭnańni — niaŭdziačnaja reč. Ale ŭsio-taki ŭ paraŭnańni ź Biełaruśsiu ja pačuvajusia jak čałaviek, pra jakoha kłapociacca. Adčuvaju siabie tryvožna, ale ŭ biaśpiecy», — zaznačyła Anastasija.
Hanna (imia źmienienaje pa prośbie surazmoŭcy. — RS) žyvie ŭ Jeleniaj Hury na paŭdniovym zachadzie Polščy. Horad taksama trapiŭ pad pavodku, ale ciapier vada ŭžo syšła. Jana kaža, što, u pryncypie, miascovyja ŭłady byli hatovyja da pavodki — spuskali vadaschoviščy, adkryvali damby i padrychtavali piasok.
U horadzie byli prablemy z vadoj z centralnaha vodapravodu — jaje nielha było pić i navat dla bytavych patrebaŭ varta było kipiacić. Ale ciapier, kaža Hanna, sytuacyja narmalizavałasia. U sadkach i škołach niekalki dzion nie pravodziłasia zaniatkaŭ. U škołach raźmiaścili ludziej, jakich evakuavali z zatoplenych haradoŭ.
Biełaruska dadała, što ŭłady kazali raniej pra nieabchodnaść budavać dadatkovyja vadaschoviščy, ale miascovyja žychary byli suprać, bo treba pad heta zatapić pali i inšyja ziemli.
«Moža być, ciapierašniaja pavodka paŭpłyvaje na toje, što ich usio ž pabudujuć», — zaznačyła Hanna.
Aŭstryjski Raiffeisen Bank pradaŭ Pryjorbank arabam2
Kamientary