Papiarednija dadzienyja śviedčać pra toje, što ŭ Vilni znojdzienyja pareštki kiraŭnika antyrasiejskaha paŭstańnia 1863 hoda Zyhmunta Sierakoŭskaha, paviedamiła Ministerstva kultury Litvy.
Pareštki znajšli na placoŭcy hary Hiedymina archieolahi Litoŭskaha nacyjanalnaha muzeju. «Pavodle papiarednich źviestak, adny z vyjaŭlenych pareštak, mahčyma, naležać kiraŭniku paŭstańnia 1863 hodu Sierakoŭskamu», — cytuje pres-reliz ministerstva radyjo «Svaboda».
Jak infarmuje ministerstva kultury Litvy, ciapier archieolahi zakančvajuć druhi etap archiealahičnych daśledavańniaŭ na hary Hiedymina. Byŭ daśledavany ŭčastak płoščaj 36 kv. m., zafiksavanyja haryzonty kulturnaha płasta da 1,1-2,7 metraŭ, balšynia ź ich źviazvajecca ź Vilenskaj vajskovaj krepaśju, jakaja isnavała tam u XIX stahodździ. Znojdzienyja čatyry mahiły ź siamiu pachavanymi ciełami, u troch mahiłach było pachavana pa dva cieły.
Balšynia ciełaŭ pachavanyja biez naležnaj pavahi, sa źviazanymi za śpinaj rukami, ablityja vapnaj.
U adnoj padvojnaj mahile znojdzienaja kula, u inšych mahiłaŭ kulaŭ nia vyjaŭlena. Pry ciełach znojdzienyja detali adzieńnia (spražki ramianioŭ, huziki, niekalki drobnych frahmentaŭ tkaniny), asabistyja rečy pamierłych — medaljony relihijnaha źmiestu, kryžyki.
Adzin ź miortvych byŭ zakapany ŭ asobnaj jamie. Pry im znojdzieny medalik, a na pravaj ruce — załaty piarścionak z nadpisam z unutranaha boku: «Zygmund Apolonija 11 Sierpnia / 30 Lipca 1862 r.».
Zyhmunt Sierakoŭski byŭ adnym z kiraŭnikoŭ paŭstanńja ŭ 1863-64 hh. U karotkim časie jon sabraŭ bujny atrad z 5 tysiač čałaviek, ale ŭ bai byŭ raźbity ŭradavymi vojskami. Sud prysudziŭ jamu śmiarotnaje pakarańnie praz paviešańnie. Sierakoŭski byŭ pakarany ŭ 1863 hodzie ŭ Vilni na Łukiskim placy.
Jaho žonkaj była Apałonija z Daleŭskich — siastra paŭstancaŭ i «pieršaja pryhažunia na Litvie», jak jaje nazyvali.
Ich šlub adbyŭsia ŭ Kiejdanach (ciapier Kiejdaniaj, Litva) 30 lipienia (11 žniŭnia pavodle novaha stylu) 1862. Imia i data supadajuć z paznačanymi na piarścionku, znojdzienym u biezymiennaj mahile.
Heta moža być uskosnym śviedčańniem taho, što ŭ joj lažyć Zyhmunt Sierakoŭski.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy13
Kamientary